Ditilɔnomi 4:1-49
4 “O Yizilayɛ, akee bɛdie mɛla nee ngyehyɛleɛ mɔɔ melɛkilehile bɛ la na bɛli zo, amaa bɛadɛnla ngoane nu+ na bɛahɔva azɛlɛ ne mɔɔ Gyihova, bɛ nenyia mɔ Nyamenle ne ɛlɛfa amaa bɛ la.
2 Bɛmmafa edwɛkɛ kpɔkɛ ko bɔbɔ bɛboka mɔɔ melɛfa meamaa bɛ la anwo yɛɛ bɛmmaye bie bɛfi nu,+ amaa bɛali Gyihova bɛ Nyamenle ne mɛla ne mɔɔ melɛfa meamaa bɛ la azo.
3 “Bɛdabɛ bɛvale bɛ nye bɛnwunle mɔɔ Gyihova yɛle wɔ Beeyale mɔɔ wɔ Piyɔ edwɛkɛ ne anwo la; Gyihova bɛ Nyamenle ne zɛkyele awie biala mɔɔ wɔ bɛ avinli mɔɔ hɔzonlenle Beeyale mɔɔ wɔ Piyɔ la.+
4 Noko bɛdabɛ mɔɔ bɛbetanle Gyihova bɛ Nyamenle ne anwo la, bɛmɛ a bɛtɛte ngoane nu ɛnɛ a.
5 Bɛnlea, mehilehile bɛ mɛla nee ngyehyɛleɛ+ ne mɔ kɛ mɔɔ Gyihova me Nyamenle ne hanle hilele me la, amaa bɛali zo wɔ azɛlɛ ne mɔɔ bɛbava la azo.
6 Bɛnlea boɛ na bɛli zo,+ ɔluakɛ ɔbamaa menli mɔɔ bade mɛla ɛhye mɔ anwo edwɛkɛ la anwu kɛ bɛle menli mɔɔ ze nrɛlɛbɛ+ na bɛlɛ ndelebɛbo+ a, na bɛbaha kɛ, ‘Amgba, maanle kpole ɛhye anu amra ze nrɛlɛbɛ yɛɛ bɛlɛ ndelebɛbo.’+
7 Ɔluakɛ maanle kpole boni a lɛ nyamenle mɔɔ bikye ye kɛ mɔɔ Gyihova yɛ Nyamenle ne bikye yɛ wɔ mekɛ biala mɔɔ yɛkɛvɛlɛ ye la ɛ?+
8 Na maanle kpole boni a lɛ mɛla nee ngyehyɛleɛ mɔɔ tenrɛ kɛ Mɛla ɛhye amuala mɔɔ melɛfa meamaa bɛ ɛnɛ la ɛ?+
9 “Bɛnlea boɛ na bɛmaa bɛ nye ɛrɛla bɛ nwo zo,* amaa bɛ rɛle anvi ninyɛne mɔɔ bɛnwu ye la na yeanvi bɛ ahonle nu wɔ bɛ ngoane mekɛ kɔsɔɔti anu. Eza ɔwɔ kɛ bɛfa bɛkilehile bɛ mra nee bɛ nlɔnra.+
10 Kenle mɔɔ bɛhɔgyinlanle Gyihova bɛ Nyamenle ne anyunlu wɔ Hɔlɛbe la, Gyihova zele me kɛ, ‘Boɔboa menli ne anloa maa me maa bɛdie me edwɛkɛ,+ amaa bɛazulo me+ wɔ mekɛ kɔsɔɔti mɔɔ bɛde azɛlɛ ye azo la na bɛava bɛahilehile bɛ mra.’+
11 “Yemɔti bɛragyinlanle boka ne abo, na boka ne zɔle hɔle anwuma kpalɛ;* na ɛkɛ ne amuala yɛle awozinli nee amungu kabikabi.+
12 Na Gyihova dendɛle hilele bɛ wɔ senle ne anu.+ Bɛdele edwɛkɛ ne noko bɛannwu awie biala+—ɛnelɛ ala a bɛdele a.+
13 Na ɔhanle ye ngyekyeleɛ ne ɔhilele bɛ,+ mɔɔ le Mɛla Bulu ne,*+ na ɔhanle kɛ bɛli zo. Akee ɔhɛlɛle ye wɔ awolɛ ndɛbandɛba nwiɔ azo.+
14 Mekɛ zɔhane Gyihova hanle hilele me kɛ mengilehile bɛ mɛla nee ngyehyɛleɛ mɔɔ bɛbali zo wɔ azɛlɛ ne mɔɔ bɛlɛkɔ bɛahɔva la azo la.
