“Ɔle kɛ asɛɛ Gyihova ɛlɛtie mɔɔ awovolɛ ɛlɛka ye wɔ bɛ ahonle nu la.” Kɛ selɛ bie mɔɔ wɔ Malaysia la hanle Bayɛ Gyihova Agɔnwo vidio nzinrenzinra ne anwo edwɛkɛ la ɛne.

Gyihova Alasevolɛ yele foa ne mɔɔ limoa la anzi, bɛye vidio ne foa ngakyile mɔɔ Caleb nee ye abusua ne wɔ nu la. Vidio ne mɔ mɔɔ kɛkala wɔ jw.org la boa ngakula ɔmaa bɛnyia ɛzukoalɛdeɛ dɔɔnwo, sunsum nu nee ɛbɛlabɔlɛ nu. Kɛ neazo la, ɔmaa bɛnwu deɛmɔti ɔnle kɛ bɛwua nee kɛzi bɛbayɛ asɔne bɛahile Nyamenle la.

Bɛhile vidio ne mɔɔ limoa la abo bɛhɔ aneɛ 131 anu na ɔlɛboa ngakula wɔ ewiade ɛleka biala.

Ninli ko mɔɔ ɛwo ngakula nnu la hɛlɛle kɛ: “Ɔvi mekɛ mɔɔ yɛ sa hanle Tie, Di zo Na Nyia Nyilalɛ DVD ne la, yɛnlea ye fane 50.”

Millie mɔɔ ɛnyia ɛvolɛ 12 mɔɔ wɔ England la lɛ ɔ diema nrenyia mɔɔ ɛnyia ɛvolɛ 15 mɔɔ lɛ adwenle nu ngyegyelɛ la, bɛfɛlɛ ye Thomas. Millie hɛlɛle kɛ: “Thomas ɛhwe Caleb vidio ne ɛgua ye iPad zo, na ɔye ɔkile ɔ gɔnwo mɔ wɔ sukulu. Ɔkulo edwɛne ne mɔ kpalɛ la ati kɛzi ɔto ye la maanle adiema raalɛ bie zunle. Ɛnea a, ɔyɛ azibɛnwo.”

Ava mɔɔ se yenyia ɛvolɛ 8, siane 9 yɛɛ kenle 25 la hɛlɛle kɛ: “Caleb nee ɔ diema raalɛ ne ze ngakula kilehile kpalɛ.”

Mikaylah hɛlɛle kɛ: “Meli ɛvolɛ nsia. Meda bɛ ase kɛ bɛmaa me sa ɛha Tie, Di zo Na Nyia Nyilalɛ DVD ne la. Yeboa me yemaa menwu kɛ ɔwɔ kɛ metie me awovolɛ ɔluakɛ yemɔ a Gyihova anye die nwolɛ a.”

Kpavolɛ bie mɔɔ yɛ vidio nwo gyima na ɔnle Gyihova Dasevolɛ la nleanle Awule Ɛnle Kpalɛ vidio ne. Ɔzinle ɔ nwo kpole wɔ mekɛ mɔɔ ɔdele kɛ menli ekyi bie a ɛha ɛbɔ nu ɛyɛ vidio mɔɔ bɛdolɔdolɔ la. Ɔhanle kɛ: “Meze menli mɔɔ yɛ vidio ɛhye bie anwo gyima wɔ kɔmpɛlɛ mgbole nee ngyikyi nu la na kɛzi awie yɛ gyima wɔ kɔmpɛlɛ zɛhae mɔ anu ɔde la. Noko saa bɛfɛ bɛyɛ a ɔmaa menli sele dɔnehwele ekyi bie ala. Noko bɛ vidio ne mɔ maa ngakula kakyi bɛ ɛbɛlabɔlɛ, ɔmaa bɛnwu mɔɔ le kpalɛ nee ɛtane na ɔboa bɛ ɔmaa bɛsi kpɔkɛ kpalɛ. Bɛlɛyɛ debie mɔɔ gyi bodane zo, ɔboa menli.”

Awovolɛ mɔɔ wɔ ewiade ɛleka biala la die ɛhye to nu. Mame bie hɛlɛle kɛ: “Ɛnee me ra Quinn mɔɔ ɛnyia ɛvolɛ nsa la ɛlɛnea Awie Mɔɔ Gyihova Fa Ye Agɔnwolɛ vidio ne. Mɔɔ ɔdwule avinli la, ɔmaanle ɔ nye zo ɔnleanle me nyunlu, ɔvale ɔ sa ɔdole ye ahonle zo na ɔhanle kɛ: ‘Maa, menea vidio ɛhye a, me ahonle di fɛlɛko.’”