“KU NAAHURIIRE ekirango ngu mutabani wangye yaabingwa, okaba nooshusha ngu ensi yaahika aha mperu,” Julian nikwo arikugira. “Niwe yaabaire ari omwana wangye omukuru, kandi tukaba nitukundana munonga; turikukora emirimo mingi hamwe. Akaba atwire ari eky’okureeberaho kirungi, kwonka akaija yaatandika kutwaza omu muringo mubi. Omukazi wangye nyina w’omwojo ogwo akaba akira kurira, kandi nkaba ntarikumanya oku ndikubaasa kumuhuumuriza. Tukaba tuguma nitwebuuza yaaba twamworoire kubi.”

Mbwenu nitubaasa kugira tuta ngu okubingwa n’entebeekanisa nungi, kandi obwo kurikureeta obusaasi bwingi? Ebyahandiikirwe nibiha nshonga ki aha bikwatiraine n’entebeekanisa y’okubingwa? Ahabw’enki omuntu naabingwa?

Ezi nizo nshonga ibiri ezirikureetera omwe aha Bajurizi ba Yehova kubingwa. Ey’okubanza, Omujurizi wa Yehova obatiziibwe naakora ekibi. Eya kabiri, naayanga kweteisa ekibi kye.

N’obu Yehova araabe naamanya ngu tituhikiriire, aine omutindo gw’obwecumi ogu arikwenda ngu abaheereza be bakuratire. Nk’eky’okureeberaho, Yehova naayenda ngu twetantare ebibi by’amaani nk’obushambani, okuramya ebishushani, obushuma, obusinzi, okwita, nari eby’obufumu.—1 Kor. 6:9, 10; Kush. 21:8.

Buzima omutindo gwa Yehova ogw’obwecumi tigugumire kandi niguturinda. Nituba nitwenda kutuura n’abantu barungi abaine obusingye, abu turikubaasa kwesiga. Ab’eishe-emwe na banyaanyazi-itwe nibo barikuba baine emitwarize nk’egyo, kandi niturinda okuraganisa oku twakozire obu twayehayo ahari Ruhanga ngu nitwija kuguma nitutwaza omu muringo ogurikuhikaana n’obuhabuzi oburi omu Kigambo kye.

Kwonka shi Omukristaayo obatiziibwe ku yaakukora ekibi ky’amaani ahabw’okutahikiirira? Abaheereza ba Yehova abeesigwa ira bakaba bakora enshobe nk’ezo, kwonka Ruhanga akaba atabangira kimwe. Omuntu orikumanywa gye omu nshonga egi, ni Daudi. Daudi akashambana kandi yaita, kwonka nabi Nasani akamugira ngu Yehova “yaihaho ekibi kyawe.”—2 Sam. 12:13.

Ruhanga akasaasira Daudi ekibi kye ahabw’okugira ngu Daudi akeeteisa. (Zab. 32:1-5) Nikyo kimwe, omuheereza wa Yehova obunaku obu naabingwa yaaguma naakora ekibi kandi akanga kweteisa. (Byak. 3:19; 26:20) Abareeberezi abarikuhurikiza enshonga y’omuntu osiisire baamanya ngu tayeteisiize kimwe, naaba ashemereire kubingwa.

Omu kubanza, nitubaasa kuteekateeka ngu okucwamu kubinga omusiisi ti kikorwa ky’embabazi, na munonga yaaba ari munywani waitu. Kwonka,  Ekigambo kya Yehova nikituhwera kwikiriza ngu okucwamu omu muringo ogwo, n’ekikorwa kya rukundo.

Yesu akagira ngu “obwengye busiimirwa aha mirimo yabwo.” (Mat. 11:19) Okucwamu kubinga omuntu otarikweteisa nikurugamu ebirungi. Yetegyereze ebirungi bishatu ebi:

Okubinga abasiisi nikuhaisa eiziina rya Ruhanga ekitiinisa. Obu turikwetererwa eiziina rya Ruhanga, Yehova, oku turikutwaza nikukwata aha iziina rye. (Isa. 43:10) Nk’oku emitwarize y’omwana erikubaasa kuhaisa abazaire be ekitiinisa nari kubajumisa, n’oku abantu barikutwara Yehova nikubaasa kurugiirira aha birungi nari ebibi ebi abarikwetererwa eiziina rye barikukora. Eiziina rya Ruhanga erirungi niriheebwa ekitiinisa, abantu abarikwetererwa eiziina eryo baaba nibagyendera aha mitindo ye erikukwata aha micwe. Nikwo kyabaire kiri kityo omu bunaku bwa Ezekieli, abantu b’amahanga bakaba nibamanya ngu eiziina Yehova riine akakwate n’Abayudaaya.—Ezk. 36:19-23.

