Dwɔn Edwɛkpa 6:1-71
6 Ɛhye anzi, Gyisɛse hɔpɛle Galeli anzɛɛ Taebilease Nyevile ne hɔle ɔ nzi lɔ.+
2 Na menli dɔɔnwo bie hɔle zo doale ye,+ ɔluakɛ bɛnwunle nwanwane ninyɛne ne mɔɔ ɛnee ɔlɛyɛ yeava yeayɛ wuliravolɛma ayile la.+
3 Yemɔti Gyisɛse hɔvole boka bie na ɔ nee ye ɛdoavolɛma ne dɛnlanle aze wɔ ɛkɛ.
4 Ɛnee Dwuuma Akpabɛnwo+ ɛvoyia ne ɛbikye.
5 Mekɛ mɔɔ Gyisɛse maanle ɔ nye zo na ɔnwunle kɛ menli dɔɔnwo bie ɛlɛba ɔ nwo ɛkɛ ne la, ɔbizale Felepe kɛ: “Nienwu a yɛbadɔ paano yeamaa menli ɛhye mɔ ali a?”+
6 Noko ɔhanle ɛhye ɔvale ɔzɔle ye ɔnleanle ɔluakɛ ɛnee ɔze mɔɔ ɔbayɛ la.
7 Felepe buale kɛ: “Saa yɛtɔ paano denale* 200 na yɛmaa bɛ nuhua ko biala ekyi bɔbɔ a, ɔnrɛza bɛ.”
8 Ye ɛdoavolɛma ne anu ko, Saemɔn Pita adiema Andelu zele ye kɛ:
9 “Kakula nrenyia bie lɛ baale paano nnu yɛɛ fɛlɛ ngyikyi nwiɔ wɔ ɛke. Noko kɛ ɔkɛyɛ na ɛhye aza menli dɔɔnwo ɛhye ɛ?”+
10 Gyisɛse hanle kɛ: “Bɛmaa menli ne ɛdɛnlɛdɛnla aze.” Kɛmɔ ɛnee ndile dɔɔnwo wɔ ɛkɛ la ati, menli ne dɛnlɛdɛnlanle aze wɔ ɛkɛ, ɛnee bɛle mrenyia kɛyɛ 5,000.+
11 Gyisɛse vale paano ne, na mɔɔ ɔlale ase ɔwiele la, ɔhyɛle ɔmaanle bɛdabɛ mɔɔ bɛdede ɛkɛ ne la; zɔhane ala a ɔyɛle fɛlɛ ekyi ne noko a, na bɛnyianle dodo mɔɔ bɛkpondɛ la.
12 Noko mekɛ mɔɔ bɛlile na bɛ ko yile la, ɔzele ye ɛdoavolɛma ne kɛ: “Bɛsesa ɔ bo zo ne mɔɔ ɛha la, amaa debie biala anzɛkye mgbane.”
13 Yemɔti bɛboɔboale ɔ nloa na bɛnyianle paano nnu ne mɔɔ menli ne lile la abo zo ahɛndɛne 12 tetɛkɛɛ.
14 Mɔɔ menli ne nwunle nwanwane gyima ne mɔɔ yeyɛ la, bɛbɔle ɔ bo bɛhanle kɛ: “Nɔhalɛ nu, ɛhye a le Ngapezonli ne mɔɔ ɛlɛba ewiade la.”+
15 Akee mɔɔ Gyisɛse nwunle kɛ bɛkpondɛ kɛ bɛkye ye bɛsie ye belemgbunli la, ɔhwenle ɔ nwo+ na ɔ ngome ɔhɔle boka ne azo bieko.+
16 Mɔɔ aleɛ dwole la, ye ɛdoavolɛma ne hɔle nyevile ne anloa,+
17 na bɛvole ɛlɛne nu kɛ bɛpɛ nyevile ne bɛahɔ Kapɛnayɛm. Ɛnee aleɛ ɛdwo noko ɛnee Gyisɛse ɛtɛbale bɛ nwo ɛkɛ.+
18 Na kɛmɔ ɛnee anwoma kpole bie ɛlɛbɔ la ati ɛnee nyevile ne ɛlɛsɛkye.+
19 Noko, mekɛ mɔɔ bɛhanle ɛlɛne ne bɛhɔle mayɛlɛ kɛyɛ nsa anzɛɛ nna la,* bɛnwunle kɛ Gyisɛse ɛlɛtia nyevile ne anye na ɔlɛbikye ɛlɛne ne, na ɛzulolɛ hanle bɛ.
