Edwɛkɛsisilɛ Mɔɔ Limoa 12:1-40
-
Bɛboale Devidi belemgbunlililɛ ne (1-40)
12 Menli ɛhye mɔ a rale Devidi anwo ɛkɛ wɔ Zekelage+ wɔ mekɛ mɔɔ Kehye ara Sɔɔlo ati ɛnee ɔngola ɔngɔ ɛleka biala la a,+ na ɛnee bɛboka konle nu katakyiema ne mɔ mɔɔ boale ye wɔ konle nu la anwo.+
2 Bɛdedɛ ɛda, na bɛkola bɛfa bɛ sa bɛne+ nee fema amuala bɛto totoabɔ+ anzɛɛ ɛda. Bɛle Sɔɔlo amediema, bɛvi Bɛngyaman+ abusua ne anu.
3 Ahayizɛ a li bɛ ti a, ɔ nee Dwowahye, Gebeyanli+ Hyimeeya amra nwiɔ ne; Azemeevɛte+ amra Gyizeɛle nee Pelɛte, Bɛleka, Anatɔtonli Gyihu,
4 Gebɛyɔnonli+ Yehyemeeya le konle nu katakyie, ɔboka abulasa+ ne anwo yɛɛ ɔli abulasa ne ati; nee Gyɛlɛmaya, Gyeheezayɛle, Dwoheenan, Gɛdilanli Dwozabade,
5 Ɛluzae, Gyɛlimɔto, Bialaya, Hyɛmalaya, Heelɛfenli Hyɛfataya
6 yɛɛ Kɔla abozoamra+ Ɛlekeena, Yehyaya, Azaleɛle, Dwoyizɛ yɛɛ Gyahyɔbeyam;
7 nee Gidɔnli Gyɛloham amra Dwoyila yɛɛ Zɛbadaya.
8 Gaadema bie mɔ hɔle Devidi afoa wɔ ɛvealeka ne wɔ fienemgbole ne anu;+ bɛle konle nu katakyiema, sogyama mɔɔ bɛtete bɛ bɛmaa konle, bɛziezie bɛ nwo na bɛdedɛ enyinlike mgbole nee atwɛ, bɛ nyunlu le kɛ awenade nyunlu yɛɛ bɛ nwo yɛ ndɛ kɛ awoka zo ahɛtɛboɛ.
9 Yizɛ a li bɛ ti a, Obadaya tɔ zolɛ nwiɔ, Ɛlayabe tɔ zolɛ nsa,
10 Mehyemana tɔ zolɛ nna, Gyɛlɛmaya tɔ zolɛ nnu,
11 Atae tɔ zolɛ nsia, Yileɛle tɔ zolɛ nsuu,
12 Dwoheenan tɔ zolɛ mɔtwɛ, Ɛlezeebade tɔ zolɛ ngɔnla,
13 Gyɛlɛmaya tɔ zolɛ bulu, Makebeenae tɔ zolɛ bulu nee ko.
14 Ɛhye mɔ le Gaadema,+ ɛlɔne nu mgbanyinli. Bɛ nuhua ekyi ne kola nee menli 100 ko, yɛɛ bɛ nuhua kpole ne kola nee menli 1,000 ko.+
15 Menli ɛhye mɔ pɛle Dwɔdan ne wɔ siane ne mɔɔ limoa la anu wɔ mekɛ mɔɔ ɛnee yeyi yebu aze la, na bɛvoanle bɛdabɛ mɔɔ ɛnee bɛde azɛlɛ sɛsɛ ne mɔ azo la bɛhɔle aduduleɛ nee adɔleɛ.
