Samoɛle Mɔɔ Limoa 11:1-15
11 Akee Amɔnonli+ Neehahye rayɛle azokoɛleɛ kɛ ɔ nee Gyeebɛhye+ mɔɔ wɔ Geleade la baho. Gyeebɛhyema kɔsɔɔti zele Neehahye kɛ: “Ɛ nee yɛ ɛyɛ ngyekyeleɛ,* na yɛbazonle wɔ.”
2 Amɔnonli Neehahye zele bɛ kɛ: “Debie mɔɔ mebagyinla zo me nee bɛ ayɛ ngyekyeleɛ ne la ɛne: mebadudu bɛ nye fema ne kɔsɔɔti. Mebayɛ ɛhye meava meagua Yizilayɛma kɔsɔɔti anyunlu aze.”
3 Gyeebɛhye mgbanyima buale ye kɛ: “Maa yɛ kenle nsuu maa yɛzoa menli wɔ Yizilayɛ azɛlɛ ne kɔsɔɔti azo. Na saa yɛannyia awie mɔɔ balie yɛ a, yɛbava yɛ nwo yɛamaa wɔ.”
4 Nzinlii soanvolɛma ne rale Sɔɔlo sua zo Gebeya+ na bɛhanle edwɛkɛ ɛhye bɛhilele menli ne, na menli ne amuala zunle kpole kpalɛ.
5 Noko ɛnee Sɔɔlo vi ɛya nu lɔ ɛlɛba na ɔli ye nlankɛ ne mɔ anzi, na Sɔɔlo bizale kɛ: “Duzu a ɛlɛgyegye menli ne a? Duzu ati a bɛlɛsu a?” Ɔti bɛhanle Gyeebɛhyema edwɛkɛ ne bɛhilele ye.
6 Mɔɔ Sɔɔlo dele edwɛkɛ ɛhye la, Nyamenle sunsum ne rale ɔ nwo zo+ na ɔvale ɛya kpole.
7 Yemɔti ɔvale nlankɛ nyinli nwiɔ na ɔpepɛle nu azinli azinli, na ɔvale ɔmaanle soanvolɛma ne hɔle Yizilayɛ azɛlɛ ne kɔsɔɔti azo na bɛhanle kɛ: “Awie biala mɔɔ andoa Sɔɔlo nee Samoɛle la ɔwɔ kɛ nwu kɛ zɔhane a bɛbayɛ ye nlankɛ ne mɔ a!” Na Gyihova anwo ɛzulolɛ dɔle menli ne anwo zo, ɔti bɛnyianle adwenle ko na bɛrale.*
8 Akee ɔdianle bɛ wɔ Bizɛke, na ɛnee Yizilayɛma le 300,000 yɛɛ Dwudama le 30,000.
9 Akee bɛzele soanvolɛma ne kɛ: “Bɛha bɛhile mrenyia mɔɔ wɔ Gyeebɛhye mɔɔ wɔ Geleade la kɛ, ‘Ɛhyema sɛnzɛngyinla, bɛbalie bɛ.’” Ɔti menli mɔɔ bɛzoanle bɛ la rahanle hilele Gyeebɛhyema, na bɛ nye liele kpole.
10 Yemɔti Gyeebɛhyema hanle kɛ: “Ɛhyema yɛbava yɛ nwo yɛamaa wɔ, na wɔava debie biala mɔɔ ɛnea a ɔle kpalɛ ɔmaa wɔ la wɔayɛ yɛ.”+
11 Aleɛ hyenle la, Sɔɔlo hyɛle menli ne anu ekpunli nsa, na bɛhɔle Amɔnoma azokoɛleɛ ne avinli lɔ wɔ nwonlomɔ ɛzinzalɛ mekɛ* ne anu, na bɛhunle Amɔnoma+ too ɔhɔkpulale sɛnzɛngyinla. Bɛdabɛ mɔɔ bɛhale la bɔle asande, yemɔti yeanga bɛ nuhua nwiɔ bɔbɔ wɔ ɛleka ko.
12 Akee menli ne bizale Samoɛle kɛ: “Nwane mɔ a hanle kɛ, ‘Ɔwɔ kɛ Sɔɔlo yɛ yɛ belemgbunli ɔ?’ la.+ Bɛva bɛ bɛrɛla bɛmaa yɛhu bɛ.”
13 Noko Sɔɔlo hanle kɛ: “Ɔnle kɛ bɛku awie biala ɛnɛ kenle ye,+ ɔluakɛ ɛnɛ Gyihova ɛlie Yizilayɛ.”
14 Nzinlii Samoɛle zele menli ne kɛ: “Bɛrɛla bɛmaa yɛhɔ Gelegale+ yɛhɔzi zolɛ bieko kɛ Sɔɔlo a le belemgbunli ne a.”+
15 Ɔti menli ne amuala hɔle Gelegale, na bɛziele Sɔɔlo belemgbunli wɔ Gelegale wɔ Gyihova anyunlu. Akee bɛbɔle anzodwolɛ afɔle wɔ ɛkɛ wɔ Gyihova anyunlu,+ na Sɔɔlo nee Yizilayɛma kɔsɔɔti lile fɛlɛko kpole.+
Ɔbodwɛkɛ
^ Anzɛɛ “ngyehyɛleɛ.”
^ Hibulu aneɛ nu, “bɛrale kɛ sonla ko.”
^ Ɛhye kile, kɛyɛ aleɛbahye 2:00 kɔdwu nwonlomɔ 6:00.