20 Noko ɔzele bɛ kɛ: “Medame ɔ; bɛmmasulo!”+
21 Ɛnee akee bɛkulo kɛ ɔfo ɛlɛne ne anu na yeangyɛ biala ɛlɛne ne dwule ɛleka mɔɔ bɛlɛkɔ la.+
22 Aleɛ hyenle la, menli mɔɔ hale nyevile ne anzi lɔ la nwunle kɛ ɛlɛne biala ɛnle ɛkɛ ne kɛ ekyi ko bie ala, na Gyisɛse anvo ye ɛdoavolɛma ne ɛlɛne ne anu, emomu ɛdoavolɛma ne angome a hɔle a.
23 Noko ɛlɛne dɔɔnwo vi Taebilease rale ɛleka mɔɔ bɛlile paano ne mɔɔ Awulae yilale zo maanle bɛ la.
24 Yemɔti mekɛ mɔɔ menli ne nwunle kɛ Gyisɛse nee ye ɛdoavolɛma ne ɛnle ɛkɛ la, bɛvole bɛ ɛlɛne ne mɔ anu bɛrale Kapɛnayɛm kɛ bɛbakpondɛ Gyisɛse.
25 Mɔɔ bɛnwunle ye wɔ nyevile ne anzi lɔ la, bɛbizale ye kɛ: “Relabae,+ kenlenzu a ɛrale ɛke a?”
26 Gyisɛse buale bɛ kɛ: “Meka nɔhalɛ ne meahile bɛ, tɛ nwanwane gyima ne mɔɔ bɛnwunle ye la ati a bɛlɛkpondɛ me a, emomu paano ne mɔɔ bɛlile na bɛ ko yile la ati ɔ.+
27 Bɛmmayɛ aleɛ mɔɔ sɛkye la anwo gyima, emomu bɛyɛ aleɛ mɔɔ ɛnzɛkye na ɔmaa dahuu ngoane+ mɔɔ sonla Ra ne bava amaa bɛ la anwo gyima; na yemɔ a Selɛ ne, Nyamenle mumua ne ɛlie ye ɛdo nu a.”+
28 Ɔti bɛbizale ye kɛ: “Duzu a ɔwɔ kɛ yɛyɛ na yɛahola yɛayɛ Nyamenle gyima ne a?”
29 Gyisɛse buale bɛ kɛ: “Ɛhye a le Nyamenle gyima ne a, kɛ bɛkɛla ye ali kɛ bɛlɛ diedi wɔ ahenle mɔɔ ɔzoanle ye la anu.”+
30 Akee bɛzele ye kɛ: “Nwanwane gyima boni a ɛbayɛ wɔahile yɛ+ na yɛalie wɔ yɛali a? Gyima boni a ɛbayɛ a?
31 Yɛ nenyia mɔ lile mana wɔ fienemgbole ne anu,+ kɛ mɔɔ bɛhɛlɛ la kɛ: ‘Ɔmaanle bɛ paano mɔɔ vi anwuma la bɛlile.’”+
32 Akee Gyisɛse zele bɛ kɛ: “Meka nɔhalɛ ne meahile bɛ, Mosisi ammaa bɛ paano ne mɔɔ vi anwuma la, noko me Ze a maa bɛ nɔhalɛ paano mɔɔ vi anwuma la a.
33 Ɔluakɛ Nyamenle paano ne a le ahenle mɔɔ vi anwuma ɛra na ɔbamaa ewiade ne ngoane la.”
