Ditilɔnomi 6:1-25
6 “Akee mɛla, adehilelɛ nee ngyehyɛleɛ mɔɔ Gyihova bɛ Nyamenle ne ɛva ɛmaa kɛ bɛva bɛhilehile bɛ, amaa bɛpɛ bɛkɔ azɛlɛ ne mɔɔ bɛkava kɛ bɛ agyapadeɛ la azo a bɛali zo,
2 amaa bɛazulo Gyihova bɛ Nyamenle ne na bɛali ye mɛla nee ye ngyehyɛleɛ kɔsɔɔti mɔɔ melɛfa meamaa bɛ la azo—bɛdabɛ nee bɛ mra yɛɛ bɛ nlɔnra+—wɔ bɛ ngoane mekɛ kɔsɔɔti anu amaa bɛadɛnla ngoane nu bɛahyɛ la ɛne.+
3 Yemɔti, O Yizilayɛma, bɛdie na bɛli zolɛ pɛpɛɛpɛ amaa yeawie bɛ boɛ na bɛ nwo azo wɔ azɛlɛ mɔɔ meleke nee wolɛ se zolɛ la azo kɛ mɔɔ Gyihova, bɛ nenyia mɔ Nyamenle ne, ɛva ɛbɔ bɛ ɛwɔkɛ la.
4 “O Yizilayɛ tie: Gyihova yɛ Nyamenle ne le Gyihova kokye.+
5 Bɛva bɛ ahonle muala nee bɛ ɛkɛla* muala+ nee bɛ anwosesebɛ muala* bɛhulo Gyihova bɛ Nyamenle ne.+
6 Ɔwɔ kɛ edwɛkɛ ɛhye mɔɔ melɛka meahile bɛ ɛnɛ la da bɛ ahonle nwo,
7 na ɔwɔ kɛ bɛfa bɛwula bɛ mra ahonle nu*+ na bɛka nwolɛ edwɛkɛ wɔ mekɛ mɔɔ bɛde bɛ azua nu anzɛɛ bɛlua adenle zo anzɛɛ bɛla anzɛɛ bɛdwazo la.+
8 Bɛva bɛyɛ ngakyedeɛ bɛkyekye bɛ sa, na bɛva bɛyɛ abotile bɛbɔ bɛ nwoma azo.*+
9 Bɛhɛlɛ bɛ wɔ bɛ nlenkɛ felɛmo ne mɔ nee bɛ nlenkɛ mgbole ne mɔ anwo.
10 “Saa Gyihova bɛ Nyamenle ne fa bɛ ba azɛlɛ ne mɔɔ ɔhanle nwolɛ ndane ɔhilele bɛ nenyia mɔ, Ebileham, Ayezeke yɛɛ Gyekɔbo kɛ ɔbava yeamaa bɛ la azo+—azuamgbole ngɛnlɛma mɔɔ tɛ bɛdabɛ a bɛkyekyele,+
11 azua mɔɔ ninyɛne mgbalɛ kɔsɔɔti ɛyi bɛ tɛkɛɛ mɔɔ tɛ bɛdabɛ a bɛyɛle nwolɛ gyima, bula mɔɔ tɛ bɛdabɛ a bɛdule, yɛɛ vanye egyinli nee ɔlivi mbaka mɔɔ tɛ bɛdabɛ a bɛluale—na bɛdi aleɛ na bɛ ko yi a,+
12 bɛnlea boɛ na bɛ rɛle anvi Gyihova+ mɔɔ yele bɛ vile Yigyibiti azɛlɛ zo, wɔ akɛlɛzonlenlɛ sua nu la.
