Ni kakoryo ki akarikubaasa kukuhwera kushoma gye Baibuli n’okugigasirwamu omu bwijwire? Yetegyereze obukoryo butaano obugasiire baingi.

Shomera omu mwanya murungi. Teeraho kusherura omwanya ogucureire. Tuubya aha birikuhuzya kugira ngu ote omutima aha bi orikushoma. Ekyererezi kirungi n’omwoyo murungi nibibaasa kukuhwera kugasirwa omu kushoma kwawe.

Ta ebiteekateeko byawe omu nteeko. Obu Baibuli erikuruga ahari Tataitwe ow’omu iguru, noija kugasirwa waagira emiteekateekyere nk’ey’omwana orikuba oyeteekateekire kwegyesibwa ishe. Waaba noobangaanisa nari oine emiteekateekyere egwire ahari Baibuli, bite aha rubaju kugira ngu Ruhanga akwegyese.—Zaaburi 25:4.

Shaba otakashomire. Baibuli erimu ebiteekateeko bya Ruhanga, n’ahabw’ekyo tikirikutangaaza kureeba ngu nitwenda obuhwezi bw’okugyetegyereza. Ruhanga naaraganisa ‘kuha omwoyo gurikwera abo abarikumushaba.’ (Luka 11:13) Omwoyo gurikwera nigubaasa kukuhwera kwetegyereza emiteekateekyere ya Ruhanga. Haahinguraho obwire, nigwija kwigura ebiteekateeko byawe, kwetegyereza ebitoorobi kwetegyereza ‘ebya Ruhanga.’—1 Abakorinso 2:10.

Shoma kwetegyereza. Otashoma kuheza buheza ebi orikushoma. Teekateeka aha bi orikushoma. Yebuuze ebibuuzo nk’ebi: ‘Ou ndikushomaho akaba aine mitwarize ki? Nimbaasa kugyendera nta bi ndikushoma?’

Taho ebigyendererwa. Kubaasa kugasirwa omu kushoma Baibuli, teeraho kwega ekintu kisya. Noobaasa kutaho ebigyendererwa nk’ebi: ‘Niinyenda kwega ebirikukwata ahari Ruhanga wenyini.’ ‘Niinyenda kuba omushaija murungi nari omukazi murungi.’ Bwanyima toorana Ebyahandiikirwe ebiraakuhwere kuhikiiriza ebigyendererwa byawe. *

Obukoryo butaano obu, nibubaasa kukuhwera kutandika kushoma Baibuli. Kwonka shi noobaasa kwongyera kukunda kushoma Baibuli? Ekicweka ekirikukurataho kirimu obuhabuzi.