EMINYEETO NIBABUUZA
Nindeebeka Nta?
Ahabw’enki oine kufayo aha njwara yaawe? N’ahabw’okugira ngu enjwara neeyoreka eki ori. Neeyoreka ngu ori muntu wa muringo ki?
Enshobe ishatu z’amaani ezirikukira kukorwa omu mishono n’oku orikubaasa kuzeetantara
Enshobe #1: Okwikiriza ab’eby’empurizana kukucweramu oku oraareebekye.
“Obumwe ninkunda omushono ahabw’okugira ngu ndeebire ebirango bingi ebirikugukwataho,” nikwo Theresa arikugira. “Obwongo bwawe bwamanyiira ebishushani by’abantu abajwaire omu muringo nanka, nikibaasa kuguma kutabatooreza.”
Abaishiki tibo bonka abarikukwatwaho ebirango. “Aboojo nabo nibakwatwaho emishono. Tiharikuhinguraho obwire buraingwa batareebire ekintu ekirikurangwa ahabwabo omu katare.” nikwo ekitabo Everything Guide to Raising Adolescent Boys kirikugira.
Obuhabuzi burungi: Baibuli neegira eti: “Otaine bwengye aikiririza eryo, kwonka omwerinzi ayetegyereza ahu arikuraba.” (Enfumu 14:15) Okuhikaana n’omusingye ogu, yega kushwijuma gye ebiri omu birango. Nk’eky’okureeberaho, waareeba emyenda ehandiikireho ebigambo nka “ni kirungi,” “nikishemeza,” nari “nikireetera abantu kukurigira,” yebuuze oti:
‘N’oha orikugoba naakuratira omushono ogu?’
‘Nikiija kundeetera kushushanisibwa n’abantu ba muringo ki?’
‘Omushono ogu nigwija kworeka kyenyini eki ndi?’
Akakoryo k’omushono: Kumara saabiiti, yetegyereze gye ebirango by’emyenda n’ebindi ebirikukwata aha mishono. Ni mishono ki ei barikurangirira? Ebirango ebyo birimu obutumwa obwekiikire oburikworeka ngu oine kukuratira omuhango nanka? “Hariho okugyemeserezibwa kw’amaani okw’okwenda kureebeka gye, kujwara gye, n’okworeka omubiri gwawe murungi,” omunyeeto orikwetwa Karen nikwo arikugira. “Abarikuranga nibamanya ngu kyorobi kutega eminyeeto okabakwatsa.”
Enshobe #2: Okwikiriza endeebeka emwe ahabw’okwenda kujwarana n’abandi.
“Omushono gw’emyenda gwaba guhangire,” omunyeeto orikwetwa Manuel nikwo arikugira, “nikimanyisa ngu buri omwe naija kujwara atyo. Waaba otajwaire otyo, abantu nibaija kukucwera orubanja.” Omunyeeto orikwetwa Anna nawe naikirizana nawe. “Eki barikutwara nka kikuru ti mushono gw’emyenda, ekikuru n’okujwarana n’abandi,” nikwo arikugira.
Obuhabuzi burungi: Baibuli neegira ati: “Mutashushanisibwa n’ab’obusingye obu.” (Abarooma 12:2) Kuhikaana n’obuhabuzi obu, yetegyereze emyenda yaawe, reero oyebuuze oti:
‘Nintoorana emyenda yangye ndikwihirira ahari ki?’
‘Nintwara okugura emyenda y’omurembe nka kikuru?’
‘Niinteeraho kushemeza abantu ahabw’emijwarire yangye?’
Akakoryo k’omushono: Omu mwanya gw’okureeba emiringo ebiri yonka, nk’ebihangire nari ebihwaire aha murembe, teekateeka aha muringo gwa kashatu: okweyikiririzamu n’oburinzi. Oku orikwongyera kwehurira gye, nikwo orikwongyera kutuubya aha kutiina kw’okwenda kujwarana n’abandi.
Enshobe #3: Okuteekateeka ngu ‘okurigirwa, nikyo kirungi.’
“Amazima gari ngu, obumwe noobaasa kwohibwa kujwara kubi, nk’ebigufu, ebikukwatsire, nangwa n’ebirikureeberwamu,” omwishiki orikweta Jennifer nikwo arikugira.
Obuhabuzi burungi: Baibuli neegira eti: “Okwecuma kwanyu kurekye kuba okw’aha ruguru . . . okw’omunda omu mutima.” (1 Petero 3:3, 4) Kuhikaana n’obuhabuzi obu, teekateeka aha kirikukirayo kukureetera kukundwa, nibwo oburungi bw’omunda.
Akakoryo k’omushono: Omushono ogurikukirayo oburungi n’okuba oringaniire. Amazima gari ngu, eki ti kigambo ekirikukundwa baingi hati. Kwonka kiteekateekyeho oti:
Oragaaniireho n’omuntu orikugamba munonga kandi arikwegambaho wenka? Eky’obusaasi, omuntu ogwo naabaasa kuba atarikumanya ngu entwaza ye neekureetera kumwetantara!
Okujwara, ni nk’okugaaniira, nikubaasa kureetera bagyenzi baawe kukwetantara
Waajwara ebitaringaniire, nooba waaba nk’omuntu ogwo. Emijwarire yaawe neeba neeyohereza obutumwa ngu ‘mundeebe,’ kandi eki nikibaasa kukureetera kuhurira otaine burinzi nari kwetaho omutima nari byombi. Kandi noobaasa n’okushusha ngu oriyo noohuuza ngu okundwe buri omwe nangwa n’abantu ababi.
Omu mwanya gw’okuranga ekintu eki otarikuguza, teeraho kuba oringaniire. “Okuba oringaniire omu mijwarire tikirikumanyisa ngu oine kujwara nka nyokwenkuru,” omunyeeto orikwetwa Monica nikwo arikugira. “Nikimanyisa bumanyisa ngu nooyeha ekitiinisa na bagyenzi baawe abandi.”
