Baebolo ne ka kɛ “bɛhunle [Gyisɛse] wɔ nwonane nu noko bɛdwazole ye wɔ sunsum nu.”​​—1 Pita 3:18; Gyima ne 13:34; 1 Kɔlentema 15:45; 2 Kɔlentema 5:16.

 Edwɛkɛ mɔɔ Gyisɛse mumua ne hanle la maa yɛnwu kɛ bɛnrɛva ye nwonane ne bɛnrɛdwazo ye. Ɔhanle kɛ ɔbava ye nwonane ne yeamaa kɛ ɛkpɔnedeɛ yealie ewiade ne ngoane. (Dwɔn 6:51; Mateyu 20:28) Saa ye nwonane ne a bɛvale bɛdwazole ye a, anrɛɛ ye ɛkpɔnedeɛ afɔle ne ɛnrɛyɛ gyima. Ɛnee ɛhye ɛnrɛzi, ɔluakɛ Baebolo ne ka kɛ ɔvale ye mogya nee ye nwonane ne ɔbɔle afɔle “kokye.”​—Hibuluma 9:​11, 12.

Saa bɛvale sunsum nu sonlabaka a bɛdwazole Gyisɛse a, ɛnee kɛ ɔyɛle mɔɔ ye ɛdoavolɛma ne nwunle ye ɛ?

•  Sunsum nu abɔdeɛ kola kakyi bɛ nwo kɛ sonla. Kɛ neazo la, wɔ tete ne, anwumabɔvolɛma mɔɔ hakyile bɛ nwo la nee menli lile aleɛ na bɛnlonle debie bɔbɔ. (Mɔlebɛbo 18:​1-8; 19:​1-3) Noko akee, ɛnee bɛtɛde sunsum nu abɔdeɛ mɔɔ kola ba azɛlɛ ye azo a.​​—Maanlebuvolɛma 13:15-​21.

•  Wɔ Gyisɛse ewudwazo ne anzi, ɔhakyile ɔ nwo sonla wɔ mekɛ ekyi bie anu kɛ mɔɔ ɛnee anwumabɔvolɛ ne mɔ yɛ la. Kɛmɔ ɛnee ɔle sunsum nu abɔdeɛ la ati, ɛnee ɔkola ɔfinde na ɔminli arɛlevilɛ nu. (Luku 24:31; Dwɔn 20:19, 26) Ɛnee nwonane nu sonlabaka ne mɔ mɔɔ bɛvale bɛ nye bɛnwunle bɛ la ɛnzɔho bɛ nwo. Ɔti, ɛnee kyesɛ Gyisɛse tendɛ anzɛɛ ɔyɛ debie na ɔ gɔnwo mɔ kpalɛ bɔbɔ ahola anwu ye sonla holɛ.​​—Luku 24:30, 31, 35; Dwɔn 20:14-​16; 21:​6, 7.

•  Mɔɔ Gyisɛse yele ɔ nwo hilele ɛzoanvolɛ Tɔmase la, ɔvale nwonane nu sonlabaka mɔɔ pɛlɛko ne mɔɔ bɛvale bɛbɔle ye baka nu abo zo wɔ nu la a ɔhilele ye a. Kɛmɔ ɛnee Tɔmase ɛnlie ɛnli kɛ bɛdwazo Gyisɛse la ati, ɔyɛle ɛhye amaa Tɔmase diedi nu amia.​​—Dwɔn 20:24-​29.