15 “Kenle mɔɔ Gyihova nee bɛ dendɛle wɔ senle ne anu wɔ Hɔlɛbe la, bɛannwu awie biala. Ɛhye ati bɛnlea bɛ nwo boɛ kpalɛ,
16 na bɛanzɛkye bɛ ɛbɛla bɛangɔze ananze mɔɔ le debie ɛsaso la, debie mɔɔ zɔho nrenyia anzɛɛ raalɛ,+
17 debie mɔɔ zɔho azɛlɛ ye azo nane anzɛɛ aloma biala mɔɔ tu dua anwomanyunlu,+
18 debie biala mɔɔ zɔho nane mɔɔ twenle ɔ nwo aze anzɛɛ debie mɔɔ zɔho fɛlɛ biala mɔɔ wɔ azule nu wɔ azɛlɛ ye azo la.+
19 Na saa bɛmaa bɛ nye zo anwuma na bɛnwu sɛnzɛne ne nee siane ne yɛɛ nwɔlɔra ne mɔ a—anwuma ɛlɔne ne amuala—bɛmmamaa bɛbɛlɛbɛla bɛ na bɛbɔ bɛ ti aze bɛsonle bɛ.+ Gyihova bɛ Nyamenle ne ɛva ɛmaa menli kɔsɔɔti mɔɔ wɔ azɛlɛ ye azo la.
20 Noko bɛmɛ a bɛle menli mɔɔ Gyihova yele bɛ vile fonlomo ne mɔɔ bɛkolo bulalɛ wɔ nu, mɔɔ le Yigyibiti la anu, kɛ ɔfa bɛ yeayɛ ye agyapadeɛ+ kɛ mɔɔ bɛde ye ɛnɛ la a.
21 “Bɛdabɛ ti+ Gyihova vale me nwo ɛya na ɔhanle ndane kɛ menrɛpɛ Dwɔdan ne anzɛɛ menrɛhɔ azɛlɛ kpalɛ ne mɔɔ Gyihova bɛ Nyamenle ne ɛlɛfa amaa bɛ kɛ agyapadeɛ la azo.+
22 Ɔluakɛ mebawu azɛlɛ ɛhye azo; menrɛpɛ Dwɔdan ne,+ noko bɛmɛ bɛbapɛ na bɛahɔva azɛlɛ kpalɛ ne.
23 Bɛnlea boɛ na bɛ rɛle anvi ngyekyeleɛ mɔɔ Gyihova bɛ Nyamenle ne nee bɛ yɛle la,+ yɛɛ bɛmmase ananze mɔɔ zɔho debie biala mɔɔ Gyihova bɛ Nyamenle ne ɛdua bɛ la.+
24 Ɔluakɛ Gyihova bɛ Nyamenle ne le sendɔlɔra,+ ɔle Nyamenle mɔɔ ɔkulo kɛ bɛsonle ɔ ngomekye.+
25 “Saa bɛwo mralɛ na bɛnyia nlɔnra na bɛtɛnla azɛlɛ ne azo bɛkyɛ na bɛsɛkye bɛ ɛbɛla bɛkɔse ananze+ biala na bɛyɛ mɔɔ le ɛtane wɔ Gyihova bɛ Nyamenle ne anye zo bɛfa bɛka ye ɛya a,+
26 memaa anwuma nee aze* ali me daselɛ ɛnɛ kɛ, kɛ ɔde ye biala la bɛbabɔ bɛ bo zo ndɛndɛ bɛavi azɛlɛ ne mɔɔ bɛlɛpɛ Dwɔdan ne bɛahɔva la azo. Bɛnrɛhyɛ wɔ zolɛ, emomu bɛbazɛkye bɛ bɔkɔɔ.+
27 Gyihova babɔ bɛ asande wɔ maanle maanle ne mɔ avinli,+ na bɛ nuhua ekyi bie ala a baha+ wɔ maanle maanle mɔɔ Gyihova bavoa bɛ ahɔ nu la anu a.
