OMUTWE OGURI AHA MUNAARA | NOOBAASA KWETEGYEREZA BAIBULI
Ahabw’enki Oine Kwetegyereza Baibuli?
“Baibuli n’ekitabo ky’ediini ekirikumanywa munonga. Kwonka abantu ba China tibarikukyetegyereza, n’ebirimu tibirikubakwataho.”
—LIN, CHINA.
“Ndemirwe kwetegyereza ebitabo ebirikwera eby’ediini yangye eya Hindu. Mbwenu shi nimbaasa nta kwetegyereza Baibuli Erikwera?”
—AMIT, INDIA.
“Baibuli ningiha ekitiinisa ahabw’okuba ekitabo kya ira kandi nimpurira ngu niyo erikukirayo kugira akatare. Kwonka nyowe tinkagireebaga.”
—YUMIKO, JAPAN.
Abantu baingi omu nsi nibaha Baibuli ekitiinisa. Kwonka nibabaasa kuba nibagimanyaho kakye nainga bataine eki barikugimanyaho. Nikyo kimwe n’obukaikuru bw’abantu omuri Asia, nangwa n’omu mahanga maingi ahu Baibuli ejanjaire munonga.
Kwonka noobaasa kwebuuza oti: ‘Ahabw’enki nyine kufayo kwetegyereza Baibuli?’ Okumanya ebiri omu kitabo eki ekirikwera, nikibaasa kukuhwera omu miringo egi:
-
Okutunga okumarwa n’okushemererwa
-
Okusingura oburemeezi bw’eka
-
Okusingura okwerarikirira
-
Okushemeza omukago gwawe n’abandi
-
Okukoresa gye sente
Nk’eky’okureeberaho, Yoshiko kuruga Japan, akeebuuza eki Baibuli erikugambaho, reero yaacwamu kugishoma. Niki ekyarugiremu? Naagira ati: “Baibuli empwereire kugira ekigyendererwa n’amatsiko g’ebiro by’omumaisho.” Naayongyeraho ati: “Tinkyehurira nk’otaine mugasho.” Amit, owaaba yaagambirweho, akacwamu kushwijuma Baibuli. Naagira ati: “Kikantangaaza, Baibuli erimu obuhabuzi bwa buri omwe.”
Baibuli ehwereire obukaikuru bw’abantu kuhindura emitwarize yaabo. Naiwe noobaasa kugishwijuma oreebe oku erikubaasa kukugasira.
