Edwɛne 38:1-22
Devidi ayɛlɛyelɛ edwɛne, kɛ bɛva bɛyɛ ngakyelɛ.*
38 O Gyihova, mmatea me wɔ mekɛ mɔɔ wɔva ɛya la,Anzɛɛ mmatenrɛ me wɔ mekɛ mɔɔ wɔva ɛya kpole la.+
2 Ɔluakɛ wɔ ɛda mbaka ɛwowɔ me ɛhɔ moa,Yɛɛ ɛ sa ɛyɛ ɛlomboɛ wɔ me nwo zo.+
3 Wɔ ɛya kpole ne ati, me sonlabaka ne amuala ɛnde kpɔkɛ.*
Me ɛtane ti, menlɛ anzodwolɛ.*+
4 Ɔluakɛ me nvonleɛ ɛbo me nwo zo;+Bɛle kɛ adesoa ɛlomboɛ la, mengola ye soa.
5 Me nganlɛ ɛkpɔlɔ na bɛbɔ,Ɔlua me ngoaseasɛm ti.
6 Me nyanelilɛ ɛmaa megolo megua;Medua ye alɔbɔlɛ nu dahuu.
7 Me nwonane nu* dwe me;Me sonlabaka ne amuala ɛnde kpɔkɛ.+
8 Me nwo ɛnyia, na mebubu bɔkɔɔ;Me ahonle mɔɔ ɛlɛdi nyane la maa mekponle* kpole.
9 O Gyihova, ɛze mɔɔ mekulo la amuala,Na me ɛkponlenlɛ ɛnvea wɔ.
10 Me ahonle si kum kum, me anwosesebɛ ɛwie,Na wienyi ne mɔɔ wɔ me nye zo la ɛyɛ awozinli.+
11 Me nganlɛ ne mɔ ati, me alɔvolɛ nee me gɔnwo mɔ ɛkpo me,Yɛɛ menli mɔɔ bikye me kpalɛ la ɛmba me nwo.
12 Menli mɔɔ kpondɛ me ahu me* la suozua me ngane;Bɛdabɛ mɔɔ bɛkpondɛ me bɛayɛ me ɛtane la ka ɛzɛkyelɛ nwo edwɛkɛ;+Bɛka mɛlɛbɛla edwɛkɛ dahuu.
13 Noko mele kɛ anzondiliravolɛ la, mendie;+Mele kɛ mumule la, membuke me nloa.+
14 Meyɛ kɛ sonla mɔɔ ɛnde edwɛkɛ,Na ɔngola ɔnga edwɛkɛ ɔnlie ɔ nwo la.
15 Ɔluakɛ wɔmɔ, O Gyihova, yɛɛ mengendɛle wɔ a,+Na ɛbuale me, O Gyihova me Nyamenle.+
16 Ɔluakɛ menganle kɛ: “Mmamaa bɛdi fɛlɛko wɔ medame tiAnzɛɛ saa me gyakɛ tele a, mmamaa bɛmemaa bɛ nwo zo wɔ me ti.”
17 Ɔluakɛ anrɛɛ metɔ aze,Na ɛnee dahuu mete nyane.+
18 Menganle me nvonleɛ;+Me ɛtane gyegyele me.+
19 Noko me kpɔvolɛma anwo yɛ se* yɛɛ bɛle katakyiema,*Bɛdabɛ mɔɔ mgbane gyɛne nu ala bɛkyi me la anwo zonle.
20 Bɛvale ɛtane bɛduale kpalɛ mɔɔ menyɛle la kakɛ;Bɛdwazole bɛtiale me ɔlua kpalɛ mɔɔ ɛnee mekulo kɛ meyɛ la ati.
21 O Gyihova, mmakpo me.
O Nyamenle, mmafi me nwo ɛkɔ moa.+
22 Ka ɛ nwo baboa me,O Gyihova, me ngoanedievolɛ.+
Ɔbodwɛkɛ
^ Anzɛɛ “bɛva bɛhakye.”
^ Hibulu aneɛ nu, “me nwonane nu ɛnde.”
^ Hibulu aneɛ nu, “anzodwolɛ ɛnle me mbowule ne mɔ anu.”
^ Anzɛɛ “Me nze nu amuala.”
^ Anzɛɛ “mekpo.”
^ Hibulu aneɛ nu, “kpondɛ me ɛkɛla.”
^ Hibulu aneɛ nu, “de ngoane nu.”
^ Anzɛɛ ɔkola ɔkile, “Noko bɛdabɛ mɔɔ mgbane gyɛne nu ala bɛkpɔ me la anwo zonle.”
