Lɛvitikɔso 20:1-27
20 Gyihova doale zo zele Mosisi kɛ:
2 “Ka kile Yizilayɛma kɛ, ‘Saa Yizilayɛnli biala anzɛɛ ɛyɛvolɛ biala mɔɔ de Yizilayɛ la fa ɔ ra maa Molɛke a, ɔwɔ kɛ bɛku ye.+ Ɔwɔ kɛ menli mɔɔ wɔ azɛlɛ ne azo la si ye awolɛ ku ye.
3 Medame mumua ne mebadu me nye meazie ɔ nwo na meaye ye* meavi ye menli ne avinli, ɔluakɛ yeva ɔ mra ne mɔ bie yemaa Molɛke na yegua me ɛleka nwuanzanwuanza ne+ nee me duma nwuanzanwuanza ne anwo evinli.
4 Saa menli mɔɔ wɔ azɛlɛ ne azo la anye fuu bu bɛ nye gua mɔɔ zɔhane sonla ne mɔɔ ɛva ɔ ra ɛmaa Molɛke la ɛyɛ la azo na bɛangu ye a,+
5 ɛnee medame mumua ne mebadu me nye meazie zɔhane sonla ne nee ye abusua ne anwo.+ Mebaye* zɔhane sonla ne nee menli kɔsɔɔti mɔɔ lile ɔ nzi bɛ nee Molɛke bɔle tuutuu la meavi bɛ menli ne avinli.
6 “‘Awie* mɔɔ kɛdoa menli mɔɔ tendɛ sunsum ɛtane nloa zo+ nee menli mɔɔ ka kenle bie edwɛkɛ+ na bɛ nee bɛ kɛbɔ tuutuu ɛbɛla wɔ sunsum nu la, mebadu me nye meazie ahenle* anwo na meaye* ye meavi ye menli ne avinli.+
7 “‘Ɔwɔ kɛ bɛte bɛ nwo na bɛyɛ nwuanzanwuanza,+ ɔluakɛ medame a mele Gyihova bɛ Nyamenle ne a.
8 Na ɔwɔ kɛ bɛdi me mɛla ne mɔ azo na bɛfa bɛbɔ bɛ ɛbɛla.+ Medame a mele Gyihova mɔɔ melɛmaa bɛ nwo ade la.+
9 “‘Awie biala mɔɔ kɛha munzule edwɛkɛ* kɛtia ye papa anzɛɛ ye mame la, ɔwɔ kɛ bɛku ye.+ Kɛmɔ yeha munzule edwɛkɛ yetia ye papa anzɛɛ ye mame la ati, ye mogya gua ɔdaye ɔ ti zo.
10 “‘Ɛhye a fale awie mɔɔ nee ɔ gɔnwo aye kɛzɛkye agyalɛ la anwo a: Awie mɔɔ nee ɔ gɔnwo aye kɛzɛkye agyalɛ la, ɔwɔ kɛ bɛku ye, nrenyia ne nee raalɛ ne mɔɔ ɛzɛkye agyalɛ la amu nwiɔ.+
11 Awie mɔɔ nee ye papa aye kɛla la ɛbɔ ye papa anyiemgba.*+ Ɔwɔ kɛ bɛku bɛ mu nwiɔ. Bɛ mogya gua bɛdabɛ bɛ ti zo.
12 Saa awie nee ɔ ra nrenyia aye da a, ɔwɔ kɛ bɛku bɛ mu nwiɔ. Mɔɔ bɛyɛ la le kyibadeɛ kpole. Bɛ mogya gua bɛdabɛ bɛ ti zo.+
13 “‘Saa nrenyia nee nrenyia da kɛ mɔɔ awie nee raalɛ da la a, mɔɔ bɛ mu nwiɔ bɛyɛ la le kyibadeɛ.+ Ɔwɔ kɛ bɛku bɛ. Bɛ mogya gua bɛdabɛ bɛ ti zo.
14 “‘Saa nrenyia nee raalɛ yɛɛ raalɛ ne mame da a, ɔle ɛbɛlatane.*+ Ɔwɔ kɛ bɛyela bɛ muala wɔ senle nu,+ amaa zɔhane ɛbɛlatane ne angɔ zo wɔ bɛ avinli.
15 “‘Saa nrenyia nee nane da a, ɔwɔ kɛ bɛku ye, yɛɛ ɔwɔ kɛ bɛku nane ne.+
16 Saa raalɛ maa adenle maa nane nee ye da a,+ ɔwɔ kɛ bɛku raalɛ ne nee nane ne. Ye biala anu bɛhu bɛ. Bɛ mogya gua bɛdabɛ bɛ ti zo.
17 “‘Saa nrenyia nee ɔ diema raalɛ, ye papa ara raalɛ anzɛɛ ye mame ara raalɛ da na biala nwu ɔ gɔnwo anwo a, ɔle anyiemgba.+ Ɔwɔ kɛ bɛku bɛ wɔ bɛ menli ne anye zo. Yebɔ ɔ diema raalɛ ne anyiemgba.* Ɔwɔ kɛ ɔdi ye ɛtane ne anwo ɛzonle.
