Edwɛkɛ mɔɔ wɔ ɔ bo ɛke la ati a Gyihova Alasevolɛ ɛngɔ konle a:

1.   Yɛtie Nyamenle. Baebolo ne ka Nyamenle azonvolɛ anwo edwɛkɛ kɛ “bɛbabolo bɛ konle dadeɛ ne mɔ bɛayɛ ɛyazonlɛ mbulalɛ” na “bɛnrɛzukoa konle ɛhonlɛ bieko.”—Ayezaya 2:4.

2.  2 Yɛtie Gyisɛse. Gyisɛse zele ɛzoanvolɛ Pita kɛ: “Fa wɔ dadeɛ ne wula ye boa ne anu, ɔluakɛ bɛdabɛ mɔɔ bɛtwe dadeɛ la, bɛwu dadeɛ nloa.” (Mateyu 26:52) Gyisɛse luale adenle ɛhye azo hilele kɛ ye ɛdoavolɛma ɛnrɛhɔ konle.

    Gyisɛse ɛdoavolɛma tie ye, ‘bɛnle ɛtane ewiade ɛdeɛ’ yemɔti bɛnva bɛ nwo bɛnwulowula maanyɛlɛ nu. (Dwɔn 17:16) Yɛndwazo yɛntia gyima mɔɔ sogyama yɛ la yɛɛ yɛnzi menli mɔɔ bɛkulo kɛ bɛkɔ sogya la adenle.

3.   Yɛkulo awie mɔ. Gyisɛse zele ye ɛdoavolɛma kɛ “bɛhulo bɛ nwo ngoko ngoko.” (Dwɔn 13:34, 35) Ɛhye ati, yɛbu yɛ mediema mɔɔ wɔ ewiade amuala la kɛ yɛle ko yemɔti yɛ nuhua biala ɛngo ɛntia ɔ diema nrenya anzɛɛ raalɛ.—1 Dwɔn 3:10-12.

4.  4 Yɛdi alumua Keleseɛnema neazo ne anzi. Encyclopedia of Religion and War ne ka kɛ: “Gyisɛse ɛdoavolɛma mɔɔ lumua la angɔ konle yɛɛ bɛangɔ sogya,” ɔluakɛ bɛbule nyɛleɛ zɛhae mɔ kɛ “ɔ nee ɛlɔlɛ mɔɔ ɛnee Gyisɛse lɛ nee mɛla mɔɔ ɔvale ɔmanle bɛ kɛ bɛhulo bɛ agbɔvolɛ la ɛnyia.” Ɛzonlenlɛ nwo sukoavo, Peter Meinhold mɔɔ vi Germany la noko hanle Gyisɛse alumua ɛdoavolɛ ne mɔ anwo edwɛkɛ kɛ: “Bɛbule awie mɔɔ le Keleseɛnenli la kɛ ɔngola ɔnyɛ sogyanli.”

 Gyihova Alasevolɛ boa bɛ maanle ne anu amra na bɛ nwo ɛnyɛ ɛzulolɛ wɔ maanle mɔɔ bɛde nu la anu. Yɛbu arane mgbanyima ɔluakɛ Baebolo ne ka kɛ:

•   “Ɔwɔ kɛ awie biala bu mgbanyima mɔɔ ɛlɛbu maanle ne la.”—Wulomuma 13:1.

•   “Bɛva mɔɔ le Siza ɛdeɛ la bɛmaa ye ɛ, na bɛva mɔɔ le Nyamenle ɛdeɛ noko la bɛmaa ye.”—Mateyu 22:21.