Ɛ ra se bɛlɛbɔ ye apo wɔ sukulu. Duzu a ɛbahola wɔayɛ a? Ɛbamaa bahwe ahenle anzo wɔ sukulu ɔ? Ɛbahile ɛ ra ne kɛzi ɔ nee ahenle bazie ye zo ɔ? Kolaa na wɔazi kpɔkɛ la, suzu apobɔlɛ nwo nɔhalɛ bie mɔ anwo.

•  Duzu a ɔwɔ kɛ menwu ye wɔ apobɔlɛ nwo a?

•  Kɛzi mebahola meaboa ɛ?

 Duzu a le apobɔlɛ? Apobɔlɛ kile kɛ awie anye fuu kɔ zo yeahile awie nyane anzɛɛ yeaha ye ɛzulolɛ. Ɔti, tɛ aholoba anzɛɛ amumuyɛ nyɛleɛ biala a le apobɔlɛ a.

 Deɛmɔti ɔhyia la: Menli bie mɔ bu nyɛleɛ biala mɔɔ bɛ nye ɛnlie nwo la kɛ ɔle “apobɔlɛ,” saa bɔbɔ ɔle kpole anzɛɛ ekyi a. Noko saa ɛsosɔ debie ekyi biala mɔɔ bɛbava bɛayɛ ɛ ra la azo a, ɛnrɛmaa ɔnrɛnwu kɛzi bɛdi akɛsakɛsa nwo gyima​—debie mɔɔ ɔwɔ kɛ ɔsukoa ye ɛyɛlɛ kɛkala amaa yeaboa ye kenle bie la.

 Baebolo ngyinlazo: “Mmafa ɛya ndɛndɛ.”​—Nolobɔvo 7:9.

Nɔhalɛ edwɛkɛ: Ɛbahola wɔali tɛnlabelɛ bie mɔ anwo gyima, noko tɛnlabelɛ bie mɔ bahola aboa ɛ ra yeamaa yeanwu kɛzi awie mɔ ɛlɛgyegye ye a ɔbahola yeali nwolɛ gyima la.​​—Kɔlɔsaema 3:​13.

 Na saa ɛ ra ka kɛ awie anye fuu ɛlɛkɔ zo agyegye ye ɛ?

•   Nyia abotane tie ɛ ra ne. Nea kɛ ɛbanwu (1) mɔɔ zile la nee (2) deɛmɔti bɛlɛbɔ ye apo la. Nea kɛ ɛbanwu edwɛkɛ ne akunlu nee ɔ nzi kolaa na wɔayɛ nwolɛ debie. Biza ɛ nwo kɛ, ‘Asoo edwɛkɛ ne amuala ɛne?’ Amaa wɔade edwɛkɛ ne abo kpalɛ la, bie a ɔwɔ kɛ ɛbiza ɛ ra ne kilehilevolɛ ne anzɛɛ ngakula gyɛne awovolɛ.

   Baebolo ngyinlazo: “Saa awie bua edwɛkɛ kolaa na yeade nɔhalɛ mɔɔ wɔ nu la a, ɔle koasea yɛɛ ɔ nyunlu gua aze.”​​—Mrɛlɛbulɛ 18:13.

•   Saa bɛlɛbɔ ɛ ra apo a, boa ye maa ɔnwu kɛ mɔɔ ɔbayɛ ye wɔ nwo la bahola amaa bɛagyakyi apobɔlɛ ne anzɛɛ bɛadoa zolɛ. Kɛ neazo la, Baebolo ne ka kɛ: “Mualɛ bɛtɛɛ pɛ ɛya zo, noko edwɛkɛ mɔɔ wowɔ la ka ɛya.” (Mrɛlɛbulɛ 15:1) Nɔhalɛ nu, nzenralɛlilɛ bahola azɛkye edwɛkɛ ne bɔkɔɔ, na yeamaa bahɔ zo bɛagyegye ye kpalɛ.

