Asoo Nyamenle Belemgbunlililɛ Ne Wɔ Wɔ Ahonle Nu ɔ?
Baebolo ne bua kɛ
Kyɛkyɛ, Nyamenle Belemgbunlililɛ ne ɛnle debie mɔɔ wɔ Kilisienema ahonle nu. * Baebolo ne kile ɛleka fɔɔnwo mɔɔ ɔwɔ la, na ɔfɛlɛ ye “anwuma Belemgbunlililɛ ne.” (Mateyu 4:17) Suzu kɛzi Baebolo ne maa ɔda ali kɛ ɔle arane kpalɛ mɔɔ ɛlɛdi tumi wɔ anwuma la anwo.
Nyamenle Belemgbunlililɛ ne lɛ ye tumivolɛma, maanlema, mɛla yɛɛ tumi mɔɔ bamaa Nyamenle ɛhulolɛdeɛ ayɛ ɛkɛ wɔ anwuma nee azɛlɛ ye azo la.—Mateyu 6:10; Yekile 5:10.
Nyamenle arane ne anzɛɛ Belemgbunlililɛ ne bali tumi wɔ “aleɛabo maanle maanle mɔɔ ka aneɛ ngakyile la” azo. (Daneɛle 7:13, 14) Arane ɛhye tumililɛ ne ɛnvi ye maanlema ɛkɛ, emomu ɔvi Nyamenle ɛkɛ.—Edwɛndolɛ 2:4-6; Ayezaya 9:7.
Gyisɛse hanle hilele ye ɛzoanvolɛ nɔhavoma ne kɛ bɛbaboka ɔ nwo wɔ anwuma Belemgbunlililɛ ne anu na “bɛadɛnla arelemgbunli mbia zo.”—Luku 22:28, 30.
Belemgbunlililɛ ne lɛ ye agbɔvolɛ mɔɔ ɔbazɛkye bɛ a.—Edwɛndolɛ 2:1, 2, 8, 9; 110:1, 2; 1 Kɔlentema 15:25, 26.
Baebolo ne ɛngilehile kɛ anwuma Belemgbunlililɛ ne wɔ wɔ ahonle nu, mɔɔ kile kɛ ɔdi tumi wɔ awie ahonle nu a. Noko akee, ɔmaa yɛnwu kɛ “Belemgbunlililɛ ne anwo edwɛkɛ ne” anzɛɛ “Belemgbunlililɛ ne anwo edwɛkpa” ne kola ka yɛ ahonle yɛɛ ɔwɔ kɛ ɔka yɛ ahonle.—Mateyu 13:19; 24:14.
Duzu a “Nyamenle belemgbunlililɛ ne wɔ bɛ nu” kile a?
Menli bie mɔ ɛngola ɛnnwu ɛleka fɔɔnwo mɔɔ Belemgbunlililɛ ne wɔ la ɔlua kɛzi bɛhile edwɛkɛ mɔɔ wɔ Luku 17:21 abo wɔ Baebolo ngilebɛbo bie mɔ anu la ati. Kɛ neazo la, King James Version ne ka kɛ “Nyamenle belemgbunlililɛ ne wɔ bɛ nu.” Amaa yɛade ngyɛnu ɛhye abo kpalɛ la, ɔwɔ kɛ yɛsuzu mɔɔ maanle ɔhanle edwɛkɛ ɛhye la anwo.
Ɛnee Nyamenle Belemgbunlililɛ ne ɛnle menli mɔɔ dwazo tia Gyisɛse mɔɔ bɛ ahonle ɛsolo na bɛle ahodiawu la ahonle nu
Ɛnee Gyisɛse ɛlɛtendɛ ahile Falasiima, ɛzonlenlɛ nu mgbanyima ekpunli bie mɔɔ dwazole tiale ye na bɛboale bɛmaanle bɛhunle ye la. (Mateyu 12:14; Luku 17:20) Asoo ndelebɛbo wɔ nu kɛ yɛbadwenle kɛ ɛnee Belemgbunlililɛ ne le debie mɔɔ wɔ bɛ ahonle ne mɔɔ ɛsolo la anu ɔ? Gyisɛse hanle hilele bɛ kɛ: “Nabalaba nee mɛladonlɛ ɛyi bɛ tɛkɛɛ.”—Mateyu 23:27, 28.
Baebolo ngilebɛbo bie mɔ kile Gyisɛse edwɛkɛ ne mɔɔ wɔ Luku 17:21 la anu wienyi kɛ: “Nyamenle belemgbunlililɛ ne wɔ bɛ nwo ɛke.” (Contemporary English Version) “Nyamenle Belemgbunlililɛ ne wɔ bɛ avinli.” (New World Translation) Ɛnee anwuma Belemgbunlililɛ ne wɔ Falasiima ne ‘anwo ɛkɛ’ anzɛɛ “bɛ avinli” ɔluakɛ ɛnee Gyisɛse mɔɔ Nyamenle ɛkpa ye kɛ ɔbali zolɛ Belemgbunli la gyi bɛ nyunlu ɛkɛ.—Luku 1:32, 33.
^ Kilisiene asɔne dɔɔnwo kilehile kɛ Nyamenle Belemgbunlililɛ ne wɔ sonla nu anzɛɛ awie ahonle nu. Kɛ neazo la, Southern Baptist Convention ne mɔɔ wɔ United States la hanle kɛ Nyamenle Belemgbunlililɛ ne a le “Nyamenle tumililɛ ne mɔɔ wɔ awie ahonle nee ye ɛbɛlabɔlɛ nu la.” Zɔhane ala a Pope Benedict XVI hɛlɛle ye wɔ ye buluku Jesus of Nazareth anu kɛ “Nyamenle Belemgbunlililɛ ne ba ahonle mɔɔ yɛ tieyɛ la anu.”
Bie A Eza Ɛ Nye Balie
ƐZINZALƐ ARANE
Nwane A Di Belemgbunlililɛ Ne Azo A?
Baebolo kɛlɛvoma dɔɔnwo hɛlɛle ninyɛne mɔɔ bamaa yɛanwu awie mɔɔ bayɛ Belemgbunli wɔ Nyamenle Belemgbunlililɛ ne azo la anwo edwɛkɛ dole ɛkɛ. Wɔ alesama tetedwɛkɛ nu, sonla ko pɛ ala a edwɛkɛ mɔɔ bɛha bɛvale Tumivolɛ mɔɔ fɛta la anwo la nee ye kɔ a.
BAEBOLO KPUYA MƆƆ BƐBUA
Duzu A Nyamenle Belemgbunlililɛ Ne Bayɛ A?
Sukoa ninyɛne mɔɔ ɛbahola wɔanyia wɔ mekɛ mɔɔ Nyamenle arane ne ɛlɛdi tumi wɔ azɛlɛ ye azo la.
