Samoɛle Mɔɔ Limoa 18:1-30
18 Mɔɔ Devidi nee Sɔɔlo dendɛle wiele ala la, Dwɔnatan+ nee Devidi yɛle agɔnwolɛ kyengye,* na Dwɔnatan hulole ye kɛ ɔdaye ɔ nwo* la.+
2 Ɔvi kenle zɔhane, Sɔɔlo maanle Devidi hale ɔ nwo ɛkɛ, na yeammaa yeanzia yeangɔ ye papa sua nu.+
3 Na Dwɔnatan nee Devidi yɛle ngyekyeleɛ,+ ɔluakɛ ɛnee ɔkulo ye kɛ ɔdaye ɔ nwo* la.+
4 Dwɔnatan yele ye tɛladeɛ ne mɔɔ ɛnlɛ ɔ sa mɔɔ ɛnee ɔwula la ɔmaanle Devidi, eza ɔvale ye konle tɛladeɛ, ye konle dadeɛ, ye ɛda yɛɛ ye bɛlɛte ɔmaanle ye.
5 Devidi bɔle ɔ bo hɔle konle na ɛleka biala mɔɔ Sɔɔlo zoanle ye la, ɔlile konim.*+ Ɔti Sɔɔlo maanle ɔlile kovolɛma ne ati,+ na ɛhye zɔle menli ne kɔsɔɔti nee Sɔɔlo sonvolɛma ne anye.
6 Saa Devidi nee awie mɔ kɔku Filisitiama na bɛlɛsia bɛara a, mraalɛ mɔɔ wɔ Yizilayɛ azua ne mɔ kɔsɔɔti azo la fa edwɛne+ nee agolezilɛ, akɛya,+ fɛlɛkolilɛ yɛɛ luutu finde bayia Belemgbunli Sɔɔlo.
7 Mraalɛ ne mɔ mɔɔ ɛlɛdi fɛlɛko la to edwɛne kɛ:
“Sɔɔlo ɛhu apenle apenle,Na Devidi ɛhu apenle apenle bulu bulu.”+
8 Sɔɔlo vale ɛya kpole,+ na ɔ nye anlie edwɛne ne anwo, ɔluakɛ ɔhanle kɛ: “Bɛva apenle apenle bulu bulu bɛmaa Devidi, na bɛva apenle apenle bɛmaa me. Debie mɔɔ ɛha mɔɔ bɛbava bɛamaa ye la a le belemgbunlililɛ ne!”+
9 Ɔvi kenle zɔhane, Sɔɔlo nyianle Devidi anwo adwenle ɛtane na ɔdule ɔ nye ɔziele ɔ nwo.
10 Aleɛ hyenle la, Nyamenle maanle sunsum ɛtane bie rale Sɔɔlo anwo zo,+ na ɔbɔle ɔ bo ɔyɛle ninyɛne ngakyile bie* wɔ sua nu ɛkɛ wɔ mekɛ mɔɔ Devidi ɛlɛbɔ haape ne+ kɛ mɔɔ ɔta ɔyɛ la. Ɛnee Sɔɔlo lɛ atwɛ ɔ sa nu,+
11 na ɔdole atwɛ ne+ na ɔhanle ye ɔ ti anu kɛ: ‘Mebɛtɛ Devidi wɔ bane ne anwo!’ Noko Devidi nriandile vile ɔ nyunlu fane nwiɔ.
12 Akee Sɔɔlo zulole Devidi ɔluakɛ ɛnee Gyihova nee ye lua,+ noko ɛnee yehwe ɔ nwo yevi Sɔɔlo anwo.+
13 Yemɔti Sɔɔlo yele ye vile ɔ nyunlu na ɔyɛle ye kpanyinli mɔɔ nea menli apenle nwo zo, na ɛnee Devidi di ɛlɔne ne anyunlu kɔ konle.*+
14 Devidi hɔle zo lile konim*+ wɔ debie biala mɔɔ ɔyɛle la anu, na ɛnee Gyihova nee ye lua.+
15 Na mɔɔ Sɔɔlo nwunle kɛ ɔlɛdi konim wɔ debie biala anu la, ɔzulole ye.
16 Noko Yizilayɛma nee Dwudama kɔsɔɔti hulole Devidi, ɔluakɛ ɛnee ɔdi bɛ nyunlu ɔmaa bɛkɔ konle.
17 Nzinlii Sɔɔlo zele Devidi kɛ: “Me ra raalɛ kpanyinli Milabe ɛne.+ Mebava ye meamaa wɔagya ye.+ Noko ɔwɔ kɛ ɛkɔ zo ɛda wɔ akɛnrasesebɛ ne ali ɛkile me na ɛko Gyihova konle ne mɔ.”+ Ɔluakɛ Sɔɔlo hanle ye ɔ ti anu kɛ: ‘Menrɛva me sa menrɛha ye. Maa Filisitiama ɛva bɛ sa ɛhu ye.’+
18 Na Devidi zele Sɔɔlo kɛ: “Ɛnee mame bɔbɔ a le nwane yɛɛ me mbusuafoɔ, me papa abusua ne mɔɔ wɔ Yizilayɛ la a le nwane mɔ, na meayɛ belemgbunli ase ɛ?”+
19 Noko mɔɔ mekɛ dwule kɛ bɛfa Sɔɔlo ara raalɛ Milabe bɛmaa Devidi la, ɛnee bɛva ye bɛmaa Mɛhɔlatenli Edeleɛle+ ɛgya ye dɛbadɛba.
