Gyɛnɛsese 11:1-32
11 Ɛnee azɛlɛ ne azo amra amuala* ka aneɛ ko yɛɛ bɛ edwɛkɛ agbɔkɛ le ko.
2 Mɔɔ bɛlɛkɔ aduduleɛ afoa nu la, bɛnwunle azɛlɛ sɛsɛ bie wɔ Hyaenaa azɛlɛ zo,+ na bɛdɛnlanle ɛkɛ.
3 Akee bɛzele bɛ nwo ngoko kɛ: “Bɛrɛla bɛmaa yɛgua belekese na yɛva senle yɛdo.” Yemɔti bɛanva awolɛ, emomu bɛvale belekese na bɛvale bilewu bɛyɛle mɔta bɛsosɔle bɛ.
4 Akee bɛhanle kɛ: “Bɛrɛla bɛmaa yɛkyekye suakpole na yɛzi tawa yɛmaa ɔhɔ anwuma, na yɛlie duma kpole yɛmaa yɛ nwo, amaa yɛambɔ asande wɔ azɛlɛ ne amuala azo.”+
5 Akee Gyihova nleanle suakpole ne nee tawa ne mɔɔ menli ne ɛlɛsi la.
6 Na Gyihova hanle kɛ: “Nea! Bɛle menli ko yɛɛ bɛ aneɛ le ko,+ na mɔɔ bɛbɔ ɔ bo bɛlɛyɛ la ɛne. Kɛkala debie biala ɛnle bɛ adwenle nu mɔɔ bɛka kɛ bɛyɛ a bɛnrɛhola ye yɛ a.
7 Bɛla! Maa yɛhɔnlea*+ na yɛmaa bɛha aneɛ ngakyile ngakyile amaa bɛande bɛ nwo aneɛ.”
8 Yemɔti Gyihova bɔle bɛ asande wɔ ɛkɛ ne hɔle azɛlɛ ne azo amuala,+ na bɛgyakyile sua ne ɛkyekyelɛ.
9 Ɛhye ati a bɛvɛlɛle ye Babɛle*+ la, ɔluakɛ ɛkɛ ne a Gyihova maanle azɛlɛ ne kɔsɔɔti aneɛ ne yɛle ngakyile ngakyile a, yɛɛ Gyihova bɔle bɛ asande wɔ ɛkɛ ne hɔle azɛlɛ ne azo ɛleka biala.
10 Hyɛm anwo tetedwɛkɛ ɛne.+
Azuyilɛ ne anzi ɛvolɛ nwiɔ mɔɔ ɛnee Hyɛm ɛli ɛvolɛ 100 la, ɔwole Apakyehyade.+
11 Hyɛm wole Apakyehyade la anzi, ɔdɛnlanle aze ɛvolɛ 500. Na ɔwole mralɛ mrenyia nee mraalɛ.+
12 Apakyehyade lile ɛvolɛ 35 la, ɔwole Hyila.+
13 Apakyehyade wole Hyila la anzi, ɔdɛnlanle aze ɛvolɛ 403. Na ɔwole mralɛ mrenyia nee mraalɛ.
14 Hyila lile ɛvolɛ 30 la, ɔwole Yibɛ.+
15 Hyila wole Yibɛ la anzi, ɔdɛnlanle aze ɛvolɛ 403. Na ɔwole mralɛ mrenyia nee mraalɛ.
16 Yibɛ lile ɛvolɛ 34 la, ɔwole Pilɛge.+
17 Yibɛ wole Pilɛge la anzi, ɔdɛnlanle aze ɛvolɛ 430. Na ɔwole mralɛ mrenyia nee mraalɛ.
18 Pilɛge lile ɛvolɛ 30 la, ɔwole Riliyu.+
19 Pilɛge wole Riliyu la anzi, ɔdɛnlanle aze ɛvolɛ 209. Na ɔwole mralɛ mrenyia nee mraalɛ.
20 Riliyu lile ɛvolɛ 32 la, ɔwole Silɛge.
21 Riliyu wole Silɛge la anzi, ɔdɛnlanle aze ɛvolɛ 207. Na ɔwole mralɛ mrenyia nee mraalɛ.
22 Silɛge lile ɛvolɛ 30 la, ɔwole Neehɔ.
23 Silɛge wole Neehɔ la anzi, ɔdɛnlanle aze ɛvolɛ 200. Na ɔwole mralɛ mrenyia nee mraalɛ.
24 Neehɔ lile ɛvolɛ 29 la, ɔwole Tilaa.+
25 Neehɔ wole Tilaa la anzi, ɔdɛnlanle aze ɛvolɛ 119. Na ɔwole mralɛ mrenyia nee mraalɛ.
26 Tilaa lile ɛvolɛ 70 la, ɔwole Ebilam,+ Neehɔ+ yɛɛ Hɛlan.
27 Tilaa anwo tetedwɛkɛ ɛne.
Tilaa wole Ebilam, Neehɔ yɛɛ Hɛlan; na Hɛlan wole Lɔɔto.+
28 Hɛlan wule wɔ mekɛ mɔɔ ɛnee ye papa Tilaa tɛte aze la wɔ Kaledeama+ azɛlɛ Ɛɛle azo,+ ɛleka mɔɔ bɛwole ye la.
29 Ebilam nee Neehɔ gyale mraalɛ. Bɛfɛlɛ Ebilam aye ne Sɛlae+ yɛɛ bɛfɛlɛ Neehɔ aye ne Melekaa,+ mɔɔ le Hɛlan ara raalɛ la. Hɛlan a wole Melekaa nee Yeseka a.
30 Ɛnee Sɛlae le mota,+ ɔnlɛ ralɛ.
31 Akee Tilaa vale ɔ ra Ebilam nee ye anlɔnra Lɔɔto,+ Hɛlan ara ne, yɛɛ ye ase Sɛlae, ɔ ra Ebilam aye ne, na ɔ nee bɛ vile Ɛɛle mɔɔ wɔ Kaledea la kɛ bɛkɔ Keena azɛlɛ zo.+ Noko mɔɔ bɛradwule Hɛlan la,+ bɛdɛnlanle ɛkɛ.
32 Tilaa lile ɛvolɛ 205. Akee Tilaa wule wɔ Hɛlan.
Ɔbodwɛkɛ
^ Hibulu aneɛ nu, “azɛlɛ ne amuala.”
^ Hibulu aneɛ nu, “yɛdwu yɛhɔ bɛ nwo lɔ.”
^ Ɔ bo kile “Basabasayɛlɛ.”
