Nk’oku kyaba kyayorekirwe omu bicweka eby’enyima, Yesu akaba “naabuurira kandi naagamba ebigambo ebirungi by’obukama.” (Luka 8:1) Akaba agyenda engyendo ndaingwa munonga omuri Israeli kubaasa kwegyesa abantu ebirikukwata aha Bukama bwa Ruhanga. Okubuurira kwa Yesu kukahandiikwa omu bitabo bina eby’engiri, ebirikugamba aha Bukama emirundi erikurenga ahari 100. Bingi ebirikukwata aha Bukama nibishangwa omu bigambo bya Yesu, kandi nibyoreka bimwe aha bi Yesu yaagambire aha Bukama bwa Ruhanga.​—Yohaana 21:25.

Ahabw’enki Obukama bwabaire buri bukuru munonga ahari Yesu obu yaabaire ari omu nsi? N’ahabw’okugira ngu akaba naamanya ngu Ruhanga akamutoorana kuba Omugabe w’Obukama obwo. (Isaaya 9:6; Luka 22:28-30) Kwonka Yesu akaba atarikuta omutima aha kutunga obushoboorozi nari ekitiinisa. (Matayo 11:29; Mako 10:17, 18) Tarashagikire Bukama ahabw’okweyendeza. Okukira munonga, Yesu akaba naafayo aha Bukama bwa Ruhanga * kandi na hati naafayo ahabw’eki buraakorere ishe ow’omu iguru, n’abakuratsi be abeesigwa.

Yesu naakunda munonga ishe ow’omu iguru. (Enfumu 8:30; Yohaana 14:31) Naakunda munonga emitwarize y’ishe, nka rukundo, embabazi, n’oburingaaniza. (Eky’Ebiragiro 32:4; Isaaya 49:15; 1 Yohaana 4:8) Buzima, Yesu naayangira kimwe kuhurira ebishuba ebirikugambwa ahari ishe, ngu tarikufayo aha kubonabona kw’abantu kandi ngu naayenda ngu tubonabone. Egi niyo nshonga ahabw’enki Yesu yaabaire “naabuurira engiri y’obukama,” ahakuba akaba naamanya ngu nibwija kweza eiziina ry’ishe. (Matayo 4:23; 6:9, 10) Nibwija kukikora buta?

Yehova arikukoresa Obukama bwe, naija kukora empindahinduka z’amaani eziraahwere abantu. “Aryaragaza amarira goona” aha maisho g’abantu abeesigwa. Yehova naija kwihaho byona ebirikureeta amarira ago, ahabw’okuba “tiharibaho kufa bundi n’obu kwakuba okucura nari okurira nari obusaasi.” (Okushuuruurwa 21:3, 4) Ruhanga naija kukoresa Obukama kwihaho byona ebirikureetera abantu kubonabona. *

Tikirikutangaaza kureeba ngu Yesu akaba naaku nda kugambira abantu ebirikukwata aha Bukama! Akaba naamanya ngu nibwija kworeka oku ishe ari ow’amaani kandi ow’embabazi. (Yakobo 5:11) Kandi Yesu akaba naamanya ngu Obukama nibwija kugasira abantu abandi abeesigwa abu arikukunda.

Obu Yesu yaabaire atakaizire mu nsi, akaba naatuura omu iguru n’ishe. Ruhanga akakoresa Yesu kuhanga ebintu ebindi, nk’eiguru eririmu enyonyoozi nyingi, ensi ei turikutuuramu, n’enyamaishwa. (Abakolosai 1:15, 16) Okukira munonga, Yesu akaba naakunda munonga abantu.​—Enfumu 8:31.

Rukundo ei Yesu yaabaire ainiire abantu niyo yaabaire emureetera kubuurira. Okuruga aha kutandika, akakyoreka ngu akaija omu nsi “kubuurira abooro ebigambo ebirungi.” (Luka 4:18) Kwonka Yesu taragambire aha kuhwera abantu kwonka. Butoosha akaba akora ebirikworeka ngu naakunda abantu. Nk’eky’okureeberaho, abantu baingi ku bayeteeraniire hamwe kuhurikiza Yesu, akabagirira “embabazi, yaatambira abarwaire baabo.” (Matayo 14:14) Omushaija omwe owaabaire arwaire endwara y’amaani ku yaagizire ngu Yesu naabaasa kumukiza yaaba naayenda, rukundo ekahiga Yesu kumukiza. Ekyo akakikora arikumugambira ati: “Ninkunda; shemera.” (Luka 5:12, 13) Kandi Yesu ku yaareebire munywani we Mariamu arikurira ahabw’okufeerwa munyaanya Laazaaro, akatsinda “omu mutima gwe, yaagira obusaasi” kandi “yaarira.” (Yohaana 11:32-36) N’ahabw’ekyo akakora ekirikutangaaza yaazoora Laazaaro omu bafu n’obu araabe yaabaire amazire ebiro bina afiire!​—Yohaana 11:38-44.

