Bɛwole me wɔ La Ceiba, Honduras. Yɛle mediema nnu na medame a mele ekyi a yɛɛ me ngomekye a mele nrenyia a. Ɛnee eza me ngomekye a mele mumule wɔ abusua ne anu a. Ɛnee ɛleka mɔɔ me nee me abusua ne de la yɛ ɛzulolɛ yɛɛ ɛnee yɛle ehyiavolɛma. Ɛbɛlabɔlɛ ne anu yɛle se kpalɛ maanle yɛ wɔ mekɛ mɔɔ me papa vile sua bie ati zo dɔle aze wule wɔ gyima nu la, ɛnee meli ɛvolɛ kɛyɛ nna.

 Me mame yɛle biala mɔɔ ɔbahola la nleanle me nee me mediema mraalɛ ne mɔ, noko ɛnee ɔnda ɔnnyia ezukoa ɔndɔ adɛladeɛ ɔmmaa me. Saa ezule tɔ a, ɛyɛlɛ ta ku me kpalɛ ɔluakɛ ɛnee menlɛ adɛladeɛ mɔɔ mefa meazɔ ɛyɛlɛ ne a.

 Melɛnyi la, menzukoale Honduras Mumule Aneɛ (LESHO), na yemɔ maanle me nee mumulema gyɛne lile adwelie. Noko, ɛnee me mame nee me mediema mraalɛ ne mɔ ɛnze LESHO, na ɛnee bɛdabɛ mumua ne bɛyɛ debie amaa bɛ nee me adendɛ. Noko akee, ɛnee me mame kulo me edwɛkɛ kpalɛ na ɔbɔle me nwo bane ɔvile esiane nwo. Ɔluale mumule aneɛ ekyi mɔɔ ɔte la azo ɔbɔle me kɔkɔ wɔ ninyɛndane le kɛ sigalɛte nee nza dɔɔnwo ɛnlonlɛ nwo. Zɔhane ati, ɔyɛ me fɛ kɛ menyinle mɔɔ meanno ninyɛne zɔhane mɔ bie a.

 Mele kakula la, ɛnee me mame fa me kɔ Kateleke Asɔne, noko ɛnee mende debie biala abo ɔluakɛ ɛnee bɛngile ɔ bo wɔ mumule aneɛ bɛmmaa me. Menyianle ɛvolɛ bulu la mengyakyile asɔnehɔlɛ ɔluakɛ ɛnee yevonle me. Noko akee, ɛnee mekulo kɛ menwu Nyamenle anwo edwɛkɛ dɔɔnwo.

 Wɔ 1999, mekɛ mɔɔ ɛnee meli ɛvolɛ 23 la, menyiale raalɛ bie mɔɔ ɔvi United States na ɔkɔ Inter-community Church of God la. Ɔhanle Baebolo ne anu edwɛkɛ ɔhilele me na ɔhilele me America Mumule Aneɛ (ASL). Me nye liele mɔɔ menzukoale ye wɔ Baebolo ne anu la anwo kpalɛ, ɔti menzile kpɔkɛ kɛ mebayɛ ɛsɔfo. Ɛhye ati, mengɔle Puerto Rico mengɔnliele ndetelɛ mɔɔ bɛyɛ bɛmaa Kilisienema mɔɔ bɛle mumule la. Mekɛ mɔɔ menziale membale La Ceiba wɔ 2002 la, me gɔnwo mɔ bie mɔ boale me maanle mendele asɔne memaanle mumulema. Nzinlii, mengyale Patricia mɔɔ ɛnee boka agɔnwolɛma ɛhye mɔ anwo la.