Twaba nitushambana nituba nitujumisa eiziina rya Ruhanga eririkwera. Entumwa Petero akahana Abakristaayo ati: “Nk’abaana abarikuhurira, mutashushanisibwa nk’oku mwabaire muri, nimukurata okwetenga okubi omu butamanya bwanyu obwa ira; kureka nk’Ogwo owaabeetsire oku ari orikwera, naimwe mube nikwo mwaba abarikwera omu micwe yaanyu yoona; ahakuba kikahandiikwa ngu: Muryaba abarikwera, ahabw’okuba nyowe ndi orikwera.” (1 Pet. 1:14-16) Emicwe mirungi neehaisa eiziina rya Ruhanga ekitiinisa.

Omwe aha Bajurizi ba Yehova yaaguma naakora ekibi, banywani be nibabaasa kurugaho bakimanye. Okumubinga nikyoreka ngu Yehova aine abantu abashemeire abarikugyendera aha buhabuzi bw’Ebyahandiikirwe kubaasa kuguma bari abarikwera. Izooba rimwe omuntu otarikumanywa akaija omu nteerane aha Kyombeko ky’Obukama omuri Switzerland reero yaagira ngu naayenda kuba omwe aharibo. Munyaanya akaba abingirwe ahabw’obushambani. Akagira ngu akaba naayenda kuba omwe aha bantu “abatarikwikiriza emitwarize mibi.”

Okubingwa nikurinda ekibiina Ekikristaayo ekirikwera. Entumwa Paulo akarabura Abakorinso aha kabi k’okureka omu kibiina abarikushiisha bakigyendereire. Akagyeragyeranisa ebikorwa byabo bibi n’ekitumbisa ekirikutumbisa akantu kakye kakarugamu ekintu kihango. “Akatumbisa kakye katumbisa ekiihuro kyona,” nikwo yaagizire. Bwanyima akarabura ati: “Mwihe omuriimwe omuntu ogwo omubi.”—1 Kor. 5:6, 11-13.

Nikireebeka, “omuntu ogwo omubi” ou Paulo yaagambireho akashambana ekirenga, n’abandi omu kibiina baamanya emitwarize ye. (1 Kor. 5:1, 2) Kuri noogira ngu ekibi ekyo kikaikirizibwa kugumamu, Abakristaayo abandi nabo bakaba nibabaasa kukuratira emigyenzo y’obushambani eyaabaire eri omu rurembo oru baabaire nibatuuramu. Okwehuzya ebibi ebirikukorwa nkana nikureetera abantu kutafayo aha mitindo ya Ruhanga. (Mub. 8:11) Kandi, abasiisi abatarikweteisa nibabaasa kushiisha okwikiriza kw’abandi omu kibiina.—Yud. 4, 12.

Okubingwa nikubaasa kureetera omusiisi kwegarukamu. Izooba rimwe Yesu akagamba aha mwojo owaatsigireho eka ya ishe akagyenda akashiisha eby’obuhunguzi bwe arikutwaza kubi. Omwana ekirare akeega omu muringo gugumire ngu okutuura aheeru y’eka ya ishe kikaba kiri busha kandi eky’akabi. Omwana bwanyima akeegarukamu, yaayeteisa, kandi yaagaruka omu ka owaabo. (Luk. 15:11-24) Okushoboorora kwa Yesu okurikukwata aha ku ishe w’omwana ogwo yaashemereirwe bwanyima y’okwegarukamu, nikutuhwera kwetegyereza oku Yehova arikwehurira. Naatuhamiza ati: “Tinshemerererwa kufa kw’omubi, kureka omubi okureka omuhanda gwe akaba ohuriire.”—Ezk. 33:11.

