ALASEVOLƐ dɔɔnwo mɔɔ ɛlɛsonle wɔ ɛleka mɔɔ bɛhyia Belemgbunlililɛ nolobɔlɛma dɔɔnwo la le mediema mraalɛ mɔɔ bɛtɛgyale. Bie mɔ ɛzonle wɔ maanle gyɛne zo ɛvolɛ dɔɔnwo. Duzu a boale bɛ a? Anwubielɛ boni a bɛnyia a? Kɛzi bɛ ɛbɛlabɔlɛ wiele bɛ ɛ? Yɛbizebizale mediema mraalɛ ɛhye mɔ bie edwɛkɛ. Saa ɛle adiema raalɛ mɔɔ ɛtɛgyale na ɛkpondɛ kɛ ɛyɛ ɛzonlenlɛ gyima mɔɔ maa ahunlundwolɛ la a, bɛ anwubielɛ ne baboa wɔ. Saa Nyamenle menli kɔsɔɔti suzu bɛ neazo ne anwo a, ɔbaboa bɛ.

Ɛngola ɛnnwu ye saa ɛbahola wɔayɛ adekpakyelɛ gyima ne wɔ maanle gyɛne zo ɔ? Ɛnee Anita mɔɔ yenyia ɛvolɛ 75 la ɛnlie ɛnli kɛ ɔbahola. Ɔbɔle adekpakyelɛ gyima ne abo wɔ England ɛleka mɔɔ ɔnyinle la, ɛnee yenyia ɛvolɛ 18. Ɔse: “Ɛnee me nye die kɛ mebahilehile menli Gyihova anwo debie, noko meandwenle nwolɛ ɛlɛ kɛ mebahola meazonle maanle gyɛne zo. Ɛnee metɛsukoale aneɛ gyɛne ɛlɛ yemɔti ɛnee menlie menli kɛ mebahola bie sukoa. Ɔti mɔɔ bɛvɛlɛle me kɛ membɛla Geleade Sukulu ne bie la ɔzinle me nwo. Ɔyɛle me nwanwane kɛ medame zɛhae ala menyianle nwolɛ adenle ɛhye la. Noko menyianle adwenle kɛ, ‘Saa Gyihova ɛnwu kɛ mebahola meayɛ a, ɛnee mebazɔ meanlea.’ Ɛhye zile la, ɛvolɛ 50 ɛpɛ nu. Ɔvi zɔhane mekɛ ne, metɛsonle kɛ edwɛkpatɛlɛvolɛ wɔ Japan.” Anita toa zo kɛ: “Ɔyɛ a, meka mekile mediema mraalɛ ngakula ne mɔ kɛ, ‘Bɛva bɛ baage ne bɛgyela na bɛmaa yɛyɛ gyima mɔɔ yɛ anyelielɛ kpalɛ la!’ Me nye die kɛ bɛ nuhua dɔɔnwo ɛyɛ zɔ la.”

Mɔlebɛbo ne mediema mraalɛ dɔɔnwo mɔɔ hɔzonlenle maanle gyɛne zo la hwehwenle bɛ bo aze. Kɛ ɔyɛle mɔɔ bɛnyianle akɛnrasesebɛ ɛ?

Maureen mɔɔ yenyia ɛvolɛ 64 la se: “Mɔɔ melɛnyi la, ɛnee mekulo kɛ mebɔ ɛbɛla mɔɔ gyi bodane zo na ɔbaboa awie mɔ la. Ɔnyianle ɛvolɛ 20 la, ɔdule ɔhɔle Quebec, Canada, ɛleka mɔɔ ɛnee bɛhyia adekpakyelɛma dɔɔnwo la. “Nzinlii, me sa hanle Geleade Sukulu ɛsalɛdolɛ kɛlata, noko ɛnee mesulo kɛ mebagyakyi me gɔnwo mɔ meahɔ ɛleka mɔɔ menze ɛkɛ la.” Ɔtoa zo kɛ: “Ɛnee ɔyɛ me nyane kɛ mebagyakyi me mame mɔɔ ɛlɛnea me papa mɔɔ ɛnde kpɔkɛ la. Membodole Gyihova wɔ edwɛkɛ ɛhye mɔ anwo fane dɔɔnwo. Menganle mɔɔ ɛlɛgyegye me la mengilele me awovolɛ la, bɛhanle kɛ menlie ɛsalɛdolɛ ne mendo nu. Eza menwunle kɛzi asafo ne vile  ɛlɔlɛ nu boale me awovolɛ la. Kɛzi Gyihova ɛboa awie mɔ la maanle menyianle anwodozo kɛ ɔbanlea me. Ɛnee akee menyia nwo kɛ mebahɔ!” Maureen vale ɛvolɛ mɔɔ bo 30 zonlenle kɛ Edwɛkpatɛlɛvolɛ wɔ West Africa, ɔvi 1979. Ɛnɛ, Maureen ɛlɛnea ye mame wɔ Canada, noko eza ɔsonle kɛ adekpakyelɛnli titili. Saa ɔnea ɛvolɛ mɔɔ yeva yɛzonle wɔ maanle gyɛne zo la a, ɔka kɛ: “Gyihova vale mɔɔ ɛnee mehyia nwo la maanle me wɔ ye mekɛ nu.”

