Nkakurira omu rurembo Alicante, omuri Spain. Eka yaitu ekaba erimu omwaga, n’ahabw’ekyo kuruga omu bunyeeto obwire bwangye obwingi nkaba nimbumarira aha nguuto. Haihi n’enju yaitu hakaba hariho eikanikiro ry’emipiira y’emotoka. Nkanywana omwe aha bakozi omu ikorero eryo orikwetwa José María. Akaba naanfaho munonga kandi eki nikyo naabaire ntarikutunga omu ka yaitu. Omu bwire bw’oburemeezi, akaba ari nka mwene tata kandi munywani wangye owaabuzima n’obu araabe yaabaire naankiza emyaka 20.

Abajurizi ba Yehova bakaba batandikire kwegyesa José María Baibuli. Akaba naakunda Ebyahandiikirwe, kandi butoosha akaba agambira aha mazima ga Baibuli. Nkaba muhurikiza, beitu ntarikufayo aha bi arikugamba. Omutima gwangye gw’obunyeeto gukaba gurimu ebintu bingi. Kwonka ekyo kikaba kiri haihi kuhinduka.

Tindikukunda kugamba munonga ahari butandu egyo. Nimbaasa kugira ngu nkaba ndi omushema kandi ndikuvugira eryo ntarikufayo. Omu kiro kimwe, amagara gangye gakahindukira kimwe. Ahonaaho nkeeshanga ntarikubaasa kwimuka omu irwariro ahabw’okusharara, kandi nkaba ntakiine maani gangye g’obunyeeto. Okwikiriza embeera yangye kikaba kingumiire munonga. Nkaguma niinyebuuza nti: ‘Hariho ekigyendererwa omu kubaho?’

José María akaija kundeeba, kandi ahonaaho yaakora entebeekanisa kugira ngu Abajurizi ba Yehova kuruga omu kibiina ekiri haihi bagume nibantayaayira omu irwariro. Ebi baabaire bagaaniira naanye omu kutaayaaya okwo bikaba bimpika aha mutima. Ahonaaho ku naabairemu gye, nkatandika kwega Baibuli. Nkamanya enshonga ahabw’enki abantu nibabonabona kandi bakafa, n’ahabw’enki Ruhanga naareka ebintu bibi kubaho. Nkeega n’ekiraganiso kya Ruhanga eky’ebiro by’omumaisho, obu ensi yoona eraabe eijwire abantu abahikiriire kandi hatariho n’omwe orikugira ati: “Ndwaire.” (Isaaya 33:24) Ogu nigwo gwabaire guri omurundi gwangye gw’okubanza kugira amatsiko.

Ku naarugire omu irwariro, nkeyongyera omu maisho omu kwega Baibuli. Ndikukoresa akagaari k’omutaano, nkabaasa kuza n’omu nteerane ezimwe ez’Abajurizi ba Yehova, naayejumba n’omu murimo gwabo ogw’okubuurira. Aha myaka 20 omuri Novemba 5, 1988, nkabatizibwa ndikwibikwa omu maizi omu kinaabiro ky’omutaano. Yehova Ruhanga ampwereire kugira emiteekateekyere mirungi. Kwonka shi nkaba nyine kukora ki kworeka okusiima kwangye?

Nkaba mmaririire kutaikiriza embeera yangye kundemesa kukora kyona ekirikubaasika omu buheereza bwa Yehova. Nkaba niinyenda kutunguuka. (1 Timoseo 4:15) Omu kubanza ekyo kikaba kitoorobi, ahakuba ab’omu ka yaitu bakaba nibahakanisa enyikiriza yangye ensya. Kwonka nkaba nyine abaikiriza bagyenzi bangye, nibo b’eishe-emwe na banyaanyazi. Bakaba bahamya ngu tinaayosha nteerane, kandi bakaba bampwera n’okwejumba omu murimo gw’okubuurira.

Kwonka obwire ku bwahingwireho, kikeeyoreka gye ngu nkaba ninyija kwetenga kureebererwa obwire bwona. Bwanyima y’okusherura munonga, nkarugaho naatunga omwanya murungi gw’okureebereramu abaine obumuga omu rurembo Valencia, mahiro 100 omu bukiizi-bwa-bumosho bwa Alicante. Omwanya ogu gukahinduka eka yangye y’obutwire.

N’obu ndaabe ntarikwimuka aha kitanda, nkaba mmaririire kugumizamu nimpereza Yehova. Ndikukoresa esente ezirikuheebwa abamugire n’obundi buhwezi, nkagura kompyuta reero baaginteera haihi n’ekitanda kyangye. Kandi nkagura esimu. Hati, buri kasheeshe, orikundeeberera naataho kompyuta yangye aigura n’esimu yangye. Hariho akantu akakomire aha kompyuta yangye aku ndikwimata n’omureju gwangye. Kandi nyine n’akati k’omutaano aku ndikukwatisa omunwa. Akati aka nikambaasisa kwimata enamba aha kompyuta n’esimu yangye.

