Obukama bwa Ruhanga shi Buri omu Mutima Gwawe?
Eki Baibuli erikugarukamu
Ngaaha, Obukama bwa Ruhanga ti nyehurira eri omu mitima y’Abakristaayo. a Baibuli neeyoreka gye ahu Obukama obwo buri erikubweta “Obukama bw’omu iguru.” (Matayo 4:17, Baibuli eya King James) Yetegyereze oku Baibuli erikworeka ngu Obukama ni gavumenti eyaabuzima erikutegyekyera omu iguru.
Obukama bwa Ruhanga bwine abategyeki, abarikutegyekwa, ebiragiro, n’obushoboorozi bw’okureetera ebi Ruhanga arikukunda kukorwa omu iguru n’omu nsi.—Matayo 6:10; Okushuuruurwa 5:10.
Gavumenti ya Ruhanga, nari Obukama, nibuza kutegyeka ‘amahanga goona, n’enganda zoona z’endimi ezitari zimwe’ omu nsi. (Danieli 7:13, 14) Obushoboorozi bw’obutegyeki obu tiburikuruga omu bantu abarikutegyekwa, beitu ahari Ruhanga.—Zaaburi 2:4-6; Isaaya 9:7.
Yesu akagambira entumwa ze abeesigwa ngu bakaba nibaija kumwegaitaho omu Bukama bw’omu iguru ‘kushutama aha bitebe by’obugabe.’—Luka 22:28, 30.
Obukama bwine abazigu baabwo, abu buraacwekyereze.—Zaaburi 2:1, 2, 8, 9; 110:1, 2; 1 Abakorinso 15:25, 26.
Baibuli terikwegyesa ngu Obukama bwa Ruhanga buri omu mutima gwawe okashusha ngu nibutegyekyera omu mutima. Kwonka, neeyoreka ngu ‘ekigambo kya Ruhanga’ nari ‘amakuru marungi g’Obukama’ gaine kuhindura emitima yaitu.—Matayo 13:19; 24:14.
Mbwenu shi ebigambo “obukama bwa Ruhanga buri” naimwe nibimanyisa ki?
Abantu abamwe nibabuzabuzibwa ahu Obukama bwa Ruhanga buri ahabw’ebiri omuri Luka 17:21 omu nvunuura za Baibuli ezimwe. Nk’eky’okureeberaho, Baibuli ey’Orunyankore neegira ngu “obukama bwa Ruhanga buri omuriimwe.” Kubaasa kwetegyereza gye ekyahandiikirwe eki, twine kushwijuma ebikyetooroire.
Obukama bwa Ruhanga bukaba butari omu mitima y’abaitsi ba Yesu abagomi.
Yesu akaba naagamba n’Abafarisaayo, abeebembezi b’ediini abaabaire nibamuhakanisa, kandi abaayegaitsire aha baamwitsire. (Matayo 12:14; Luka 17:20) Mbwenu shi nikikora amakuru kuteekateeka ngu Obukama bukaba buri omu mitima yaabo emigomi? Yesu akabagira ati: “Omunda mwijwire oburyarya n’obugomi.”—Matayo 23:27, 28.
Envunuura za Baibuli ezindi nizigamba gye ebigambo bya Yesu ebiri omuri Luka 17:21: “Obukama bwa Ruhanga buri aha naimwe.” (Baibuli eya Contemporary English) “Obukama bwa Ruhanga buri naimwe.” (Baibuli eya New World Translation) Obukama bwa Ruhanga okuba “naimwe” nari “aha gati“ y’Abafarisaayo, kikaba nikimanyisa ngu Yesu otoorainwe Ruhanga kuba Omugabe akaba ari aho nabo.—Luka 1:32, 33.
a Amadiini maingi agarikweyeta Amakristaayo nigeegyesa ngu Obukama bwa Ruhanga nibuba buri omu muntu, nari omu mutima gwe. Nk’eky’okureeberaho, omuri United States, ab’ediini ya Southern Baptist Convention omu bugufu barikugamba aha Bukama bwa Ruhanga, bakagira ngu “obutegyeki bwa Ruhanga buri omu mitima y’abantu n’amagara gaabo.” Kandi, omu kitabo Jesus of Nazareth, Paapa Benedict XVI akagira ngu “Obukama bwa Ruhanga nibwija ahabw’okuhurikiza kw’omutima.”
Noobaasa Kukunda n'Ebi
ENYEGYESA ZA BAIBULI ENKURU
Obukama bwa Ruhanga Niki?
Yesu omu buheereza bwe bwona, akeegyesa aha Bukama bwa Ruhanga kukira ebintu ebindi. Kumara ebyasha bingi, abakuratsi be batwire nibashaba ngu Obukama obwo bwije.
OMUNAARA GW'OMURINZI
Omugabe w’Obukama bwa Ruhanga n’Oha?
Abahandiiki ba Baibuli bakahandiika omu bwijwire ebirikukwata ahari Ogwo owaabaire naija kuba Omugabe w’Obukama bwa Ruhanga. Omu byafaayo by’abantu, omuntu omwe wenka niwe arikuhikiiriza ebyagambirweho.
ENYEGYESA ZA BAIBULI
Gyezaho Omushomo Gwaitu gwa Baibuli
Yejumbe omu mushomo gw’okuhikaanisa ebiteekateeko ahari Baibuli oine orikukuhwera.