Wendy mɔɔ yenyia ɛvolɛ 65 la bɔle adekpakyelɛ gyima ne abo wɔ Australia mekɛ mɔɔ ɛnee ɔle kakula la. Ɔka kɛ: “Ɛnee mele foanvoanle kpalɛ ɔti ɛnee ɔyɛ se kɛ me nee nyɛvolɛ badendɛ. Noko adekpakyelɛ gyima ne maanle menwunle kɛzi me nee awie biala badendɛ la, yemɔti menyianle anwodozo. Nzinlii, menwunle kɛ menlɛ ngyegyelɛ wɔ anwodozo nwo. Adekpakyelɛ gyima maanle menvale me nwo mendole Gyihova anwo zo, na menwunle kɛ kɛkala mebahola meazonle wɔ maanle gyɛne zo. Eza adiema raalɛ bie mɔɔ ɔtɛgyale na yeva ɛvolɛ mɔɔ bo 30 yezonle kɛ edwɛkpatɛlɛvolɛ wɔ Japan la hanle kɛ membɛla membanyɛ adekpakyelɛ gyima wɔ ɛkɛ. Daselɛlilɛ mɔɔ me nee ye hɔle la maanle ɛhulolɛ mɔɔ melɛ kɛ mebazonle maanle gyɛne zo la yɛle kpole.” Wendy dule hɔle Vanuatu mɔɔ ɔle bɔra la wɔ 1986, na ɔvi Australia mɔɔ kɔ ɛkɛ la bayɛ kɛyɛ mayɛle 1,100 (km 1,770).

Wendy tɛbɔ Vanuatu, kɛkala ɔsonle wɔ ɔfese mɔɔ bɛkile edwɛkɛ bo wɔ ɛkɛ la. Ɔse: “Saa menwu ekpunli ngakyile nee asafo dɔɔnwo mɔɔ bɛlɛte wɔ ɛleka mɔɔ ɛde ɔ nwo la a, ɔmaa me nye die. Ɔle nwolɛ adenle kpole kɛ melɛboa Gyihova gyima ne ekyii wɔ mbɔra ɛhye mɔ azo a.”

Ɛnee Kumiko mɔɔ kɛkala yenyia ɛvolɛ 65 la ɛlɛsonle wɔ Japan kɛ dahuu adekpakyelɛnli, na ye adekpakyelɛ bokavolɛ ne zuzule nwolɛ hilele ye kɛ ɔmaa bɛhɔ Nepal. Kumiko se: “Ɛnee dahuu ɔka kɛ memaa yɛhɔ, noko meka kɛ kyɛkyɛ. Ɛnee ɔgyegye me kɛ ɔwɔ kɛ mesukoa aneɛ gyɛne na mekɔtɛnla maanle gyɛne zo la. Yɛɛ ɛnee menlɛ ezukoa. Mekɛ mɔɔ melɛka moto na melɛdwenle ɛhye anwo la, kale bie bɔle me na bɛvale me bɛhɔle asopiti. Mela ɛkɛ ne la, mendwenlenle kɛ: ‘Nwane a ze mɔɔ bado me bieko a? Bie a mebanyia ewule ɛzulolɛ bie mɔɔ bazi me adenle kɛ mebahɔzonle maanle gyɛne zo la. Asoo menrɛhola menrɛva ɛvolɛ ko bɔbɔ menrɛzonle wɔ maanle gyɛne zo ɔ?’ Menzɛlɛle Gyihova ɛsesebɛ kɛ ɔboa me ɔmaa menzi kpɔkɛ.” Bɛyele Kumiko bɛvile asopiti la, ɔhɔle Nepal, na amozii ɔ nee ye adekpakyelɛ bokavolɛ ne dule hɔle ɛkɛ.