Entebeekanisa egi empwereire eta? Eky’okubanza, neembaasisa kuza aha Mukura gwaitu ogwa jw.org na Watchtower Raiburare y’aha mukura. Entebeekanisa egi ka empwereire munonga! Ninkira kumara eshaaha nyingi buri izooba ndikwega kandi ndikucondooza omu bitabo ebirikushoboorora aha Baibuli kugira ngu mbaase kugumizamu niinyega ahari Ruhanga n’emitwarize ye mirungi. Kandi ku ndikuhurira eihamba nari naahwamu amaani, butoosha aha Mukura nihaba hariho ekintu ekirikungaruramu amaani.

Kompyuta yangye neembaasisa kuhurikiza n’okwejumba omu nteerane z’ekibiina. Nimbaasa kugarukamu omu nteerane, kushaba, kuha embazo, nari nshome Omunaara gw’Omurinzi, naaba mpairwe obujunaanizibwa obwo. N’obu ndaabe ntarikubaasa kuza omu nteerane ezo butunu, nimpurira ngu ndi omwe aha bari omu kibiina.

Kandi okugira esimu na kompyuta nikimbaasisa kwejumbira kimwe omu murimo gw’okubuurira. N’amazima, tindikubaasa kuza kubuurira enju aha nju nk’oku Abajurizi ba Yehova baingi barikukora. Kwonka ekyo tikindemeise. Ndikukoresa esimu na kompyuta nimbaasa kumanyisa abandi enyikiriza yangye. Buzima, ninkunda munonga kugaaniira n’abantu aha simu n’abareeberezi bakahika n’aha kunshaba ngu mbe niinye naareeberera entebeekanisa y’ekibiina ey’okukoresa esimu omu kubuurira. Entebeekanisa egi ehwereire ab’eishe-emwe omu kibiina abatarikubaasa kuruga omu nju.

 Kwonka amagara gangye tigarikukorera aha byoma byonka. Buri izooba, banywani bangye nibaija kundeeba. Nibaija n’abanyabuzaare na banywani baabo abarikwenda kwega Baibuli. Emirundi mingi, nibanshaba kuba niinye naayebembera okwega okwo. Amazooba agandi, ab’amaka nibantaayaayira reero baanshaba kwejumba omu kuramya kwabo okw’eka. Okukira munonga ninshemererwa abaana ku barikushutama aha rubaju rw’ekitanda kyangye reero bakangambira ahabw’enki nibakunda Yehova.

Ninkunda kugira abagyenyi baingi. Ekishengye kyangye nikikira kuba kiijwiremu banywani bangye kuruga omu myanya etari emwe n’emwe. Buzima, abantu okunfaho bati nikitangaaza abarikundeeberera. Buri izooba, ninsiima Yehova ahabw’okunyikiriza kuba omwe aha b’eishe-emwe barungi aba.

Buri murundi ogu omuntu arikundamutsya akambuuza ngu ori ota, nimugarukamu nti, “Ndi aha, ningumizamu nindwana!” Buzima, nimmanya ngu tindi nyenka omu kurwana oku. Embeera zoona ezi turaabe turimu nari obumuga obu twine, Abakristaayo boona bari omu ‘kurwana okurungi okw’okwikiriza.’ (1 Timoseo 6:12) Niki ekimpwereire kugumizamu kumara emyaka mingi n’obu kiraabe kibaire kigumire? Ninshaba buri izooba kandi nyebaza Yehova ahabw’okumpwera kigira ekigyendererwa. Kandi ninteeraho kugira bingi by’okukora, kuheereza Ruhanga nk’oku kirikubaasika, ndikuta omutima gwangye aha matsiko g’ebiro by’omumaisho.

Ninkira kuteekateeka aha nsi ensya n’oku ndikwija kushemererwa ku ndigarukamu kwiruka kandi nkaguruka. Obumwe, ninyeshunga na munywani wangye José María nawe orwaire polio ndikumugira ngu nitwija kwiruka hamwe omu mpaka z’okwiruka. Nimubuuza nti: “N’oha orikwija kusinga?” Naangarukamu ati: “Tikiine nshonga orasingye weena. Ekikuru, n’okuba omu Paradiso kwiruka omu mpaka.”

Kikaba kitoorobi kwikiriza embeera yangye y’oburema. Nimmanya ngu obu naabaire ndi omunyeeto, nkakora ekintu ky’obushema, kandi kindugiiremu oburemeezi bw’amaani. Kwonka, nyine okushemererwa ngu Yehova tarantsigireho. Ampaire bingi munonga, eka mpango y’eby’omwoyo, ekigyendererwa ky’okubaho, okushemererwa okurikuruga omu kuhwera abandi, n’amatsiko g’omuhendo ag’ebiro by’omumaisho. Naayenda kugamba oku ndikwehurira omu bugufu, nimbaasa kugira ngu Yehova buzima ampaire bingi kukira ebinshemereire.