28 Na bɛbazonle nyamenle mɔɔ menli ɛva mbaka nee awolɛ ɛyɛ la,+ nyamenle mɔɔ bɛnnwu debie, bɛnde edwɛkɛ anzɛɛ bɛnde nvoanle la.
29 “Saa bɛkpondɛ Gyihova bɛ Nyamenle ne wɔ ɛkɛ, saa bɛfa bɛ ahonle nee bɛ ɛkɛla* muala bɛbiza ɔ bo zo a, bɛbanwu ye.+
30 Saa nzinlii ninyɛne ɛhye mɔ amuala to bɛ na bɛlɛdi nyane kpole a, akee bɛbazia bɛara Gyihova bɛ Nyamenle ne ɛkɛ na bɛadie ɔ ne.+
31 Ɔluakɛ Gyihova bɛ Nyamenle ne le anwunvɔnezelɛ Nyamenle.+ Ɔnrɛkpo bɛ yɛɛ ɔnrɛzɛkye bɛ anzɛɛ ɔ rɛle ɛnrɛvi ngyekyeleɛ mɔɔ ɔhanle nwolɛ ndane ɔhilele bɛ nenyia mɔ la.+
32 “Akee bɛhakye dɛba ne na bɛbiza ɔvi kenle mɔɔ Nyamenle bɔle sonla dole azɛlɛ ye azo la; bɛnleɛnlea bɛvi anwuma ti bɛhɔdwu ɔ bo. Asoo debie kpole bie ɛzi anzɛɛ bɛde debie zɛhae bie ɛlɛ?+
33 Asoo menli bie ɛde Nyamenle ane kɛ ɔlɛtendɛ wɔ senle nu kɛ mɔɔ bɛdele na bɛtɛte ngoane nu la?+
34 Anzɛɛ asoo Nyamenle ɛbɔ mɔdenle kɛ ɔdua ndɛnebualɛ,* sɛkɛlɛneɛ, nwanwane gyima,+ konle,+ ɛsalɛ mɔɔ tumi wɔ nu,+ ɛsalɛ mɔɔ bɛdende nee nyɛleɛ mgbole+ zo yeaye maanle bie yeavi maanle gyɛne anu kɛ mɔɔ Gyihova bɛ Nyamenle ne yɛle maanle bɛ wɔ Yigyibiti wɔ bɛdabɛ bɛ nye zo la ɔ?
35 Bɛyɛle ninyɛne ɛhye mɔ bɛhilele bɛ amaa bɛanwu kɛ Gyihova a le nɔhalɛ Nyamenle ne a;+ ɛye ye a bieko ɛnle ɛkɛ.+
36 Ɔmaanle bɛdele ɔ ne wɔ anwuma lɔ na ɔdenrɛle bɛ, yɛɛ ɔmaanle bɛnwunle ye senle kpole ne wɔ azɛlɛ ye azo, na bɛdele ye edwɛkɛ ne wɔ senle ne anu.+
37 “Kɛmɔ ɛnee ɔkulo bɛ nenyia mɔ na yekpa bɛ bo zo amra la ati,+ ɔvale ye tumi kpole ne ɔyele bɛ ɔvile Yigyibiti wɔ mekɛ mɔɔ ɔ nye wɔ bɛ nwo la.