 Kumiko nea asɛɛ ɛvolɛ bulu mɔɔ yeva yɛzonle wɔ Nepal la a, ɔka kɛ: “Me nee me ngyegyelɛ ne mɔ avinli kpakyele kɛ mɔɔ Nyevile Kɔkɔlɛ ne anu kpakyele la. Ɔyɛ me fɛ kɛ mengɔzonlenle ɛleka mɔɔ bɛhyia moalɛ la. Saa melɛka Baebolo ne anu edwɛkɛ meahile abusua bie a, menli nnu anzɛɛ nsia noko batie bie. Ngakula ngyikyi bɔbɔ ka kile me kɛ menva trate mɔɔ ka Baebolo nu edwɛkɛ la bie memaa bɛ. Ɔyɛ anyelielɛ kɛ melɛsonle wɔ azɛlɛsinli ɛhye mɔɔ so ma la anu a.”

Mediema mraalɛ akɛnrasesebɛma ɛhye mɔ yiale ngyegyelɛ. Kɛzi bɛlile nwolɛ gyima ɛ?

Diane mɔɔ vi Canada la se: “Alimoa ne, ɛnee ɔyɛ se kɛ mebavi me abusua ne anwo meahɔ moa.” Kɛkala yeli ɛvolɛ 62, ɔvale ɛvolɛ 20 ɔzonlenle kɛ edwɛkpatɛlɛvolɛ wɔ Ivory Coast (kɛkala bɛfɛlɛ ye Côte d’Ivoire). “Menzɛlɛle Gyihova kɛ ɔmaa me nye ɛlie menli mɔɔ wɔ me azɛlɛsinli ne anu la anwo. Adiema Jack Redford mɔɔ boka me Geleade kilehilevolɛma ne anwo la hanle hilele yɛ kɛ, alimoa ne bie a tɛnlabelɛ mɔɔ yɛbayia ye wɔ yɛ gyima ne anu la bagyegye yɛ, ɔbazi yɛ nwo bɔbɔ, titili saa yɛlɛdi ehyia kpalɛ a. Noko ɔhanle kɛ: ‘Bɛmmanea ehyia ne. Bɛnlea menli ne anyunlu nee bɛ nye. Saa bɛte Baebolo ne anu nɔhalɛ ne a, anrɛɛ bɛnlea mɔɔ bɛbayɛ la.’ Menyɛle ye zɔ, na ɔboale me kpalɛ! Saa meka Belemgbunlililɛ edwɛkɛ ne mekile bɛ a, menwu kɛ bɛ nye die kpalɛ!” Duzu bieko a boale maanle ɔholale ɔzonlenle wɔ maanle gyɛne zo a? “Membikyele me Baebolo sukoavoma, na nɔhalɛlilɛ mɔɔ bɛvale bɛzonlenle Gyihova la maanle me nye liele kpole. Ɛleka mɔɔ ɛnee melɛsonle la rayɛle me sua zo. Menyianle sunsum nu ninlima, selɛma, mediema mrenya nee mraalɛ, kɛ mɔɔ Gyisɛse hanle la.”—Maake 10:29, 30.

Anne mɔɔ ɛli ɛvolɛ 46 la ɛlɛsonle wɔ Asia ɛleka mɔɔ bɛdua yɛ gyima ne la. Ɔse: “Ɛvolɛ bie anzi mɔɔ ɛnee melɛsonle wɔ maanle gyɛne zo la, me nee mediema mraalɛ bie mɔɔ bɛ subane nee ɛleka mɔɔ bɛvi la le ngakyile kolaa fi me ɛdeɛ ne anwo la dɛnlanle. Ɔyɛ a, ɛhye ɛmmaa yɛ nloa ɛnzɛ yɛ nwo yɛɛ ɔka me ɛya. Ɔba ye zɔhane a, mebɔ mɔdenle mebikye bɛ, amaa meanwu bɛ amaamuo ne kpalɛ. Eza membɔle mɔdenle kɛ mebahulo bɛ na meade bɛ edwɛkɛ bo kpalɛ. Ɔyɛ me fɛ kɛ ɛhye maanle menyianle agɔnwolɛma dɔɔnwo mɔɔ maanle mengolale me gyima ne yɛ la.”

 Wɔ 1993, bɛmaanle Ute mɔɔ vi Germany na yeli ɛvolɛ 53 la hɔzonlenle wɔ Madagascar kɛ edwɛkpatɛlɛvolɛ. Ɔse: “Alimoa ne, ɛnee mennwu ɛkɛ ne aneɛ ne anye zo, yɛɛ wuluwulu, ebunlu, ngɛkɛba nee azone noko gyegyele me. Noko menyianle moalɛ dɔɔnwo. Mediema mraalɛ ne mɔ, bɛ mra, nee me Baebolo sukoavoma nyianle abotane boale me maanle menzukoale aneɛ ne. Saa me nwo to me a, me edwɛkpatɛlɛvolɛ bokavolɛ ne nea me kɛnlɛma. Noko, Gyihova a boale me kpole kpalɛ a. Ɛnee mefa me adwenleadwenle meto ɔ nyunlu dahuu. Akee mefa kenle dodo bie anzɛɛ siane dɔɔnwo mekendɛ kɛ ɔbabua me asɔneyɛlɛ ne. Gyihova lile ngyegyelɛ biala anwo gyima.” Kɛkala, Ute ɛva ɛvolɛ 23 ɛzonle wɔ Madagascar.