34 Yemɔti bɛzele ye kɛ: “Awulae, maa yɛ paano ɛhye bie dahuu.”
35 Gyisɛse zele bɛ kɛ: “Mame a mele ngoane paano ne a. Awie biala mɔɔ kɛra me nwo la ɛhɔne ɛnrɛhu ye ɛlɛ, yɛɛ awie biala mɔɔ kɛnyia diedi wɔ me nu la, nzuhɔne ɛnrɛhu ye ɛlɛ.+
36 Noko kɛ mɔɔ menganle mengilele bɛ la, bɛnwu me ɛdeɛ, noko bɛnlie bɛnli.+
37 Bɛdabɛ mɔɔ Selɛ ne ɛva bɛ ɛmaa me la kɔsɔɔti bara me nwo, na menrɛvoa awie biala mɔɔ bara me nwo la ɛlɛ;+
38 ɔluakɛ mevi anwuma mera+ kɛ mebayɛ mɔɔ zoanle me la ɛhulolɛdeɛ, na meamba kɛ mebayɛ me ɛhulolɛdeɛ.+
39 Mɔɔ zoanle me la ɛhulolɛdeɛ a le kɛ, menrɛmaa bɛdabɛ mɔɔ yeva bɛ yemaa me la bie ɛnrɛminli, emomu kɛ mendwazo+ bɛ wɔ mekɛ mɔɔ li awieleɛ la.
40 Ɔluakɛ me Ze ɛhulolɛdeɛ a le kɛ, awie biala mɔɔ kɛnwu Ralɛ ne na ɔkɛla ye ali kɛ ɔlɛ diedi wɔ ye nu la kɛnyia dahuu ngoane,+ na mebadwazo ye+ wɔ mekɛ mɔɔ li awieleɛ la.”
41 Akee Dwuuma ne bɔle ɔ bo dendɛle bɛ nzo abo ɔluakɛ ɔhanle kɛ: “Mame a mele paano ne mɔɔ vi anwuma rale la.”+
42 Na bɛbɔle ɔ bo bɛhanle kɛ: “Tɛ Gyisɛse, Dwosefi ara ne mɔɔ yɛze ye papa nee ye mame la ɛne?+ Kɛ ɔyɛ mɔɔ akee ɔka kɛ, ‘Mevi anwuma a mera ɛ’?”
43 Gyisɛse buale bɛ kɛ: “Bɛgyakyi bɛ nzo abo ɛdendɛlɛ ne.
44 Awie biala ɛnrɛhola ɛnrɛra me nwo kyesɛ Selɛ ne mɔɔ zoanle me la twe ye,+ na mebadwazo ye wɔ mekɛ mɔɔ li awieleɛ la.+
45 Ngapezoma ne hɛlɛle kɛ: ‘Gyihova* bahilehile bɛ kɔsɔɔti.’+ Awie biala mɔɔ ɛdie Selɛ ne na yezukoa debie la ba me nwo.
46 Awie biala ɛtɛnwunle Selɛ ne,+ kyesɛ mɔɔ vi Nyamenle anwo lɔ ɛra la ala; ɔdaye a yenwu Selɛ ne a.+
47 Meka nɔhalɛ ne meahile bɛ, awie biala mɔɔ die di la lɛ dahuu ngoane.+
48 “Mame a mele ngoane paano ne a.+
49 Bɛ nenyia mɔ lile mana wɔ fienemgbole ne anu, noko bɛwule.+
50 Ɛhye a le paano ne mɔɔ vi anwuma ɛra la, amaa awie biala mɔɔ kɛli bie la anwu.
51 Mame a mele ngoane paano ne mɔɔ vi anwuma rale la. Awie biala mɔɔ kɛli paano ɛhye bie la badɛnla aze dahuu; nɔhalɛ nu, paano ne mɔɔ mebava meamaa ye la a le me nwonane ne mɔɔ meva memaa amaa bɛalie ewiade ne ngoane la.”+
52 Akee Dwuuma ne bɔle ɔ bo zule nwolɛ kpolera kɛ: “Kɛ ɔkɛyɛ na nrenyia ɛhye ava ye nwonane amaa yɛali ɛ?”
53 Yemɔti Gyisɛse zele bɛ kɛ: “Meka nɔhalɛ ne meahile bɛ, saa bɛanli sonla Ra ne nwonane na bɛanno ye mogya a, bɛnrɛnyia ngoane.+
54 Awie biala mɔɔ kɛli me nwonane na ɔkɛnlo me mogya la lɛ dahuu ngoane, na mebadwazo ye+ wɔ mekɛ mɔɔ li awieleɛ la;
55 ɔluakɛ me nwonane ne le aleɛ kpalɛ yɛɛ me mogya ne le debie kpalɛ mɔɔ bɛno a.
