Edwɛne 71:1-24
71 O Gyihova, wɔ nu a menriandi mefea a.
Mmamaa me nyunlu gua aze ɛlɛ.+
2 Dua wɔ tenleneyɛlɛ zo die me na ye me.
Gyele ɛ nzo tie me* na die me ngoane.+
3 Yɛ bodane zo aranemgbole maa meƐleka mɔɔ mebahola meahɔ ye dahuu la.
Ka maa menyia ngoane,Ɔluakɛ ɛle me bodane nee me aranemgbole.+
4 O me Nyamenle, die me fi amumuyɛma asa anu,+Die me fi nzisima mɔɔ ɛnli pɛlepɛle la asa anu.
5 Ɔluakɛ wɔmɔ a ɛle me anyelazo a, O Tumivolɛ Awulae Gyihova;Ɔvi me ngakula nu yɛɛ menvale me nwo mendole ɛ nwo zo a.+
6 Ɔvi me awolɛ nu yɛɛ menvale me ti menzɔle wɔ a;Wɔmɔ a ɛyele me ɛvile me mame akunlu a.+
Meye wɔ ayɛlɛ dahuu.
7 Me nwo yɛ menli dɔɔnwo nwanwane,Noko wɔmɔ a ɛle me feabelɛ ɛsesebɛ a.
8 Wɔ ayɛlɛyelɛ ɛyi me nloa anu tɛkɛɛ;+Meka wɔ anyunlunyia ne anwo edwɛkɛ dahuu.
9 Mmafuandi me ɛto wɔ me mrelera nu;+Saa me anwosesebɛ wie a, mmakpo me.+
10 Me kpɔvolɛma tendɛ tia me,Yɛɛ bɛdabɛ mɔɔ bɛkpondɛ me bɛahu me* la yia bɔ adwenle.+
11 Bɛka kɛ: “Nyamenle ɛkpo ye.
Bɛvoa ye na bɛhye ye, ɔluakɛ ɔnlɛ awie mɔɔ die ye a.”+
12 O Nyamenle, mmafi me nwo ɛkɔ moa.
O me Nyamenle, ka ɛ nwo baboa me.+
13 Maa bɛdabɛ mɔɔ bɛdwazo bɛtia me laAnyunlu ɛgua aze na bɛ bo zo ɛbɔ.+
Maa bɛdabɛ mɔɔ bɛkpondɛ me nee munzule laƐheda anyiemgba nee nyiane.+
14 Na mame, mebahɔ zo meahendɛ;Mebaye wɔ ayɛlɛ meadɛla dɛba ne.
15 Me nloa baha wɔ tenleneyɛlɛ+Nee wɔ ngoanelielɛ gyima ne mɔ anwo edwɛkɛ dahuu,Noko bɛzonle somaa kɛ mekɛnwu bɛ kɔsɔɔti.*+
16 Mebara na meaha wɔ gyima mgbole ne mɔ anwo edwɛkɛ,O Tumivolɛ Awulae Gyihova;Mebaha wɔ tenleneyɛlɛ ne anwo edwɛkɛ, wɔ ɛdeɛ ne ala.
17 O Nyamenle, ɛvale me ɛhilehilelɛ ɔvi me ngakula* nu,+Na metɛbɔ wɔ nwanwane gyima ne mɔ nolo badwu ɛnɛ.+
18 O Nyamenle, saa meyɛ ɛrelera na me ti zo yɛ egyɛne bɔbɔ a, mmakpo me.+
Maa menga wɔ tumi* ne anwo edwɛkɛ mengile awolɛndoazo fofolɛNa menga wɔ anwosesebɛ kpole ne anwo edwɛkɛ mengile bɛdabɛ mɔɔ bɛbara la kɔsɔɔti.+
19 O Nyamenle, wɔ tenleneyɛlɛ ne kɔdwu anwuma;+Wɔyɛ ninyɛne mgbole;O Nyamenle, nwane a le kɛ ɛdawɔ a?+
20 Wɔmaa meyia ngyegyelɛ na menwu amaneɛ dɔɔnwo ɛdeɛ,+Noko maa menyia anwosesebɛ bieko;Ye me fi azɛlɛ ne abo* finde.+
21 Maa me kpoleyɛlɛ ɛhɔ ɔ nyunluBɔ me nwo bane na kyekye me rɛle.
22 Akee mebava getaa* meaye wɔ ayɛlɛO me Nyamenle, wɔ wɔ nɔhalɛlilɛ+ ne ati.
Mebava haape meado edwɛne meaye wɔ ayɛlɛ,*O Yizilayɛ Nwuanzanwuanza Ko ne.
23 Me nloa bava anyelielɛ adeɛdea nu wɔ mekɛ mɔɔ melɛto ayɛlɛyelɛ edwɛne meamaa wɔ la,+Ɔluakɛ wɔlie me ngoane.*+
24 Me tafinlima baha wɔ tenleneyɛlɛ ne anwo edwɛkɛ* dahuu,+Ɔluakɛ bɛdabɛ mɔɔ bɛkpondɛ me bɛazɛkye me la anyunlu bɛagua aze na bɛabɔ anyiemgba.+
Ɔbodwɛkɛ
^ Anzɛɛ “Ka ɛ nwo aze tie me.”
^ Anzɛɛ “bɛkpondɛ me ɛkɛla.”
^ Anzɛɛ “kɛ mekɛhola bɛ tia.”
^ Anzɛɛ “mgbavolɛ.”
^ Hibulu aneɛ nu, “ɛ sa.”
^ Anzɛɛ “azule kuma nu.”
^ Anzɛɛ “mebabɔ edwɛne meamaa wɔ.”
^ Anzɛɛ “wɔlie me ɛkɛla.”
^ Anzɛɛ “badwenledwenle nwolɛ.”
