Ndɛnebuavolɛma 7:1-25
7 Akee Gyɛlubeeyale mɔɔ le Gedɛyɔn+ la nee menli mɔɔ nee ye lua la kɔsɔɔti dwazole ndɛ na bɛyɛle bɛ azokoɛleɛ wɔ Heelɔdo Nzubula ne anwo, mekɛ zɔhane ɛnee Medeanema azokoɛleɛ ne wɔ ye sɔlɔ wɔ Moolɛ boka ne mɔɔ wɔ bɔnza ne anu la azo.
2 Akee Gyihova zele Gedɛyɔn kɛ: “Menli mɔɔ nee wɔ lua la zonle somaa kɛ mebava Medeanema meawula bɛ sa nu.+ Anrɛɛ Yizilayɛ bava amemaa ɔ nwo zo ahile me kɛ, ‘Medame me sa a liele me a.’+
3 Mesɛlɛ wɔ, ka ye wɔ menli ne anyunlu ɛkɛ ne kɛ: ‘Awie biala mɔɔ ye ahonle ɛdu na ɔ nwo ɛlɛwoso ye la ɛzia ɛhɔ sua nu.’”+ Ɔti Gedɛyɔn zɔle bɛ nleanle. Na menli ne anu 22,000 ziale hɔle sua nu, na ɔhale 10,000.
4 Noko Gyihova zele Gedɛyɔn kɛ: “Menli ne tɛso somaa. Maa bɛhɔ nzule ne anloa na menzɔ bɛ menea wɔ ɛkɛ ne memaa wɔ. Saa meka mekile wɔ kɛ: ‘Sonla ɛhye nee wɔ bahɔ’ a, ɛ nee ye ɛhɔ, noko saa meka mekile wɔ kɛ, ‘Sonla ɛhye nee wɔ ɛnrɛhɔ’ a, ɛ nee ye mmakɔ.”
5 Ɔti ɔvale menli ne ɔhɔle nzule ne anloa.
Akee Gyihova zele Gedɛyɔn kɛ: “Maa menli mɔɔ kɛva bɛ tafinlima kɛnlo nzule ne kɛ mɔɔ twea yɛ la ɛgyinla ahane, na maa bɛdabɛ mɔɔ bɛkɛhoto bɛ gyakɛ abonyi zo bɛkɛnlo nzule la noko ɛgyinla ahane.”
6 Menli dodo mɔɔ vale bɛ sa zale nzule nlonle la le 300. Menli mɔɔ hale la amuala hotole bɛ gyakɛ abonyi zo nlonle nzule.
7 Akee Gyihova zele Gedɛyɔn kɛ: “Mebalua menli 300 ne mɔɔ vale bɛ sa nlonle nzule la anwo zo mealie bɛ na meava Medeanema meawula bɛ sa nu.+ Yemɔti maa menli mɔɔ ɛha la amuala ɛzia ɛhɔ sua nu.”
8 Ɔti mɔɔ bɛliele aleɛ ne nee aweɛne ne mɔ bɛvile menli ne mɔ ɛkɛ la, ɔmaanle Yizilayɛ mrenyia mɔɔ ɛha la kɔsɔɔti ziale hɔle sua nu, na ɔvale menli 300 ne ala. Ɛnee Medeanema azokoɛleɛ ne wɔ ye aze wɔ bɔnza ne anu.+
9 Zɔhane nɔe ne, Gyihova zele ye kɛ: “Dwazo kɔ bɛ nwo zo wɔ azokoɛleɛ ne, ɔluakɛ meva bɛ mewula ɛ sa nu.+
10 Noko saa ɛsulo kɛ ɛbahɔ bɛ nwo zo a, ɛ nee wɔ sonvolɛ Pula ɛhɔ azokoɛleɛ ne.
11 Tie mɔɔ bɛbaha la, na ɛhye anzi ɛbanyia akɛnrasesebɛ* na wɔahɔ bɛ nwo zo wɔ azokoɛleɛ ne.” Ɔti ɔdaye nee ye sonvolɛ Pula hɔle ɛleka mɔɔ bikye ɛlɔne ne azokoɛleɛ ne la.
12 Akee Medeanema nee Amalɛkema yɛɛ Aduduleɛ Amra+ yɛle bɔnza ne anu menyemenye kɛ abɛbɛ la, na ɛnee bɛngola bɛ afunlumu ne mɔ tia,+ bɛ nwo zonle kɛ ɛnweazo ɛnwea.
13 Mɔɔ Gedɛyɔn rale la, ɔdele kɛ nrenyia bie ɛlɛka ɛlalɛ bie ahile ɔ gɔnwo, na ɔhanle kɛ: “Ɛlalɛ mɔɔ meha la ɛne. Ɛnee baale paano kunguma bie ɛlɛkundo ara Medeanema azokoɛleɛ ne. Ɔradwule ɛdanlɛsua bie anwo na ɔzile ye kpole ɔmaanle ɔgolole ɔguale.+ Ɛhɛe, ɔbutule ɛdanlɛsua ne anye aze na ɔgologolole ye bɔkɔɔ.”