20 Ɛnee Sɔɔlo ara raalɛ Maekale+ kulo Devidi, na mɔɔ bɛhanle bɛhilele Sɔɔlo la, ɔ nye liele nwolɛ.
21 Ɔti Sɔɔlo hanle kɛ: “Mebava ye meamaa ye na yeazua ye ɛhane, amaa Filisitiama asa aha ye.”+ Akee Sɔɔlo zele Devidi bieko kɛ: “Ɛ nee me bayɛ agyalɛ ngyehyɛleɛ* ɛnɛ.”
22 Eza Sɔɔlo hanle hilele ye azonvolɛ ne mɔ kɛ: “Bɛdendɛ bɛhile Devidi fealeranu na bɛha kɛ, ‘Nea! Belemgbunli ne anye die ɛ nwo, yɛɛ ye sonvolɛma kɔsɔɔti kulo wɔ edwɛkɛ. Yemɔti ɛ nee belemgbunli ne ɛyɛ agyalɛ ngyehyɛleɛ.’”
23 Mɔɔ Sɔɔlo azonvolɛ ne mɔ hanle edwɛkɛ ɛhye hilele Devidi la, Devidi hanle kɛ: “Asoo bɛnea a ɔle debie ekyi kɛ medame ehyianli mɔɔ bɛmbu me bie la me nee belemgbunli kɛyɛ agyalɛ ngyehyɛleɛ ɔ?”+
24 Na Sɔɔlo azonvolɛ ne mɔ zele ye kɛ: “Edwɛkɛ mɔɔ Devidi ɛha la ɛne.”
25 Na Sɔɔlo hanle kɛ: “Bɛhɔha bɛhile Devidi kɛ, ‘Belemgbunli ɛmkpondɛ asoa biala+ kɛ Filisitiama 100 mrenyianu ati nwoma,+ ɔva ɔli belemgbunli kpɔvolɛma nzenralɛ.’” Ɛnee Sɔɔlo ɛnyia adwenle kɛ ɔmaa Devidi awu Filisitiama asa anu.
26 Ɔti ye azonvolɛ ne mɔ hɔhanle edwɛkɛ ɛhye hilele Devidi, na Devidi anye liele nwolɛ kɛ ɔ nee belemgbunli ne bayɛ agyalɛ ngyehyɛleɛ.+ Kolaa na mekɛ ne adwu la,
27 Devidi nee ye menli ne hɔhunle Filisitiama 200, na Devidi vale bɛ mrenyianu ati nwoma ne mɔ amuala rɛlɛle belemgbunli ne amaa ɔ nee belemgbunli ne ayɛ agyalɛ ngyehyɛleɛ. Ɛhye ati, Sɔɔlo vale ɔ ra raalɛ Maekale maanle ɔgyale ye.+
28 Sɔɔlo nwunle kɛ Gyihova nee Devidi lua,+ yɛɛ ɔ ra raalɛ Maekale noko kulo ye.+
29 Ɛhye maanle Sɔɔlo zulole Devidi kpole, na Sɔɔlo yɛle Devidi kpɔvolɛ wɔ ye ngoane mekɛ kɔsɔɔti anu.+
30 Ɛnee Filisitia mgbanyima ta kɔ konle, noko mekɛ biala mɔɔ bɛkɛhɔ la, Devidi di bɛ nwo zo konim dɔɔnwo* tɛla Sɔɔlo azonvolɛ kɔsɔɔti;+ na bɛlile ye duma ne eni kpole.+
Ɔbodwɛkɛ
^ Anzɛɛ “ɔdaye ye ɛkɛla.”
^ Anzɛɛ “Dwɔnatan nee Devidi ɛkɛla rabetale bɛ nwo.”
^ Anzɛɛ “ɔdaye ye ɛkɛla.”
^ Anzɛɛ “ɔyɛle ye ninyɛne nrɛlɛbɛ nu.”
^ Anzɛɛ “ɔyɛle ye ninyɛne kɛ ngapezonli la.”
^ Hibulu aneɛ nu, “na ɛnee ɔdi menli ne anyunlu ɔ nee bɛ kɔ na ɔ nee bɛ ba.”
^ Anzɛɛ “hɔle zo yɛle ye ninyɛne nrɛlɛbɛ nu.”
^ Anzɛɛ “Ɛbayɛ me ase.”
^ Anzɛɛ “Devidi yɛ ye ninyɛne nrɛlɛbɛ nu kpalɛ.”