Nikyo kimwe, ababingirwe abatakiri bamwe aha b’ekibiina Ekikristaayo eka yaabo ey’eby’omwoyo, nibabaasa kwijuka ebi bafeereirwe. Ebirikuruga omu kibi eki bakozire, baabigyeragyeranisa n’ebirungi ebi baatungire bakiine omukago murungi na Yehova hamwe n’abantu be, nibibaasa kubahwera kwegarukamu.

Entebeekanisa egi kubaasa kurugamu ebirungi  nikyetengyesa rukundo n’okumariirira. Omuhandiiki wa Zaaburi akagira ngu omuntu murungi yaamuteera, egyo neeba eri rukundo eyaabuzima nari yaamuhana ni nk’amajuta aha mutwe gwe. (Zab. 141:5) Nk’eky’okureeberaho: Teekateeka aha murambuzi oruhiire kimwe aha izooba ry’obutiti. Omubiri gwe nigufuka munonga yaatandika n’okuhwa amaani arikwenda kugwejegyera. Naamanya ngu yaagwa omu rubaare, naza kufa. Yaaba akiri aho ategyereize ab’okumucungura, ou ari nawe naaguma naamuteera empi ahamaisho kugira ngu atagwejegyera. Empi nizisaasa, kwonka nizibaasa kukiza amagara ge. Nikyo kimwe na Daudi, akaba naamanya ngu omuntu ohikiriire yaamuhana omu busaasi, naaba yaakikora ahabw’oburungi bwe.

Emirundi mingi, omuntu osiisire ku arikubingwa naaba yaatunga okuhanwa oku arikuba naayetenga. Bwanyima y’emyaka ikumi, mutabani wa Julian owaagambwaho aha kutandika, akahindura emicwe ye yaagaruka omu kibiina, kandi hati n’omureeberezi. Naagira ati: “Okubingwa kukangyemesereza kureeba butunu ebibi ebyarugire omu mitwarize yangye mibi.” Naayongyeraho ati: “Nkaba ninyetenga okuhanwa omu muringo ogwo.”—Heb. 12:7-11.

N’amazima, okubingwa n’akagwe omu by’omwoyo, kwonka akagwe ako omuntu tashemereire kukaikiriza kakarugamu ekihikiirizi ky’amaani. Twena tushemereire kuhamya ngu okubingwa kwahikiiriza ekigyendererwa kyakwo.

Abareeberezi abaine omurimo gugumire gw’okumanyisa obingirwe okucwamu kwabo, baine kugira rukundo nk’eya Yehova. Baaba nibamanyisa omuntu okucwamu kwabo, n’embabazi nibamushoboororera ebi aine kukora kubaasa kugarurwa omu kibiina. Abareeberezi ahabw’okwenda kwijutsya ababingirwe oku barikubaasa kugarukira Yehova, obumwe n’obumwe nibabaasa kutaayaayira abo aboorekire ngu bahindwire aha mitwarize yaabo. *

Ab’eka ye nibabaasa kworeka rukundo ei bainiire ekibiina n’ogwo obingirwe barikuha ekitiinisa entebeekanisa y’okubinga. Julian naagira ati: “Akaba akiri mutabani wangye. Kwonka emitwarize ye mibi ekaba eteire orugo ahagati yaitu.”

Boona omu kibiina nibabaasa kworeka rukundo erikwegamira aha misingye barikwetantara kukwatanisa n’okugaaniira n’omuntu obingirwe. (1 Kor. 5:11; 2 Yoh. 10, 11) Baakora batyo, nibooreka obukuru bw’okuhana oku Yehova amuhaire kurabira omu bareeberezi. Kandi, nibongyera kukunda n’okushagika ab’eka y’ogwo obingirwe abarikuba baine obusaasi abu tutashemereire kureetera kuteekateeka ngu titurikwenda kukwatanisa nabo.—Rom. 12:13, 15.

Julian akahendera ati: “Okubingwa n’entebeekanisa erikwetengyesa, erikutureetera kutwaza omu muringo ogurikuhikaana n’emitindo ya Yehova. Bwanyima y’obwire, nikurugamu ebirungi n’obu kuraabe nikureeta obusaasi. Ku ogire ngu nkaikiriza emitwarize mibi ya mutabani wangye, akaba atarikwija kukira.”