 Kɛmɔ ɛnee mele ɛsɔfo la ati, ɛnee mefa LESHO meka edwɛkɛ ne, mefa edwɛkɛ mɔɔ wɔ Baebolo ne anu la anwo nvoninli mekile bɛ na meyɛ nwolɛ yɛkile amaa mumulema ne ade ɔ bo. Ɛnee eza mekɔkpɔla mumulema mɔɔ wɔ azua mɔɔ zuozua yɛ azo la amaa meamaa bɛ anwosesebɛ na meaboa bɛ meamaa bɛali bɛ ngyegyelɛ nwo gyima. Mengɔnganle edwɛkɛ ne bɔbɔ wɔ United States nee Zambia. Noko nɔhalɛ nu, ɛnee menze Baebolo ne anu edwɛkɛ dɔɔnwo. Mɔɔ bɛhilehilele me wɔ ndetelɛ ne abo nee kɛzi mete nvoninli ne mɔ abo la a menganle mengilele bɛ a. Nɔhalɛ nu, ɛnee melɛ kpuya dɔɔnwo.

 Kenle ko bie, me asɔne ne anu amra bie mɔ hanle adalɛ edwɛkɛ vanenle me nwo. Bɛhanle kɛ mele nzanli yɛɛ menli nɔhalɛ memmaa me ye. Me rɛle bɔle na menvale ɛya. Yeangyɛ biala yɛɛ me nee Patricia gyakyile asɔne ne a.

 Ɛnee Gyihova Alasevolɛ ta bakpɔla me nee Patricia, noko yɛandie bɛ kenle ko bɔbɔ. Noko akee, mɔɔ yɛgyakyile yɛ asɔne ne la, Patricia liele dole nu kɛ Alasevolɛ agyalɛma bie, Thomas yɛɛ Liccy nee ye ɛrazukoa Baebolo ne. Ɔwɔ nuhua kɛ ɛnee bɛnle mumulema ɛdeɛ noko ɛnee bɛze mumule aneɛ ne, ɛhye zinle me nwo. Ɔti, mengɔmbokale Patricia anwo yɛzukoale debie.

 Yɛluale ASL vidio zo yɛzukoale debie wɔ siane bie anu. Noko, mekɛ mɔɔ yɛ gɔnwo mɔ bie hanle kɛ menli a Gyihova Alasevolɛ doa bɛ la, yɛgyakyile Baebolo ne ɛzukoalɛ. Ɔwɔ nuhua kɛ Thomas maanle me daselɛ dɔɔnwo mɔɔ kile kɛ tɛ menli adekilevolɛma a Gyihova Alasevolɛ doa bɛ la ɛdeɛ, noko meanlie ye meanli.

 Ye siane ekyi anzi, Patricia arɛle bɔle kpalɛ, na ɔzɛlɛle Nyamenle kɛ ɔmaa Gyihova Alasevolɛ ne mɔ ɛrakpɔla ye bieko. Yeangyɛ biala, Gyihova Dasevolɛ bie mɔɔ de bikye yɛ la rakpɔlale Patricia na ɔhanle kɛ ɔbaha yeahile Liccy yeamaa yearakpɔla ye. Liccy hilele kɛ ɔle agɔnwolɛ kpalɛ. Ɔkpɔlale Patricia dapɛne biala ɔmaanle ye anwosesebɛ na ɔ nee ye zukoale Baebolo ne. Noko akee, ɛnee me adwenle nu tɛyɛ me kesee wɔ Alasevolɛ ne mɔ anwo.

 Wɔ 2012, Gyihova Alasevolɛ yɛle nolobɔlɛ titili bie vale Ɛkulo kɛ Ɛnwu Nɔhalɛ ne Ɔ? vidio ne maanle wɔ LESHO anu. Liccy maanle yɛ vidio ne ko. Mɔɔ meneanle vidio ne la, ɔzinle me nwo kɛ diedi bie mɔ le kɛ hellsenle nee ɛkɛla mɔɔ ɛnwu ɛlɛ mɔɔ ɛnee mekilehile la ɛnle Baebolo ne anu la .