13 Ɔwɔ kɛ bɛsulo Gyihova bɛ Nyamenle ne+ na bɛsonle ye,+ yɛɛ ye duma a ɔwɔ kɛ bɛfa bɛka ndane a.+
14 Ɔnle kɛ bɛdi nyamenle gyɛne nzi, menli mɔɔ ɛbɛnga bɛ ɛyia la nyamenle biala anzi,+
15 ɔluakɛ Gyihova bɛ Nyamenle ne mɔɔ wɔ bɛ avinli la le Nyamenle mɔɔ ɔkulo kɛ bɛsonle ɔ ngomekye.+ Saa bɛanyɛ ye zɔhane a, Gyihova bɛ Nyamenle ne bava bɛ nwo ɛya+ na yeabɔ bɛ bo zo yeavi azɛlɛ ye azo.+
16 “Ɔnle kɛ bɛsɔ Gyihova bɛ Nyamenle ne bɛnea+ kɛ mɔɔ bɛzɔle ye bɛnleanle wɔ Masaa la.+
17 Ɔwɔ kɛ bɛbɔ mɔdenle bɛdi Gyihova bɛ Nyamenle ne mɛla ne mɔ nee ye ngakyelɛ yɛɛ ye adehilelɛ ne mɔ mɔɔ yeva yemaa bɛ kɛ bɛli zo la azo.
18 Ɔwɔ kɛ bɛyɛ mɔɔ tenrɛ na ɔle kpalɛ wɔ Gyihova anye zo la amaa yeawie bɛ boɛ na bɛahɔva azɛlɛ kpalɛ ne mɔɔ Gyihova hanle nwolɛ ndane hilele bɛ nenyia mɔ kɛ bɛbava bɛayɛ bɛ agyapadeɛ la,+
19 na bɛavoa bɛ agbɔvolɛ kɔsɔɔti bɛavi zolɛ kɛ mɔɔ Gyihova ɛbɔ nwolɛ ɛwɔkɛ la.+
20 “Saa kenle bie bɛ mra biza bɛ kɛ, ‘Ngakyelɛ ne mɔ, mɛla ne mɔ yɛɛ ngyehyɛleɛ ne mɔ mɔɔ Gyihova yɛ Nyamenle ne vale maanle bɛ la abo kile duzu?’ a,
21 akee bɛbaha bɛahile bɛ mra ne mɔ kɛ, ‘Yɛyɛle ngɛkɛlɛ yɛmaanle Falo wɔ Yigyibiti, noko Gyihova vale ɛsalɛ mɔɔ tumi wɔ nu la liele yɛ vile Yigyibiti.
22 Yemɔti Gyihova vale sɛkɛlɛneɛ nee nwanwane ninyɛne mgbole mɔɔ yɛ ɛzulolɛ la rale Yigyibiti,+ Falo nee ye sua nu amra amuala anwo zo ɔmaanle yɛnwunle ye yɛ nye zo.+
23 Na ɔyele yɛ ɔvile ɛkɛ amaa yeava yɛ yeara ɛke na yeava azɛlɛ ne mɔɔ ɔhanle nwolɛ ndane ɔhilele yɛ nenyia mɔ la yeamaa yɛ.+
24 Akee Gyihova hanle kɛ yɛli adehilelɛ ɛhye mɔ amuala azo na yɛzulo Gyihova yɛ Nyamenle ne wɔ yɛ dahuu boɛyɛlɛ ti,+ amaa yɛahola yɛahɔ zo yɛadɛnla ngoane nu+ kɛ mɔɔ yɛde ngoane nu ɛnɛ la.
25 Na saa yɛnea yɛdi mɛla ɛhye mɔ amuala azo kpalɛ yɛfa yɛyɛ tieyɛ yɛmaa Gyihova yɛ Nyamenle ne* kɛ mɔɔ ɔse yɛyɛ la a, bɛbabu yɛ tenlenema.’+
Ɔbodwɛkɛ
^ Nea Edwɛkɛbohilelɛ.
^ Anzɛɛ “mɔɔ bɛlɛ la amuala.”
^ Anzɛɛ “bɛsi zo bɛkile bɛ mra; bɛfa bɛbeta bɛ mra ahonle zo.”
^ Hibulu aneɛ nu, “bɛ nye avinli.”
^ Hibulu aneɛ nu, “wɔ yɛ Nyamenle ne anyunlu.”