Buzima, Yesu akaba naamanya ngu eky’okutangaaza ekyo nikiza kubahuumuriza kumara obwire bukye. Akaba naamanya ngu abu yaakirize endwara bakaba nibaija kugaruka kurwara, n’abu yaazoire bakaba nibaija kugaruka kufa. Kwonka Yesu akaba naakimanya ngu Obukama bwa Ruhanga nibwo buraiheho obubi bwona. Egi niyo nshonga ahabw’enki Yesu yaabaire atarikukora eby’okutangaaza byonka, beitu akaba abuurira ‘n’engiri y’obukama bw’omu iguru.’ (Matayo 9:35) Eby’okutangaaza ebi Yesu yaakozire bikaba nibyoreka eki Obukama bwa Ruhanga buri haihi kukora omu nsi yoona. Yetegyereze eki Baibuli erikuraganisa aha bwire obwo.

•  Tiharikwija kugaruka kubaho ndwara.

  “Obwo amaisho g’empumi garyahumuurwa, n’amatu g’ebifa-matu gaaryaigurwa; ekirema kiryaguruka nk’empara, n’orurimi rw’ekiteta rweshongore ahabw’okushemererwa.” Kandi, “tihaine mutuuzi waayo origira ati: Ndwaire.”​—Isaaya 33:24; 35:5, 6.

• Tiharibaho kufa.

  “Abahikiriire baryahungura ensi, bagituuremu ebiro byona.”​—Zaaburi 37:29.

  “Kandi Mukama RUHANGA aryamirira kimwe rufu, aragaze amarira aha maisho goona.”​—Isaaya 25:8.

• Abaafiire nibaija kuzooka.

  ‘Abari omu bituuro boona nibaija kuhurira eiraka rye, barugemu.’​—Yohaana 5:28, 29.

  “Haryabaho okuzooka.”​—Ebyakozirwe 24:15.

• Nihaija kuba hatariho ibura ry’emirimo n’oburaaro.

  “Baryayombeka amaju, bagatuuremu; baryabyara emizaabibu, barye ebijuma byayo. Tibaryombeka maju, abandi bakagataahamu; tibaribyara mizaabibu, ekariibwa abandi; . . . baryamara omwanya muhango nibashemerererwa ebi emikono yaabo ekozire.”​—Isaaya 65:21, 22.

• Tiharigaruka kubaho ntaro.

  “Amaraho engamba okuhika aha muheru gw’ensi.”​—Zaaburi 46:9.

  “Eihanga tiriribangira rindi rurara, kandi tibarigaruka kwega by’engamba.”​—Isaaya 2:4.

• Tiharigaruka kubaho eibura ry’eby’okurya.

  ‘Ensi eryareeta omweru gwayo, Ruhanga, Ruhanga waitu, aryatuha omugisha.’​—Zaaburi 67:6.

  “Haryabaho omweru mwingi omu nsi, emyaka eryakondakonda omu misiri omu bibungo.”​—Zaaburi 72:16.

•  Tiharigaruka kubaho bworo.

  “Abakyene tibariguma nibeeba.”​—Zaaburi 9:18.

  “Aryajuna omukyene, ku arimutakira, n’omworo otaine kihwera. Aryasaasira abooro n’abakyene, kandi amagara g’enshoberwa agajune.”​—Zaaburi 72:12, 13.

Waashwijuma okuraganisa oku okurikukwata aha Bukama bwa Ruhanga, nooreeba enshonga ahabw’enki Obukama ni bukuru ahari Yesu? Obu Yesu yaabaire ari omu nsi, buri omwe owaabaire ahurikiza akaba amugambira aha Bukama, ahakuba akaba naamanya ngu nibwo buraije kuhezaho oburemeezi obu turikureeba hati.

Ebiraganiso ebirikugambwaho omu Baibuli nibikushemeza? Ku kiraabe nikwo kiri, noobaasa kwega ota ebirikukiraho ebirikukwata aha Bukama? Kandi niki eki orikubaasa kukora kubaasa kugasirwa omu migisha egi? Ekicweka ekirikukurataho nikiza kugarukamu ebibuuzo ebyo.