 Ye dapɛne bieko, mengɔle Gyihova Alasevolɛ Belemgbunlililɛ Asalo me nee Thomas hɔdendɛle. Menganle mengilele ye kɛ mekulo kɛ mekilehile mumulema ne Baebolo nu nɔhalɛ ne noko mengulo kɛ meyɛ Gyihova Dasevolɛ. Ɛnee mekulo kɛ mete asɔne fofolɛ memaa mumulema ne. Thomas hanvole me wɔ me mɔdenlebɔlɛ ne anwo noko ɔvale Ɛfɛsɛsema 4:5 mɔɔ si kɛzi ɔhyia kɛ koyɛlɛ tɛnla nɔhalɛ Kilisienema asafo ne anu azo la ɔhilele me.

 Thomas eza vale vidio ne mɔɔ se Jehovah’s Witnesses​—Faith in Action, Part 1: Out of Darkness mɔɔ bɛyɛ ye wɔ ASL nu la ɔmaanle me. Vidio ɛhye maanle menwunle kɛzi menli ekpunli bie nleɛnleanle Baebolo ne anu kpalɛ amaa bɛade nɔhalɛ ne mɔɔ fale mɔlebɛbo ngilehilelɛ ne anwo abo la. Melɛnea vidio ne la, mendele kɛzi mrenyia zɔhane dele nganeɛ la abo. Ɛnee melɛkpondɛ nɔhalɛ ne kɛ bɛdabɛ ala la. Zɔhane vidio ne maanle menyianle anwodozo kɛ Gyihova Alasevolɛ kilehile nɔhalɛ ne ɔluakɛ bɛ diedi ne gyi Baebolo ne azo. Ɔti, membɔle Baebolo ɛzukoalɛ bo bieko na wɔ 2014, bɛzɔnenle me nee Patricia kɛ Gyihova Alasevolɛ.

 Me nye die Gyihova Alasevolɛ asafo ne anwo ɔluakɛ nwolɛ te kɛ mɔɔ Nyamenle anwo te la. Alasevolɛ ne mɔ anwo te wɔ bɛ ɛdendɛlɛ nee kɛzi bɛ nee awie mɔ di la anu. Bɛkulo anzodwolɛ yɛɛ bɛmaa bɛ nwo anwosesebɛ. Koyɛlɛ wɔ Alasevolɛ ne mɔ avinli yɛɛ bɛkilehile Baebolo nu nɔhalɛ ko ne ala ɔnva nwo maanle mɔɔ bɛvi nu anzɛɛ aneɛ mɔɔ bɛka la.

 Me nye liele mɔɔ Baebolo ne kilehile la anwo kpalɛ. Kɛ neazo la, menzukoale kɛ Gyihova a le Nyamenle Tumivolɛ Bedevinli wɔ azɛlɛ ye amuala azo a. Ɔkulo mumulema nee bɛdabɛ mɔɔ bɛte edwɛkɛ la. Nyamenle ɛlɔlɛ ne sonle bolɛ maa me. Eza menzukoale kɛ azɛlɛ ne bayɛ paladaese kɛnlɛma na yɛanyia nwolɛ adenle yɛadɛnla aze dahuu wɔ kpɔkɛdelɛ kpalɛ nu. Me nye la mekɛ mɔɔ ɛhye bara nu la ade kpalɛ!

 Me nee Patricia anye die kɛ yɛbaha Baebolo ne anu edwɛkɛ yɛahile mumulema gyɛne. Kɛkala, yɛ nee menli mɔɔ wɔ yɛ asɔne dɛba ne anu la bie mɔ sukoa Baebolo ne. Mekɛ mɔɔ ɛnee mele ɛsɔfo la, ɛnee melɛ kpuya dɔɔnwo wɔ mɔɔ mekilehile la anwo noko kɛkala ɔnle zɔ. Akee, menyia me kpuya ne mɔ anwo mualɛ ɔlua Baebolo ne mɔɔ me nee Gyihova Alasevolɛ zukoale la ati.