16 Bɛngyamanema nee Dwudama bie mɔ noko rale Devidi anwo ɛkɛ wɔ ye ɛvealeka ne.+
17 Na Devidi hɔgyinlanle bɛ nyunlu na ɔzele bɛ kɛ: “Saa bɛra me nwo ɛke anzodwolɛ nu kɛ bɛbaboa me a, yemɔ me ahonle nee bɛ bayɛ ko. Na saa bɛra kɛ bɛbaye me bɛamaa me kpɔvolɛma wɔ mekɛ mɔɔ me sa ɛtɛyɛle ɛtane biala la a, ɛnee yɛ nenyia mɔ Nyamenle ne ɛnlea na ɔbua ndɛne.”+
18 Akee sunsum ne rale* Ameesae mɔɔ li abulasa ne ati la anwo zo+ na ɔhanle kɛ:
“O Devidi, yɛle wɔ ɛdeɛ, na yɛ nee wɔ lua, O Gyɛsi ara.+
Anzodwolɛ, anzodwolɛ ɛha wɔ, na anzodwolɛ ɛha mɔɔ ɛlɛboa wɔ la,Ɔluakɛ wɔ Nyamenle ne ɛlɛboa wɔ.”+
Ɔti Devidi liele bɛ na ɔvale bɛ ɔbokale ɛlɔnema mgbanyima ne mɔ anwo.
19 Menli mɔɔ vi Manasɛ abusua ne anu la bie mɔ noko rale Devidi afoa wɔ mekɛ mɔɔ ɔ nee Filisitiama rale kɛ bɛ nee Sɔɔlo baho la; noko yeamboa Filisitiama, ɔluakɛ mekɛ mɔɔ Filisitia arelemgbunli ne mɔ+ zuzule nwolɛ la, bɛvoanle ye na bɛhanle kɛ: “Ɔbahɔ ɔ menle Sɔɔlo afoa, na bɛapepɛ yɛ ti.”+
20 Mɔɔ ɔhɔle Zekelage+ la, menli ɛhye mɔ mɔɔ bɛvi Manasɛ abusua ne anu la hɔle ye afoa: Adenaa, Dwozabade, Gyɛdayɛle, Maekeɛle, Dwozabade, Ɛlaehu yɛɛ Zelɛtae, bɛgyigyi Manasɛma apenle apenle ati.+
21 Bɛboale Devidi bɛmaanle ɔhonle ɔtiale nwule ekpunli, ɔluakɛ bɛ muala bɛle katakyiema, mrenyia mɔɔ lɛ akɛnrasesebɛ,+ na bɛrayɛle mgbanyima wɔ ɛlɔne ne anu.
22 Menli rale Devidi anwo ɛkɛ alehyenlɛ biala+ raboale ye hɔkpulale kɛ bɛyɛle ɛlɔne kpole kɛ Nyamenle ɛlɔne la.+
23 Mgbanyima mɔɔ gyigyi ɛlɔnema mɔɔ dedɛ konle ninyɛne la ati, mɔɔ bɛrale Devidi anwo ɛkɛ ne wɔ Hibulɔn+ kɛ bɛdie Sɔɔlo belemgbunlililɛ ne bɛamaa ye kɛ mɔɔ Gyihova hanle la dodo ɛne:+
24 Dwudama mɔɔ dedɛ enyinlike mgbole nee atwɛ la le 6,800, bɛziezie bɛ nwo bɛmaa konle.
25 Semɛyɔnoma anu, mrenyia katakyiema mɔɔ bɛlɛ akɛnrasesebɛ wɔ ɛlɔne ne anu la le 7,100.
26 Livaema anu, 4,600.
27 Gyɛhɔyada+ a le Aalɔn amra ne mɔ+ adekilevolɛ a, na menli 3,700 boka ɔ nwo
28 yɛɛ Zeedɔko,+ kpavolɛ mɔɔ le katakyie na ɔlɛ akɛnrasesebɛ, ɔ nee mgbanyima 22 mɔɔ bɛvi ye abusua ne anu la.
29 Bɛngyamanema anu, Sɔɔlo+ amediema ne mɔ mɔɔ alimoa ne ɛnee bɛ nuhua dɔɔnwo sinza Sɔɔlo nee ye sua nu amra la le 3,000.
