Ong-Li le Gyihova Dasevolɛ wɔ Bulgaria. Ɛnee ɔ nee raalɛ bie mɔɔ bɛfɛlɛ ye Zlatka la sukoa Baebolo ne, noko ɔ hu ɛdeɛ ɔnzukoa bie. Ong-Li ka kɛ: “Mɔɔ ɛnee yɛlɛsuzu abusua asetɛnla nwo la, memaanle ɔnwunle kɛ ɔhyia kɛ yɛka yɛkile yɛ ye anzɛɛ yɛ hu nee yɛ mra kɛ yɛkulo bɛ la. Zlatka nleanle me koonwu na ɔhanle kɛ, ɔtɛkanle ɔtɛkilele ɔ hu anzɛɛ ɔ ra raalɛ ne mɔɔ ɛnyia ɛvolɛ ngɔnla la ɛlɛ kɛ ɔkulo bɛ!”

Zlatka hilehilele nu kɛ, “Mekulo kɛ mefi me ɛhulolɛ nu meyɛ debie biala memaa bɛ, noko mengola menga zɔhane edwɛkɛ ne.” Ɔtoa zo kɛ, “Me mame anga angile me ɛlɛ kɛ ɔkulo me, yɛɛ me nana noko anga angile me mame kɛ ɔkulo ye.” Ong-Li maanle Zlatka nwunle kɛ, Gyihova hanle hilele Gyisɛse kɛ ɔkulo ye. (Mateyu 3:​17) Ɔmaanle Zlatka anwosesebɛ kɛ ɔha nwolɛ edwɛkɛ ɔhile Gyihova wɔ asɔneyɛlɛ nu, na ɔva ɔyɛ ye bodane kɛ ɔbaha yeahile ɔ hu nee ɔ ra raalɛ ekyi ne kɛ ɔkulo bɛ.

Ong-Li ka kɛ: “Ye kenle nwiɔ anzi, Zlatka vale anyelielɛ hanle hilele me kɛ, yezɛlɛ Gyihova kɛ ɔboa ye. Mɔɔ ɔ hu rale sua nu la, ɔhanle ɔhilele ye kɛ Baebolo ne mɔɔ ɔlɛsukoa la ɛmaa yenwu kɛ ɔwɔ kɛ yelɛ di ɔ hu eni na ɔkulo ye. Akee ɔgyinlanle ekyi na ɔhanle ɔhilele ɔ hu kɛ ɔkulo ye kpole kpalɛ! Mɔɔ Zlatka ara raalɛ ekyi ne rale sua nu la, ɔhɔyɛle ye atuu na ɔhanle ɔhilele ye kɛ, ɔkulo ye. Zlatka zele me kɛ: ‘Kɛkala me nwo ɛdɔ me kpalɛ. Wɔ mekɛ tendenle ɛhye amuala anu, ɛnee mengola mennla me nganeɛdelɛ ali, noko ɔlua Gyihova moalɛ zo, kɛkala mekola meka mekile me abusua ne kɛ mekulo bɛ.’

“Ye dapɛne ko anzi,” Ong-Li hanle kɛ, “Menyiale Zlatka ahu, na ɔzele me kɛ: ‘Menli dɔɔnwo ɛha ɛhile me kɛ, ɔnle kɛ Zlatka nee wɔ sukoa Baebolo ne, noko menwu ye wienyi kɛ Baebolo ne mɔɔ ɔlɛsukoa la ɛlɛboa yɛ abusua ne. Yɛlɛ agɔnwolɛvalɛ kpalɛ yɛɛ yɛ nye die kpole.’”