Menli Mɔɔ Bɛnli Nane—Duzu A Baebolo Ne Ka A?
Menli dɔɔnwo ɛlɛmaa yeala ali wɔ ewiade amuala kɛ bɛnli nane.
“Menli mɔɔ bɛnli nane la bɔ mɔdenle biala kɛ bɛko bɛatia nane mɔɔ bɛyɛ bɛ amumuyɛ anzɛɛ bɛku bɛ bɛdi anzɛɛ bɛfa bɛ nwoma bɛyɛ tɛladeɛ anzɛɛ debie gyɛne biala la.”—The Vegan Society.
Saa ɛye nane mɔɔ bɛdwenle bɛ nwo la ɛsie ahane a, eza bie mɔ noko ɛnli nane ɔlua ninyɛne mɔɔ ɛbɔ yɛ nwo mgbɔlɔka ɛyia, bɛ kpɔkɛdelɛ anzɛɛ bɛ ɛzonlenlɛ ti.
Bie mɔ wɔ ɛkɛ a bɛ nye ɛnlie nane nwo la ati a bɛnli a, noko menli mɔɔ bɛnli nane (bɛle vegan) la ɛdeɛ, fane dɔɔnwo ne ala bɛbu ye kɛ ɔwɔ kɛ awie biala si kpɔkɛ kɛ ɔnrɛli nane amaa bahola bɛayɛ ewiade ne boɛ.”—Britannica Academic.
Asoo menli mɔɔ ɛnli nane la bahola amaa ewiade ayɛ boɛ ɔ? Duzu a Baebolo ne ka a?
Kɛzi yɛ Bɔvolɛ ne bu sonla nee nane la
Baebolo ne kile kɛ yɛ Bɔvolɛ Gyihova Nyamenle a bu sonla kɛ ɔsonle bolɛ ɔtɛla nane, ɔti yemaa menli tumi kɛ bɛnlea nane nwo zo. (Gyɛnɛsese 1:27, 28) Nzinlii, Nyamenle maanle alesama adenle kɛ bɛhu nane bɛli. (Gyɛnɛsese 9:3) Noko, ɔngulo kɛ yɛyɛ nane amumuyɛ.—Mrɛlɛbulɛ 12:10.
Baebolo ne kile kɛ yɛkola yɛsi kpɔkɛ kɛ yɛbali nane anzɛɛ yɛnrɛli. b Noko kpɔkɛ biala mɔɔ yɛbazi la ɛngile kɛ yɛle kpalɛ yɛtɛla awie wɔ Nyamenle anye zo. (1 Kɔlentema 8:8) Ɔnle kɛ awie tendɛ tia ɔ gɔnwo wɔ ye kpɔkɛ mɔɔ ɔbazi la anwo.—Wulomuma 14:3.
Mɔɔ bamaa ninyɛne ayɛ kpalɛ kenle bie la
Baebolo ne maa yɛnwu kɛ kɛzi yɛbabɔ yɛ ɛbɛla biala la ɛnrɛmaa ngyegyelɛ mɔɔ wɔ ewiade ye anu la ɛnrɛvi ɛkɛ. Maanyɛlɛ, menli subane yɛɛ ewiade ɛhye anu ezukoa nwo ngyehyɛleɛ a fa ngyegyelɛ dɔɔnwo ba a, na sonla ɛnrɛhola ɛnrɛyɛ nwolɛ ɛhwee. Baebolo ne ka kɛ:
“Debie mɔɔ ɛhyea la, bɛngola bɛndenrɛ ye.”—Nolobɔvo 1:15.
Yɛ Bɔvolɛ ne bali yɛ ngyegyelɛ ne anwo gyima. Baebolo ne ka ɛhye anwo edwɛkɛ wɔ sɛkɛlɛneɛ adenle zo.
“Na menwunle anwuma fofolɛ nee azɛlɛ fofolɛ; ɔluakɛ ɛnee alimoa anwuma ne nee alimoa azɛlɛ ne ɛpɛ nu, na nyevile ɛnle ɛkɛ bieko.”—Yekile 21:1.
Nyamenle bava “anwuma fofolɛ,” ye anwuma Belemgbunlililɛ ne yeazie alesama arane ne mɔ, anzɛɛ “alimoa anwuma ne” agyakɛ anu. Ye Belemgbunlililɛ ne baye “alimoa azɛlɛ ne” mɔɔ le ɛtanevolɛma la yeavi ɛkɛ na yeali “azɛlɛ fofolɛ ne,” anzɛɛ menli mɔɔ tie ye la anwo zo tumi.
Wɔ Nyamenle Belemgbunlililɛ ne tumililɛ bo ala a alesama bazukoa kɛ bɛ nee nane badɛnla anzodwolɛ nu na bɛanlea ninyɛne mɔɔ ɛbɔ bɛ nwo mgbɔlɔka ɛyia la azo kpalɛ a.—Ayezaya 11:6-9.
a Nyamenle duma a le Gyihova.—Edwɛne 83:18.
b Baebolo ne ka kɛ ‘yɛhwe yɛ nwo yɛvi mogya nwo.’ (Gyima ne 15:28, 29) Ɛhye kile kɛ ɔnle kɛ yɛno mogya anzɛɛ yɛdi nane mɔɔ bɛampɛ ɔ ti; yɛɛ ɔnle kɛ yɛdi aleɛ biala mɔɔ bɛva mogya bɛyɛ la.
Bie A Eza Ɛ Nye Balie
EDWƐKƐTILE NGAKYILE
Ninyɛne Bayɛ Kpalɛ Kenle Bie
Duzu ati a ɛwɔkɛ mɔɔ wɔ Baebolo ne anu la le ngakyile fi kenle bie nwo edwɛkɛ mɔɔ menli ka la anwo ɛ?
ƐZINZALƐ ARANE
Asoo Sonla Bazɛkye Azɛlɛ Ye Bɔkɔɔ?
Baebolo ne hanle azɛlɛ ne mɔɔ bɛlɛsɛkye ye kɛkala la anwo edwɛkɛ dole ɛkɛ, na eza ɔhanle mɔɔ bavi nu ara la.
EDWƐKƐTILE NGAKYILE
Asoo Awie Biala Ezukoa Gyinlabelɛ Bayɛ Kpalɛ?
Arane bie wɔ ɛkɛ ne mɔɔ ɔbahola yeanlea yeamaa ninyɛne ahɔ zo pɛpɛɛpɛ wɔ azɛlɛ ye azo, na yeaye ehyia nee ezukoa nwo ngyegyelɛ yeavi ɛkɛ a.
