Hariho Ediini Ei Orikubaasa Kwesiga aha by’Entaro?
ALBERTO owaabaire ari omu mahe kumara emyaka ikumi, akagira ati: “Omwegyesa waitu w’ediini akaba atuha omugisha arikugira ngu, Ruhanga ari naimwe. Kwonka nkaba nyebuuza, ka ndiyo ninza kwita, kandi obwo Baibuli neegira ngu otariita.”
Ray akaba ari omu mahe agarikurwanira aha maizi omu Rutaro rw’Ensi Yoona orwa II. Eizooba rimwe akabuuza omwegyesa waabo w’ediini ati: “Noija aha meeri yaitu kushabira amahe ngu gasingure. N’abazigu baitu tikwo barikukora?” Omwegyesa w’ediini ogwo akagarukamu ngu, mukama naakora omu miringo etarikwetegyerezibwa.
Eky’okugarukamu ekyo ku kiraabe nikikuteganisa, kimanye ngu tiiwe wenka.
NIKI EKI BAIBULI ERIKWEGYESA?
Yesu akagira ngu kimwe aha biragiro bya Ruhanga ebirikukira ebindi ‘n’okukunda mutaahi waawe nk’oku oyekunda.’ (Mako 12:31) Mbwenu shi Yesu akagira ngu tukunde abataahi abarikutuura haihi naitwe nari ab’eihanga ryaitu bonka? Ngaaha. Akagira abeegi be ati: “Ku muriguma nimukundana, nibwo abantu boona baribamanya ku muri abeegi bangye.” (Yohaana 13:34, 35) Okukundana kwabo kw’omutaano, kukaareeteire abantu boona kubamanya ngu n’abeegi ba Yesu. Omu mwanya gw’okwejumba omu kwita, nibaba beteekateekire kufeera bataahi baabo.
Abakristaayo ab’omu kyasha ky’okubanza bakaba nibagyendera aha bigambo bya Yesu. Ekitabo Encyclopedia of Religion nikigira kiti: “Baafaaza b’amakanisa, otwariiremu Tertullian na Origen, bakaba nibaikiriza ngu Abakristaayo tibaine kwita abantu, omusingye ogwabaire nigubahwera kutejumba omu mahe g’Abarooma.”
ABAJURIZI BA YEHOVA BO NIBATWAZA BATA?
Obu haihi buri ihanga ririmu Abajurizi ba Yehova, amahanga abiri gaaba nigarwana, bo tibarikwejumba mu kurwana okwo, kureka niboorekana rukundo akamanyiso kaabo akakuru.
Mbwenu shi amadiini gabaasize kwegyesa ahari rukundo ey’Ekikristaayo eyaabuzima?
Nk’eky’okureeberaho, omuri 1994 obu Abahutu n’Abatuutsi baabaire nibarwana omuri Rwanda, Abajurizi ba Yehova tibareejumbire mu kurwana okwo. Abajurizi ba Yehova kuruga omu nganda zombi bakaba barindana n’obu ekyo obumwe kyabaire kita amagara gaabo omu kabi. Obu Abahutu babiri abaarinzire ab’eishe-emwe bagyenzi baabo Abatuutsi baakwatwa, abaserukare Abahutu bakabagira bati: “Nituza kubaita ahabw’okuba muhwereire Abatuutsi kuhunga.” Eky’obusaasi, ab’eishe-emwe Abahutu bombi bakaitwa.—Yohaana 15:13.
Nooteekateeka ngu oku Abajurizi ba Yehova barikutwaza nikuhikaana na rukundo y’okwefeerereza ei Yesu yaatuhigire kugira?