14 Ɔti ɔ gɔnwo ne zele ye kɛ: “Ɛhye le Yizilayɛnli Dwowahye ara Gedɛyɔn konle dadeɛ ne.+ Nyamenle ɛva Medeanema nee ɛlɔne ne amuala ɛwula ɔ sa nu.”+
15 Mɔɔ Gedɛyɔn dele ye ɛlalɛ ne nee ɔ bo ɛhilelɛ ne ala la,+ ɔbɔle ɔ ti aze na ɔzonlenle Nyamenle. Akee ɔziale ɔhɔle Yizilayɛma azokoɛleɛ ne na ɔhanle kɛ: “Bɛdwazo, ɔluakɛ Gyihova ɛva Medeanema azokoɛleɛ ne ɛwula bɛ sa nu.”
16 Akee ɔhyɛle mrenyia 300 ne anu ekpunli nsa na ɔmaanle bɛ muala aweɛne+ nee mbuakɛ mgbole mɔɔ tɛkɛ veɛvea nu la.
17 Akee ɔzele bɛ kɛ: “Bɛnlea me na bɛyɛ mɔɔ mebayɛ la bie. Saa mebikye azokoɛleɛ ne a, ɔwɔ kɛ bɛyɛ mɔɔ mebayɛ la bie.
18 Saa me nee menli mɔɔ nee me lua la kɔsɔɔti bɔ aweɛne ne a, ɔwɔ kɛ bɛdabɛ noko bɛbɔ aweɛne ne mɔ wɔ azokoɛleɛ ɛkɛ ne amuala na bɛtea nu kɛ, ‘Gyihova nee Gedɛyɔn ɛdeɛ ɔ!’”
19 Gedɛyɔn nee ye menli 100 ne bikyele azokoɛleɛ ne wɔ mekɛ mɔɔ nɔɔzo ɛzinzalɛ mɔɔ tɔ zo nwiɔ* la ɛbɔ ɔ bo la, mekɛ mɔɔ bɛhakyile sinzavolɛ ne mɔ ala la. Bɛbɔle aweɛne ne mɔ+ na bɛbobɔle mbuakɛ mgbole ne mɔ mɔɔ bɛdedɛ ye bɛ sa nu la.+
20 Ɔti menli ekpunli nsa ne bɔle aweɛne ne mɔ na bɛbobɔle mbuakɛ mgbole ne mɔ. Bɛdedɛle tɛkɛ ne mɔ wɔ bɛ sa bɛne ne mɔ anu yɛɛ bɛbɔle aweɛne ne mɔ mɔɔ wɔ bɛ sa fema ne mɔ anu la na bɛdeanle nu kɛ: “Gyihova nee Gedɛyɔn konle dadeɛ ɔ!”
21 Mekɛ zɔhane ɛnee awie biala gyi ɔ bo zo ne wɔ azokoɛleɛ ne, na ɛlɔne ne amuala nriandile, bɛlɛnriandi la ɛnee bɛlɛteɛdea nu.+
22 Menli 300 ne hɔle zo bɔle bɛ aweɛne ne mɔ, na Gyihova maanle bɛ nuhua ko biala vale ye konle dadeɛ hɔle ɔ gɔnwo anwo zo wɔ azokoɛleɛ ne amuala;+ na ɛlɔne ne nriandile hɔle Bɛte-hyeta, na bɛdoale zo bɛhɔle Zɛlɛlaa too bɛhɔdwule Ebɛle-mɛhɔla+ mɔɔ bikye Tabate la kandiba.
23 Na bɛvɛlɛle Yizilayɛ mrenyia mɔɔ wɔ Nafetalae, Ahya yɛɛ Manasɛ+ la amuala, na bɛvoanle Medeanema ndinlizo.
24 Gedɛyɔn zoanle menli maanle bɛhɔle Yifelaem awoka ne mɔ azo amuala na bɛhɔhanle kɛ: “Bɛhɔ Medeanema anwo zo na bɛhɔzia azule ne mɔ anloa too bɛhɔdwu Bɛte-bɛla nee Dwɔdan ne anloa.” Ɔti Yifelaem mrenyia kɔsɔɔti boɔboale bɛ nloa na bɛhɔziale azule ne mɔ anloa too bɛhɔdwule Bɛte-bɛla nee Dwɔdan ne anloa.
25 Eza bɛhyele Medean mgbanyima nwiɔ ne, Olɛbe nee Ziyɛbe; bɛhunle Olɛbe wɔ Olɛbe bolɛ ne azo;+ yɛɛ bɛhunle Ziyɛbe wɔ Ziyɛbe nwanye ɛhwihwinlɛ kuma ne anu. Bɛvoanle Medeanema ndinlizo+ na bɛvale Olɛbe nee Ziyɛbe adile ne mɔ bɛrɛlɛle Gedɛyɔn wɔ Dwɔdan maanzinli ne anu.