Mediema mraalɛ mɔɔ bɛtɛgyale mɔɔ bɛde maanle gyɛne zo la ka kɛ, ɛsonle maanle gyɛne zo a ɔmaa wɔ ɛbɛlabɔlɛ gyinla bodane zo, kɛ mɔɔ mediema gyɛne mɔɔ bɛkɔsonle ɛleka mɔɔ bɛhyia moalɛ dɔɔnwo ka la. Nyilalɛ mɔɔ bɛnyia la bie a le boni?

Ɔvi 1968, Heidi mɔɔ ɛli ɛvolɛ 73 na ɔvi Germany la, ɛlɛsonle kɛ edwɛkpatɛlɛvolɛ wɔ Ivory Coast (kɛkala bɛfɛlɛ ye Côte d’Ivoire). Ɔse: “Debie mɔɔ ɛmaa me nye ɛlie kpalɛ la a le me sunsum nu mralɛ mɔɔ menwu kɛ ‘bɛlua nɔhalɛ adenle ne anu la.’ Kɛkala me Baebolo sukoavoma ne mɔ bie le dahuu adekpakyelɛma nee asafo nu mgbanyima. Bɛ nuhua dɔɔnwo fɛlɛ me mame anzɛɛ nana. Asafo nu mgbanyima ɛhye mɔ anu ko nee ɔ ye yɛɛ ɔ mra bu me kɛ meboka bɛ abusua ne anwo. Ɔti Gyihova ɛmaa me ralɛ nrenyia, ase, yɛɛ nlɔnra nsa.”—3 Dwɔn 4.

Karen mɔɔ vi Canada na yeli ɛvolɛ 72 la, vale ɛvolɛ mɔɔ bo 20 la zonlenle wɔ West Africa. Ɔka kɛ: Edwɛkpatɛlɛvolɛ gyima ne maanle menwunle kɛ ɔwɔ kɛ metu me nwo memaa, na meda ɛlɔlɛ nee abotane ali kpalɛ. Bieko, mediema mɔɔ bɛvi maanle ngakyile nu mɔɔ me nee bɛ yɛle gyima la maanle me adwenle nu bukele. Menwunle kɛ tɛ adenle ko ala a bɛdua zo bɛyɛ debie a. Ɔle nyilalɛ kpole kɛ kɛkala menyia agɔnwolɛma wɔ ewiade amuala a! Yɛ ɛbɛlabɔlɛ nee yɛ gyimalilɛ ɛhakyi, noko yɛ agɔnwolɛvalɛ ne tɛbɔ ɛkɛ.”

Margaret mɔɔ ɔvi England na yeli ɛvolɛ 79 la zonlenle kɛ edwɛkpatɛlɛvolɛ wɔ Laos. Ɔka kɛ: “Maanle gyɛne zo mɔɔ menzonlenle la, ɛmaa menwu kɛzi Gyihova twe menli ngakyile ba ye ahyehyɛdeɛ ne anu la. Ɛhye maanle me diedi ne anu yɛle se kpalɛ. Ɔmaa menyia anwodozo kɛ Gyihova ɛlɛkile ye ahyehyɛdeɛ ne adenle na ye bodane ne mɔ bara nu.”

Mraalɛ mɔɔ bɛtɛgyale na bɛlɛsonle wɔ maanle gyɛne zo la ɛyɛ neazo kɛnlɛma ɛmaa Kilisienema. Bɛfɛta nganvolɛ kpalɛ. (Man. 11:40) Bɛ dodo ne noko ɛlɛkɔ ɔ nyunlu. (Edw. 68:11) Ɛbahola wɔayɛ nzenzaleɛ wɔali mediema mraalɛ ɛhye mɔ mɔɔ bɔ mɔdenle mɔɔ yɛbizebizale bɛ edwɛkɛ la neazo ne anzi ɔ? Saa ɛyɛ zɔ a, ‘ɛbazɔ Gyihova wɔanlea na wɔanwu kɛ ɔle kpalɛ.’—Edw. 34:8.