Edwɛkɛsisilɛ Mɔɔ Limoa 5:1-26
5 Yizilayɛ belamunli ralɛ Wulubɛn+ amra ne mɔ ɛne. Ɔdaye a ɔle belamunli ralɛ a, noko kɛmɔ ɔguale ye papa ɛkpa nwo evinli+ la ati, bɛvale ye awolɛ kpanyinli gyinlabelɛ ne bɛmaanle Yizilayɛ ara Dwosefi+ amra ne mɔ, ɔti bɛangɛlɛ ye duma wɔ abusua ne kɛlɛtokɛ nu kɛ ɔle awolɛ kpanyinli.
2 Dwuda+ yɛle kpole dɛlale ɔ mediema ne mɔ yɛɛ ye nuhua a ɛnee adekilevolɛ ne vi bara a,+ noko bɛvale awolɛ kpanyinli gyinlabelɛ ne bɛmaanle Dwosefi.
3 Yizilayɛ belamunli ralɛ Wulubɛn amra a le Heenɔko, Palu, Hɛzelɔn yɛɛ Kaamae.+
4 Dwowɛle ara* a le Hyɛmaya, na ɔ ra a le Gɔgo, na ɔ ra a le Hyemɛyae,
5 na ɔ ra a le Maeka, na ɔ ra a le Riliaya, na ɔ ra a le Beeyale,
6 na ɔ ra a le Biyɛlaa, mɔɔ Aselea Belemgbunli Tegelate-paelinesɛ+ vale ye hɔle akɛlɛzonlenlɛ nu la; ɛnee ɔle Wulubɛnema abusua kpanyinli.
7 Ɔ mediema ne mɔ mbusua mɔɔ bɛhɛlɛle bɛ aluma la abozoamra ɛne, na ɛnee Gyiyayɛle a li bɛ ti a, yɛɛ Zɛkalaya
8 nee Bila ara Ezaze ara Hyima ara Dwowɛle, bɛdɛnlanle Alowɛ+ too bɛhɔdwule Nibo nee Beeyale-miyɔn.+
9 Ɔdɛnlanle aduduleɛ too ɔhɔdwule fienemgbole ne anloa wɔ Azule Yufileti+ ne anwo, ɔluakɛ ɛnee bɛ nyɛmoa ne mɔ ɛzo kpalɛ wɔ Geleade+ azɛlɛ zo.
10 Wɔ Sɔɔlo mekɛ zo, bɛ nee Hagelaema* honle na bɛlile bɛ nwo zo konim, ɔti bɛdɛnlanle bɛ ɛdanlɛ azua ne mɔ anu wɔ Geleade aduduleɛ azɛlɛ ne amuala azo.
11 Akee Gaade abozoamra doale bɛ zo wɔ Beehyan azɛlɛ zo too bɛhɔdwule Salɛka.+
12 Dwowɛle a li bɛ ti a, Hyeefam tɔ zolɛ nwiɔ, yɛɛ Gyeenae nee Hyeefate wɔ Beehyan.
13 Na bɛ mediema mɔɔ bɛ nee bɛ vi abusua ko anu la a le Maekeɛle, Mɛhyɛlam, Hyiba, Dwolae, Gyeekan, Zaya yɛɛ Yibɛ, bɛ muala bɛle nsuu.
14 Ɛhye mɔ le Bɛɛze ara Gyaado ara Gyihyehyae ara Maekeɛle ara Geleade ara Gyelowa ara Huulae ara Abeheli amra.
15 Gunae ara Abedeɛle ara Ehae a le bɛ abusua kpanyinli a.
16 Bɛdɛnlanle Geleade,+ Beehyan+ nee azua mɔɔ zuozua ye* yɛɛ Hyɛlɔn adidileka ne mɔ amuala azo too bɛhɔdwule bɛ ɛweɛne zo.
17 Bɛhɛlɛle bɛ muala bɛ aluma kɛ mɔɔ bɛ mbusua ne mɔ de la wɔ Dwuda Belemgbunli Dwotam+ nee Yizilayɛ Belemgbunli Gyɛlɔbowam*+ mekɛ zo.
18 Wulubɛnema, Gaadema nee Manasɛ abusua foa ko ne lɛ konle nu katakyiema 44,760 wɔ bɛ ɛlɔnema ne anu mɔɔ bɛdedɛ enyinlike nee konle dadeɛ yɛɛ ɛda,* na bɛtete bɛ wɔ konle nu la.
19 Bɛ nee Hagelaema,+ Gyitɛ, Neefehye+ yɛɛ Nodabe honle.
20 Na bɛboale bɛ wɔ konle ne anu, ɔti bɛvale Hagelaema nee menli mɔɔ ɛnee boka bɛ la amuala bɛwulale bɛ sa nu, ɔluakɛ bɛzunle bɛvɛlɛle Nyamenle kɛ ɔboa bɛ wɔ konle ne anu, na ɔdiele bɛ modolɛ ne ɔluakɛ bɛvale bɛ nwo bɛdole ɔ nwo zo.+
21 Bɛhyele bɛ nyɛmoa bɛhɔle—afunlumu 50,000, mboane 250,000 nee asoaso 2,000—yɛɛ menli* 100,000.
22 Bɛ nuhua dɔɔnwo wule, ɔluakɛ ɛnee nɔhalɛ Nyamenle ne a ɛlɛko konle ne a.+ Na bɛdɛnlanle bɛ bo zo ne ɔhɔkpulale mekɛ mɔɔ bɛhɔle akɛlɛzonlenlɛ nu la.+
23 Manasɛ+ abusua foa ko ne abozoamra dɛnlanle azɛlɛ ne azo ɔvi Beehyan mɔɔ kɔdwu Beeyale-hɛmɔn yɛɛ Sinɛ nee Hɛmɔn+ Boka ne azo. Ɛnee bɛ nwo zonle kpalɛ.
24 Bɛ mbusua mgbanyinli ne mɔ ɛne: Yifɛ, Yehyae, Yileɛle, Azeleɛle, Gyɛlɛmaya, Hodavaya yɛɛ Gyaadeɛle; bɛle konle nu katakyiema, mrenyia mɔɔ ɛlie duma yɛɛ mbusua mgbanyima.
25 Noko bɛanli nɔhalɛ bɛammaa bɛ nenyia mɔ Nyamenle ne, na bɛ nee menli mɔɔ wɔ azɛlɛ ne azo mɔɔ Nyamenle zɛkyele bɛ wɔ bɛ nye zo la nyamenle ne mɔ bɔle tuutuu.+
26 Ɔti Yizilayɛ Nyamenle ne vale wulale Aselea Belemgbunli Polu+ (mɔɔ le Aselea Belemgbunli Tegelate-paelinesɛ+ la) ahonle nu na ɔmaanle ɔvale Wulubɛnema, Gaadema yɛɛ Manasɛ abusua foa ko ne anu amra ɔhɔle akɛlɛzonlenlɛ nu na ɔvale bɛ ɔhɔle Heela, Heebɔ, Hɛla yɛɛ azule Gozan+ ne anloa, ɛleka mɔɔ bɛdɛnla too yeradwu ɛnɛ la.
Ɔbodwɛkɛ
^ Hibulu aneɛ nu, “amra.”
^ Anzɛɛ ɔkola ɔkile, “Heega abozoamra.”
^ Anzɛɛ “ɛbɛnga ye ɛyia.”
^ Ɛhye kile, Gyɛlɔbowam II.
^ Hibulu aneɛ nu, “yɛɛ bɛzua ɛda.”
^ Anzɛɛ “menli ɛkɛla.”