56 Awie biala mɔɔ di me nwonane na ɔno me mogya la nee me ɛyɛ ko na medame noko me nee ye ɛyɛ ko.+
57 Kɛ mɔɔ Selɛ ne mɔɔ de aze la zoanle me na Selɛ ne ati mede aze la, zɔhane ala noko a awie biala mɔɔ kɛli me nwonane ne bie la badɛnla aze wɔ medame ti a.+
58 Paano ne mɔɔ vi anwuma rale la ɛne. Ɔnle kɛ mɔɔ bɛ nenyia mɔ lile na bɛwule la. Awie biala mɔɔ kɛli paano ɛhye bie la badɛnla aze dahuu.”+
59 Ɔhanle ɛhye mɔ wɔ mekɛ mɔɔ ɛnee ɔlɛkilehile wɔ nyianusua bie anu* wɔ Kapɛnayɛm la.
60 Mɔɔ bɛdele ɛhye la, ye ɛdoavolɛma ne dɔɔnwo hanle kɛ: “Edwɛkɛ ɛhye anloa yɛ se; nwane a kɛhola kɛdie a?”
61 Noko mɔɔ Gyisɛse nwunle kɛ ye ɛdoavolɛma ne ɛlɛtendɛ bɛ nzo abo wɔ ɛhye anwo la, ɔzele bɛ kɛ: “Edwɛkɛ ɛhye gyegye bɛ ɔ?
62 Na saa akee bɛnwu kɛ sonla Ra ne ɛlɛfo ahɔ ɛleka mɔɔ ɔvi ɔrale la ɛ?+
63 Sunsum ne a maa ngoane a;+ nwonane ne ɛngola ɛnyɛ ɛhwee. Mɔɔ meha la vi sunsum ne na ɔmaa ngoane.+
64 Noko bɛ nuhua bie mɔ ɛnlie ɛnli.” Ɔluakɛ ɛnee Gyisɛse ze bɛdabɛ mɔɔ bɛnrɛlie bɛnrɛli la nee ahenle mɔɔ baye ye amaa la wɔ mɔlebɛbo ne.+
65 Ɔdoale zo ɔhanle kɛ: “Ɛhye ati a meha mehile bɛ kɛ, awie biala ɛnrɛhola me nwo ɛkɛ ne ba kyesɛ Selɛ ne maa ye adenle la.”+
66 Ɛhye ati, ɛdoavolɛma ne dɔɔnwo ziale hɔyɛle mɔɔ ɛnee bɛyɛ ye dɛba la,+ na bɛ nee ye anlua bieko.
67 Yemɔti Gyisɛse zele Bulu Nee Nwiɔ ne kɛ: “Na bɛdabɛ noko ɛ, bɛkpondɛ kɛ bɛkɔ ɔ?”
68 Saemɔn Pita buale ye kɛ: “Awulae, nwane ɛkɛ a yɛkɔ a?+ Wɔmɔ a ɛlɛ edwɛkɛ mɔɔ maa dahuu ngoane a.+
69 Yɛlie yɛli yɛɛ yɛnwu kɛ wɔmɔ a ɛle Nwuanzanwuanzanli ne mɔɔ vi Nyamenle ɛkɛ a.”+
70 Gyisɛse buale bɛ kɛ: “Medame a memkpale bɛdabɛ bulu nee nwiɔ ne a, ɔnle zɔ ɔ?+ Noko bɛ nuhua ko le dumasɛkyevolɛ.”*+
71 Nɔhalɛ nu, ɛnee ɔlɛka Saemɔn Yesekaleɔto ara Dwudase anwo edwɛkɛ, ɔle Bulu Nee Nwiɔ ne anu ko bɔbɔ ɛdeɛ noko ɛnee ɔbaye ye yeamaa.+