18 “‘Saa nrenyia nee raalɛ mɔɔ ɛhɔ amozi la da a, bɛ mu nwiɔ bɛmaa mogya mɔɔ ɛlɛtu raalɛ ne la ɛla ali.+ Ɔwɔ kɛ bɛye* bɛ mu nwiɔ bɛfi bɛ menli ne avinli.
19 “‘Ɔnle kɛ ɛ nee wɔ mame adiema raalɛ anzɛɛ wɔ papa adiema raalɛ da, ɔluakɛ ɛbabɔ busuanli mɔɔ nee bɛ mogya le ko la anyiemgba.+ Ɔwɔ kɛ bɛdi bɛ ɛtane ne anwo ɛzonle.
20 Awie mɔɔ nee ye papa adiema aye kɛla la ɛbɔ ye papa adiema ne anyiemgba.*+ Ɔwɔ kɛ bɛdi bɛ ɛtane ne anwo ɛzonle. Ɔwɔ kɛ bɛwu mɔɔ bɛnwo ralɛ a.
21 Saa awie nee ɔ diema aye da a, ɔle kyibadeɛ.+ Yebɔ ɔ diema nrenyia ne anyiemgba.* Ɔwɔ kɛ bɛwu mɔɔ bɛnwo ralɛ a.
22 “‘Ɔwɔ kɛ bɛdi me ngyehyɛleɛ nee me mɛla ne mɔ amuala azo+ na bɛfa bɛbɔ bɛ ɛbɛla,+ amaa azɛlɛ ne mɔɔ melɛfa bɛ meahɔdɛnla zolɛ la anve bɛ angua bɛ lɔ.+
23 Bɛmmadi maanle maanle ne mɔ mɔɔ melɛfoa bɛ meavi bɛ nyunlu la amaamuo ne anzi;+ ɔluakɛ bɛyɛ ninyɛne ɛhye mɔ amuala yɛɛ mekyi bɛ.+
24 Ɛhye ati a menzele bɛ kɛ: “Bɛbava bɛ azɛlɛ ne bɛayɛ bɛ ɛdeɛ na meava meamaa bɛ kɛ bɛ agyapadeɛ, azɛlɛ mɔɔ meleke nee wolɛ se zolɛ la.+ Medame a mele Gyihova bɛ Nyamenle ne mɔɔ meye bɛ mevi menli kɔsɔɔti mɔɔ ɛha la anu a.”+
25 Ɔwɔ kɛ bɛmaa ngakyile da nane mɔɔ anwo te nee mɔɔ anwo ɛnde yɛɛ aloma mɔɔ anwo te nee mɔ anwo ɛnde la avinli;+ ɔnle kɛ bɛmaa nane anzɛɛ aloma anzɛɛ debie biala mɔɔ twenle ɔ nwo aze mɔɔ meye mezie ɛkɛ ne kɛ ɔ nwo ɛnde ɛmmaa bɛ la gua bɛ nwo* evinli.+
26 Ɔwɔ kɛ bɛyɛ nwuanzanwuanza bɛmaa me, ɔluakɛ medame Gyihova, mele nwuanzanwuanza,+ yɛɛ meye bɛ mevi menli mɔɔ ɛha la anu kɛ bɛle me ɛdeɛ.+
27 “‘Nrenyia anzɛɛ raalɛ biala mɔɔ tendɛ sunsum ɛtane nloa zo anzɛɛ ka kenle bie edwɛkɛ* la, ɔwɔ kɛ bɛku ye.+ Ɔwɔ kɛ menli ne si bɛ awolɛ ku bɛ. Bɛ mogya gua bɛdabɛ bɛ ti zo.’”
Ɔbodwɛkɛ
^ Anzɛɛ “na meahu ye.”
^ Anzɛɛ “Mebahu.”
^ Anzɛɛ “Ɛkɛla.”
^ Anzɛɛ “ɛkɛla ne.”
^ Anzɛɛ “meahu.”
^ Anzɛɛ “kɛdendɛ.”
^ Hibulu aneɛ nu, “ɛye ye papa anwo ɛdo zo.”
^ Anzɛɛ “anyiemgba ɛbɛla.”
^ Hibulu aneɛ nu, “Yeye ɔ diema raalɛ ne anwo yedo zo.”
^ Anzɛɛ “bɛku.”
^ Hibulu aneɛ nu, “ɛye ye papa adiema ne anwo ɛdo zo.”
^ Hibulu aneɛ nu, “Yeye ɔ diema nrenyia ne anwo yedo zo.”
^ Anzɛɛ “bɛ ɛkɛla ne mɔ anwo.”
^ Anzɛɛ “anzɛɛ lɛ sunsum mɔɔ ɔfa ɔka kenle bie edwɛkɛ.”