30 Yifelaemma anu, mrenyia katakyiema mɔɔ bɛlɛ akɛnrasesebɛ mɔɔ bɛlie duma wɔ bɛ mbusua ne mɔ anu la le 20,800.
31 Manasɛ abusua foa ko ne anu, bɛbobɔle menli 18,000 aluma kɛ bɛrɛla na bɛva Devidi bɛzie belemgbunli.
32 Yesakaa abusua ne anu amra mɔɔ mekɛ ne ati bɛnwunle mɔɔ ɔwɔ kɛ Yizilayɛma yɛ la le mgbanyima 200, na ɛnee bɛ mediema ne mɔ amuala wɔ bɛ adehilelɛ bo.
33 Zɛbulɛnema anu, ɛnee bɛle 50,000 mɔɔ bɛkola bɛboka ɛlɔnema ne mɔ anwo mɔɔ bɛhyehyɛ bɛ pɛpɛɛpɛ na bɛdedɛ konle ninyɛne kɔsɔɔti bie a, bɛ muala bɛvale nɔhalɛlilɛ mɔɔ di munli la bɛrabokale Devidi anwo.*
34 Nafetalaema anu, ɛnee bɛle mgbanyima 1,000, yɛɛ menli 37,000 mɔɔ bɛdedɛ enyinlike mgbole nee atwɛ la boka bɛ nwo.
35 Danema anu, bɛdabɛ mɔɔ bɛhyehyɛ bɛ pɛpɛɛpɛ mɔɔ bɛkɔ konle la le 28,600.
36 Yɛɛ Ahyama anu, bɛdabɛ mɔɔ bɛkola bɛboka ɛlɔnema ne mɔ anwo mɔɔ bɛhyehyɛ bɛ pɛpɛɛpɛ mɔɔ bɛkɔ konle la le 40,000.
37 Wulubɛnema, Gaadema yɛɛ Manasɛ abusua foa ko ne anu amra mɔɔ vi Dwɔdan ne anzi nehane+ rale la, sogyama mɔɔ dedɛ akodeɛ ngakyile la le 120,000.
38 Bɛ muala bɛle menli mɔɔ kɔ konle, bɛbɔ nu bɛkɔ konle; bɛvale ahonle mɔɔ di munli la bɛrale Hibulɔn kɛ bɛbava Devidi bɛazie Yizilayɛma amuala anwo zo belemgbunli, na ɛnee Yizilayɛma mɔɔ ɛha la amuala noko kulo* kɛ bɛfa Devidi bɛsie belemgbunli.+
39 Na bɛdɛnlanle Devidi anwo ɛkɛ ne kenle nsa, bɛlile na bɛnlonle, ɔluakɛ ɛnee bɛ mediema ne mɔ ɛziezie bɛ nzi.
40 Eza bɛdabɛ mɔɔ bɛbikye bɛ, nee bɛdabɛ mɔɔ bɛwɔ moamoa le kɛ Yesakaa, Zɛbulɛn yɛɛ Nafetalae azɛlɛ zo bɔbɔ la, vale aleɛ ziele asoaso, afunlumu, ɛkpɔnwɔndua* yɛɛ nlankɛ nwo zo rale—esamo, feege mɔɔ bɛbɔ ye kunguma nee vanye ma welera, nwanye, nwole yɛɛ nlankɛ nee mboane dɔɔnwo kpalɛ, ɔluakɛ ɛnee anyelielɛ ɛra Yizilayɛ.
Ɔbodwɛkɛ
^ Hibulu aneɛ nu, “hedale.”
^ Anzɛɛ “bɛdabɛ mɔɔ bɛhɔbokale Devidi anwo la amuala ahonle ɛnle nwiɔ nwiɔ.”
^ Hibulu aneɛ nu, “lɛ ahonle ko.”
^ Asoaso nyinli nee ɛkpɔnwɔ belɛ a wole ye a.
