Omuntu Naabaasa Kucwamu Kurekyera aho Kuba Omujurizi wa Yehova?

TANDIKA

Eego. Omuntu naabaasa kuruga omu kibiina kyaitu omu miringo ebiri:

Arikushaba kurugamu. Omuntu naabaasa kugamba butunu nari kuhandiika ngu takyenda kwetwa Omujurizi wa Yehova.
Omu bikorwa. Omuntu naabaasa kukora ekintu ekirikworeka gye ngu takyenda kuba omwe aha b’oruganda rwaitu orw’ensi yoona. (1 Petero 5:9) Nk’eky’okureeberaho, naabaasa kuza omu diini endiijo, kandi ayorekye butunu ngu naayenda kugigumamu.—1 Yohaana 2:19.

Kandi shi omuntu ku yaakuba atakibuurira nari atakiza mu nteerane? Nimureeba omuntu ogwo nk’otakiri omwe ahariimwe?

Ngaaha, tikwo kiri. Omuntu okwetaanisa aha kibiina kyaitu, nikitaana n’okuhwamu maani omu kwikiriza. Kaingi, abarikugaruka enyima nari abarikurekyera aho kukora ebintu ebimwe omu kuramya, nibaba bakiine okwikiriza kwonka bahwairemu amaani. Omu mwanya gw’okucwa abantu nk’abo, nituteeraho kubagumya n’okubahwera. (1 Abatesalonika 5:14; Yuda 22) Omuntu nk’ogwo yaaba naayenda obuhwezi, abareeberezi b’ekibiina nibo barikwebembera omu kumuhwera omu by’omwoyo.—Abagalatia 6:1; 1 Petero 5:1-3.

Kwonka, abareeberezi tibaine bushoboorozi bw’okugyema omuntu kuguma ari Omujurizi wa Yehova. Buri muntu naayecweramu aha bikwatiraine n’ediini. (Yoshua 24:15) Nitwikiriza ngu abarikuramya Ruhanga baine kumuramya beekundiire, kuruga aha mutima.—Zaaburi 110:3; Matayo 22:37.