Ɛnee Mɛle Magedalene le Gyisɛse Kelaese ɛdoavolɛ mɔɔ di nɔhalɛ. Bie a ye duma Magedalene ne abo vi sua Magedala (bie a Magadan), mɔɔ bikye Galeli Nyevile ne la. Ɔbayɛ kɛ Mɛle dɛnlanle ɛkɛ ne mekɛ bie.

 Ɛnee Mɛle Magedalene boka mraalɛ dɔɔnwo mɔɔ nee Gyisɛse nee ye ɛdoavolɛma dule adenle na bɛvale bɛ ninyɛne bɛboale bɛ la anwo. (Luku 8:1-3) Mekɛ mɔɔ bɛku Gyisɛse la ɔnwunle ye yɛɛ ɛnee ɔboka menli mɔɔ limoale nwunle Gyisɛse wɔ ye ewudwazo ne anzi la anwo.​—Maake 15:40; Dwɔn 20:11-18.

•  Ɛnee Mɛle Magedalene le tuutuunli ɔ?

•  Ɛnee Mɛle Magedalene le “ɛzoanvolɛma ne ɛzoanvolɛ” ɔ?

•  Ɛnee Mɛle Magedalene le Gyisɛse Kelaese aye ɔ?

•  Menli nyɛ a bɛfɛlɛ bɛ Mɛle wɔ Baebolo ne anu a?

 Baebolo ne ɛnga kɛ ɛnee Mɛle Magedalene le tuutuunli. Ɔ nwo edwɛkɛ mɔɔ ɔka la a le kɛ Gyisɛse dule sunsum ɛtane nsuu vile ɔ nwo.​—Luku 8:2.

 Duzu ati a menli ka kɛ ɛnee ɔle tuutuunli kolaa na yearayɛ Gyisɛse ɛdoavolɛ a? Ɔwule la ye ɛvoya dɔɔnwo anzi, menli bie hanle kɛ ɔbayɛ kɛ yemɔ a le raalɛ ne mɔɔ bɛambɔ ye duma (tuutuunli bie) mɔɔ vale ɔ nye monle wowole Gyisɛse agyakɛ anwo, na ɔvale ɔ ti enrinli ɔkyikyile la. (Luku 7:36-38) Noko diedi ɛhye ɛngyi Ngɛlɛlera ne azo.

 Kyɛkyɛ. Kateleke Asɔne ne fɛlɛ Mɛle “Anwodelɛnli Mɛle Magedalene” yɛɛ “ɛzoanvolɛma ne ɛzoanvolɛ” ɔluakɛ ɛnee ɔboka menli mɔɔ limoale rabɔle ɛzoanvolɛma ne amaneɛ kɛ bɛdwazo Gyisɛse la anwo. (Dwɔn 20:18) Noko ɛhye ɛngile kɛ ɛnee ɔle ɛzoanvolɛ. Yɛɛ bɛanga ye wɔ Ngɛlɛlera ne anu ɛleka biala kɛ ɔle ɛzoanvolɛ.​—Luku 6:12-16.

 Bɛhɛlɛle Baebolo ne bɛwiele wɔ mekɛ mɔɔ ɛvoya mɔɔ limoa Y.M. ɛlɛkɔ ye awieleɛ la. Noko, wɔ ɛvoya mɔɔ tɔ zo nsia la anu yɛɛ asɔne mgbanyima ne mɔ liele dole nu kɛ bɛbavɛlɛ Mɛle Magedalene anwodelɛnli a. Edwɛkɛ bie mɔɔ bɛhɛlɛle ye wɔ ɛvoya mɔɔ tɔ zo nwiɔ nee nsa ne anu mɔɔ ɛmboka Baebolo ne anwo la ka kɛ ɛnee Gyisɛse ɛzoanvolɛma ne bie anye bolo Mɛle. Adalɛ edwɛkɛ ɛhye mɔ ɛnle Ngɛlɛlera ne anu.

 Kyɛkyɛ. Nɔhalɛ nu, Baebolo ne ka ye wienyi kɛ Gyisɛse angya raalɛ. *