38 Ɔvoanle maanle mgbole mɔɔ bɛ nwo yɛ se tɛla bɛ la ɔvile bɛ nyunlu, na ɔ nee bɛ rale kɛ ɔfa bɛ azɛlɛ ne yeamaa bɛ kɛ agyapadeɛ kɛ mɔɔ ɔde ye ɛnɛ la.+
39 Ɛhye ati bɛnwu ye ɛnɛ kenle ye na bɛva bɛzie bɛ ahonle nu kɛ Gyihova a le nɔhalɛ Nyamenle wɔ anwuma lɔ nee azɛlɛ ye azo a.+ Bieko ɛnle ɛkɛ.+
40 Bɛli ye mɛla nee ye ngyehyɛleɛ mɔɔ melɛfa meamaa bɛ ɛnɛ la azo, amaa yeawie bɛdabɛ nee bɛ bo zo amra boɛ na bɛahyɛ wɔ azɛlɛ ne mɔɔ Gyihova bɛ Nyamenle ne ɛlɛfa amaa bɛ la azo.”+
41 Mekɛ zɔhane Mosisi yele azuamgbole nsa ziele ɛkɛ wɔ Dwɔdan ne aduduleɛ.+
42 Saa awie anye ɛnla nwo na ɔku ɔ gɔnwo mɔɔ ɔmkpɔ ye dɛba la a,+ ɔwɔ kɛ ɔnriandi ɔkɔ azuamgbole ɛhye mɔ ko azo na ɔnyia ngoane.+
43 Azuamgbole ɛhye mɔ a le Bizɛ+ mɔɔ wɔ fienemgbole ne anu boka azo sɛsɛ ne azo la, ɔle Wulubɛnema ɛdeɛ, Releemɔto+ mɔɔ wɔ Geleade, ɔle Gaadema ɛdeɛ, yɛɛ Golan+ mɔɔ wɔ Beehyan, ɔle Manasɛma+ ɛdeɛ.
44 Mɛla+ mɔɔ Mosisi vale maanle Yizilayɛma la ɛne.
45 Ɛhye mɔ a le ngakyelɛ, mɛla nee ngyehyɛleɛ ne mɔ mɔɔ Mosisi vale maanle Yizilayɛma wɔ mekɛ mɔɔ bɛvile Yigyibiti,+
46 na bɛwɔ Dwɔdan maanzinli nu, wɔ bɔnza ne mɔɔ nee Bɛte-piyɔ+ anye bɔ zo la anu, wɔ Amɔlema Belemgbunli Saehɔn mɔɔ ɛnee de Hɛhyebɔn+ mɔɔ Mosisi nee Yizilayɛma lile ɔ nwo zo konim wɔ mekɛ mɔɔ bɛvi Yigyibiti bɛlɛba la azɛlɛ zo a.+
47 Na bɛvale ɔdaye nee Beehyan Belemgbunli Ɔɔgo,+ Amɔlema arelemgbunli nwiɔ ne mɔɔ ɛnee wɔ Dwɔdan aduduleɛ maanzinli nu la azɛlɛ ne amuala,
48 ɔvi Alowɛ+ mɔɔ wɔ Anɔn Bɔnza* ne anloa la kɔdwu Sayɔn Boka ne, mɔɔ le Hɛmɔn,+
49 nee Alaba ne mɔɔ wɔ Dwɔdan aduduleɛ maanzinli nu la amuala, too kɔdwu Alaba Nyevile ne* mɔɔ wɔ Pesega ndololeɛ nu la azo.+
Ɔbodwɛkɛ
^ Anzɛɛ “bɛyɛ bɛ nye gyɛlɛmgbɛɛnye.”
^ Hibulu aneɛ nu, “hɔle anwuma ne ahonle nwo.”
^ Hibulu aneɛ nu, “Edwɛkɛ Bulu ne.”
^ Anzɛɛ “azɛlɛ ne.”
^ Nea Edwɛkɛbohilelɛ.
^ Anzɛɛ “sɔnea.”
^ Anzɛɛ “Azudenle.”
^ Ɛhye kile, Ngyenle Nyevile ne, anzɛɛ Nyevile Wulera ne.
