Ɛzoanvolɛ Dwɔn hanle Gyisɛse ɛbɛlabɔlɛ nu ninyɛne mɔɔ ɔhɛlɛle la anwo edwɛkɛ kɛ: “Ahenle mɔɔ nwunle ye la a ɛlɛdi daselɛ ɛhye a, na ye daselɛ ne le nɔhalɛ yɛɛ ɔze kɛ mɔɔ yeha la le nɔhalɛ, amaa bɛdabɛ noko bɛalie bɛali.”​—Dwɔn 19:35.

 Debie ko mɔɔ maa yɛdie Edwɛkpa ne mɔɔ Mateyu, Maake, Luku, nee Dwɔn hɛlɛle la yɛdi la a le kɛ bɛhɛlɛle ye wɔ mekɛ mɔɔ menli dɔɔnwo mɔɔ nwunle ninyɛne ɛhye mɔ mɔɔ bɛhanle nwolɛ edwɛkɛ la ɛnee de aze la. Bie mɔ kile kɛ bɛhɛlɛle Mateyu Edwɛkpa ne wɔ Kelaese ewule nzi ɛvolɛ mɔtwɛ ne azo, kɛyɛ 41 Y.M. Mbɔlɔba dɔɔnwo kile kɛ nzinlii a bɛhɛlɛle a, noko menli dɔɔnwo die to nu kɛ bɛhɛlɛle Kilisiene Giliki Ngɛlɛlera ne anu mbuluku ne amuala wɔ ɛvoya ne mɔɔ limoa Y.M. la anu.

 Menli mɔɔ nwunle Gyisɛse wɔ mekɛ mɔɔ ɔwɔ azɛlɛ ye azo, bɛnwunle ye ewule nu nee ye ewudwazo ne la, bahola ali mɔɔ wɔ Edwɛkpa ne anu la anwo daselɛ. Saa debie bie mɔɔ ɛnle nɔhalɛ la wɔ nu a, anrɛɛ bɛbahola bɛaha ye ndɛndɛ. Benleravolɛ Frederick F. Bruce ka kɛ: “Edwɛkɛ titili ko mɔɔ wɔ ɛzoanvolɛma ne mɔlebɛbo edwɛkɛhanlɛ ne anu la a le anwodozo mɔɔ bɛfa bɛtendɛ bɛkile tievolɛma mɔɔ ze ɛhye mɔ la; bɛanga ala kɛ, ‘Yɛdi ninyɛne ɛhye mɔ anwo daselɛ,’ eza bɛhanle kɛ, ‘Kɛ mɔɔ bɛdabɛ mumua ne bɛze la’ (Gyima ne 2:22).”