   Baebolo ngyinlazo: “Bɛmmafa ɛtane bɛtua ɛtane kakɛ anzɛɛ aholoba bɛtua aholoba kakɛ.”​​—1 Pita 3:9.

•   Kilehile nu kile ɛ ra ne kɛ saa yeanli nzenralɛ a ɔngile kɛ ɔle bobonyia. Emomu ɔkile kɛ ɔ nwo yɛ se, ɔluakɛ yeammaa awie mɔ angile ye mɔɔ ɔwɔ kɛ ɔyɛ a. Wɔ adenle bie azo, yeli apobɔlɛ ne azo mɔɔ yeambɔ awie apo a.

   Ɔwɔ kɛ ɛ ra ne kakye edwɛkɛ ɛhye, titili saa bɛlɛbɔ ye apo wɔ yintanɛte ne azo a. Saa ɛ ra ne nee awie mɔ sie ye zo wɔ yintanɛte ne azo a, ɔbamaa bɛanyia anwosesebɛ bɛahɔ zo bɛagyegye ye na ɔdaye noko yeabɔ awie mɔ apo! Ɛhye ati, ɔdwu mekɛ ne bie a ɔle kpalɛ kɛ ɔnrɛdɛne bɛ zo​​—na ɛhye bamaa apobɔlɛ ne azo apɛ na yeabɔ ɛ ra ne anwo bane.

   Baebolo ngyinlazo: “Saa ɛyɛne ɛnle ɛkɛ a, senle nu.”​​—Mrɛlɛbulɛ 26:20.

•   Ɔdwu mekɛ ne bie a, ɔwɔ kɛ ɛ ra ne nea kɛ ɔnrɛbikye menli mɔɔ bɔ apo la anzɛɛ ɔnrɛhɔ ɛleka zɔhane mɔ. Kɛ neazo la, saa ɔze kɛ awie anzɛɛ menli ekpunli bie mɔɔ bɔ apo la wɔ ɛleka bie a, ɔbahola yeahɔva ɛleka fofolɛ.

   Baebolo ngyinlazo: “Sonla mɔɔ anye gyi ɔ ti anwo la nwu esiane na ɔfa ɔ nwo ɔfea, noko mɔɔ ɛnlɛ anwubielɛ la kɔ ɔ nyunlu fɔɔnwo na ɔnwu nwolɛ amaneɛ.”​​—Mrɛlɛbulɛ 22:3.

 SƆ ƐHYE NEA: Boa ɛ ra maa ɔzuzu kɛzi mɔɔ ɔbayɛ la babɔ ɔ nwo bane anzɛɛ bagyegye ye la anwo. Kɛ neazo la:

•  Saa yeampili awie mɔɔ ɛlɛbɔ ye apo la a, duzu a bazi a?

•  Na saa ɔfa anwodozo ɔka ɔkile ahenle kɛ ɔgyakyi ɛ?

•  Na saa ɔka edwɛkɛ ne ɔkile ye kilehilevolɛma ɛ?

•  Asoo ɔbahola yeaha ɛzelekɛ edwɛkɛ bie yeamaa ahenle agyakyi ye ɔ?

 Saa ahenle mɔɔ ɛlɛgyegye ɛ ra la gyi ɔ nyunlu anzɛɛ ɔwɔ yintanɛte ne azo bɔbɔ a, biala le ngakyile. Ɔti ɛ nee ɛ ra ɛbɔ nu ɛkpondɛ ndenle kpalɛ mɔɔ ɔbalua zo yeali nwolɛ gyima la. Maa ɔnwu ye kɛ ɛbahɔ zo wɔaboa ye.

 Baebolo ngyinlazo: “Agɔnwolɛ kpalɛ da ɛlɔlɛ ali mekɛ biala yɛɛ ɔle adiema mɔɔ bɛwo ye bɛmaa anwongyelelɛ mekɛ.”​​—Mrɛlɛbulɛ 17:17.