Bɛha bɛhile menli dɔɔnwo kɛ yɛnrɛhola yɛnrɛnwu menli mɔɔ hɛlɛle Baebolo ne la. Noko Baebolo ne ta da ahenle mɔɔ hɛlɛle nuhua edwɛkɛ bie la ali wienyi. Bie mɔ bɔ ɔ bo zɛhae, ‘gyima mɔɔ Nihɛmaya lile la anwo edwɛkɛ mɔɔ ɔdaye ɔhanle,’ “Ayezaya ɛnyelɛzodeɛnwunlɛ ne,” nee ‘nrɛlaleɛ mɔɔ [Gyihova] vale manle Dwowɛle la ɛne.’​—Nihɛmaya 1:1; Ayezaya 1:1; Dwowɛle 1:1.

 Menli mɔɔ hɛlɛle Baebolo ne la anu dɔɔnwo zile zolɛ kɛ Gyihova, nɔhalɛ Nyamenle kokye ne, a maanle bɛhɛlɛle edwɛkɛ ne a, na ɔdaye a ɔhilele bɛ adenle a. Ngapezoma mɔɔ hɛlɛle Hibulu Ngɛlɛlera ne la hanle ye fane mɔɔ bo 300 la kɛ: “[Gyihova] se.” (Emɔso 1:3; Maeka 2:3; Nahum 1:12) Bie mɔ noko hɛlɛle edwɛkɛ mɔɔ Nyamenle maanle anwumabɔvolɛma rahanle hilele bɛ la.​—Zɛkalaya 1:7, 9.

 Mrenyia kɛyɛ 40 a hɛlɛle Baebolo ne a, wɔ ɛvolɛ mɔɔ bo 1,600 la anu. Bie mɔ hɛlɛle buluku mɔɔ bo ko. Mbuluku 66 a wɔ Baebolo ne anu a. Mbuluku 39 a wɔ Hibulu Ngɛlɛlera ne mɔɔ bɛfɛlɛ ye Ngyekyeleɛ Dɛba (Old Testament) ne la anu a, yɛɛ mbuluku 27 a wɔ Kilisiene Giliki Ngɛlɛlera ne mɔɔ bɛfɛlɛ ye Ngyekyeleɛ Fofolɛ (New Testament) ne la anu a.