Kyɛkyɛ, yɛnle Zayɔnoma. Gyihova Alasevolɛ le Keleseɛnema mɔɔ bɛ diedi ne gyi Ngɛlɛlera ne azo a. Ɛzonlenlɛ bie mɔ kilehile kɛ Dwuuma mɔɔ bɛsia bɛahɔdɛnla Palestine la le Baebolo nu ngapezo, noko Gyihova Alasevolɛ ɛnlie ɛndo nu. Bɛnlie bɛnli kɛ Ngɛlɛlera ne hanle maanyɛlɛ gyima ɛhye anwo edwɛkɛ dole ɛkɛ. Nɔhalɛ nu, Ngɛlɛlera ne ɛnga kɛ sonla arane anzɛɛ abusua anzɛɛ menli ekpunli bie le kpalɛ tɛla mɔɔ ɛha la. Ɛzinzalɛ Arane ne mɔɔ le Gyihova Alasevolɛ magazine titile la ɛha ye wienyi kɛ: “Ngɛlɛlera ne ɛnlie Zayɔnoma eku ɛhye ɛndo nu.”

 Encyclopædia Britannica ne ka Zayɔnoma anwo edwɛkɛ kɛ, “Dwuuma fane ɛhye bodane a le kɛ bɛkyekye Dwuuma maanle ne wɔ Palestine bieko.” Ɔ bo vi ɛzonlenlɛ nee maanyɛlɛ nu. Gyihova Alasevolɛ ɛnva adwenle mɔɔ Zayɔnoma lɛ la ɛngilehile menli yɛɛ bɛngyi bɛ maanyɛlɛ fane ne afoa.

 Gyihova Alasevolɛ ahyehyɛdeɛ ne le ɛzonlenlɛ nu fane, na ɔngyi maanyɛlɛ ngyehyɛleɛ biala mɔɔ Zayɔnoma boka nwo la anzi. Menli dɔɔnwo ze Gyihova Alasevolɛ kɛ bɛmboka maanyɛlɛ fane biala anwo, na wɔ maanle bie mɔ anu Alasevolɛ ne mɔ yia kpɔdekpɔdeyɛlɛ mɔɔ anu yɛ se ɔlua afoa biala mɔɔ bɛngyi la ati. Yɛdie yɛdi kɛ Nyamenle anwuma Belemgbunlililɛ ne ala a bava anzondwolɛ mɔɔ ɛnlɛ ye awieleɛ la ara azɛlɛ ye azo a; sonla arane anzɛɛ fane biala ɛnrɛhola ɛnrɛyɛ ɛhye.

 Wɔ maanle biala mɔɔ bɛwɔ nu la anu, Gyihova Alasevolɛ die di kɛ ɔwɔ kɛ bɛdi mɛla mɔɔ arane mgbanyima ɛhyehyɛ la azo. Bɛndwazo bɛntia arane mgbanyima tumililɛ yɛɛ bɛngɔ konle.