1. Daudi akagamba ki ahari Yehova, kandi ekyo kikamuhiga kukora ki?

OMUGABE DAUDI akagira ngu Yehova “ni mukuru, kandi ashemereire kuhimbisibwa munonga.” (Zab. 145:3) Akaba naakunda Yehova kyamuhiga kumuhimbisa ari “ahagati omu mutwe gw’abantu” nari omu kibiina. (Zab. 22:22; 40:5) Hatariho kubangaanisa, naiwe nookunda Yehova kandi noikirizana n’ebigambo bya Daudi ebirikugira ngu Yehova ‘Ruhanga wa Israeli tataitwe, osiimwe ebiro n’ebiro.’​—1 Bus. 29:10-13.

2. (a) Nitubaasa kuhimbisa tuta Yehova? (b) Abamwe baine buremeezi ki, kandi nituza kushwijuma ki?

² Obunaku obu, Yehova nitubaasa kumuhimbisa turikugarukamu omu nteerane z’Ekikristaayo. Kwonka ab’eishe-emwe abamwe, baine oburemeezi. Nibaba nibenda kugarukamu omu nteerane, kwonka batiina. Mbwenu shi nibabaasa kukora ki kusingura okutiina okwo? Kandi ni buhabuzi ki oburikubaasa kutuhwera twena kugarukamu ebirikugumya abandi? Tutakagarukiremu ebibuuzo ebi, ka tureebe enshonga ina nkuru ahabw’enki nitugarukamu omu nteerane.

3-5. (a) Nk’oku kirikworekwa omu Abaheburaayo 13:15, ahabw’enki nitugarukamu omu nteerane? (b) Eby’okugarukamu byaitu bishemereire kuba nibingana n’eby’abandi? Shoboorora.

³ Yehova atuhaire omugisha gw’okumuhimbisa. (Zab. 119:108) Eby’okugarukamu byaitu omu nteerane ni kimwe aha ‘bitambo byaitu by’okusiima,’ kandi tihaine orikubaasa kubihayo omu mwanya gwaitu. (Shoma Abaheburaayo  13:15.) Mbwenu shi Yehova naayenda ngu tuheyo ebitambo nari eby’okugarukamu ebirikwingana? Ngaaha, tikyo kiri!

⁴ Yehova naamanya ngu twine embeera zitarikushushana n’okubaasa kutarikwingana. Teekateeka aha bitambo ebi Abaisraeli baabaire nibahayo kandi akasiima. Bamwe bakaba bahayo entaama nari embuzi. Kwonka Omwisraeli omworo akaba naabaasa kuhayo “obwiba bubiri nari enkombe nto ibiri.” Kandi ku yaabaire aba atarikubaasa kuhayo obunyonyi bubiri, akaba areetera Yehova “ekicweka kimwe kya ikumi kya eefa y’esaano y’obunono.” (Lev. 5:7, 11) Esaano ekaba etari y’obuguzi bwingi, kwonka Yehova akaba asiima ekitambo ekyo, esaano yaaba eri nungi.

⁵ Ruhanga waitu ow’embabazi nikwo arikwehurira atyo hati. Tarikutushaba kuba abagambi barungi nka Apollo na Paulo. (Ebyakozirwe 18:24; 26:28) Eki Yehova arikwenda n’okureeba nitugarukamu gye nk’okubaasa kwaitu oku kuri. Ijuka efaakazi owaahaireyo obunushu bubiri. Ahabw’okuhayo nk’oku yaabaire naabaasa, Yehova akamusiima.​—Luk. 21:1-4.

6. (a) Okurugiirira aha biri omu Abaheburaayo 10:24, 25 eby’okugarukamu ebi turikuhurira nibitukwataho bita? (b) Noobaasa kworeka ota ngu noosiima eby’okugaruramu ebirikugaruramu amaani?

⁶ Twagarukamu nitugumya abandi. (Shoma Abaheburaayo 10:24, 25.) Buzima nitukunda kuhurira eby’okugarukamu bingi omu nteerane. Nitushemererwa kuhurira eby’okugarukamu by’abato ebyorobi kwonka ebirikuruga aha mutima. Nikitugaruramu amaani kuhurira omuntu arikugarukamu arikugamba aha mazima agu aherize kwega. Kandi nitusiima abarikugira “obumanzi” bw’okugarukamu, n’obu baraabe baine enshoni nari nibwo batandikire kwega orurimi rwaitu. (1 Tes. 2:2) Nitubaasa kworeka tuta ngu nitusiima okuteeraho kwabo? Turikubeebaza bwanyima y’enteerane ahabw’okugarukamu gye. Omuringo ogundi ogu turikworeka ngu nitubasiima n’okugira eki twagarukamu. Omu muringo ogu abandi nibatugumya naitwe tubagumya omu nteerane zaitu.​—Rom. 1:11, 12.

7. Nitugasirwa tuta twagarukamu omu nteerane?

⁷ Nitwegasira ku turikugarukamu. (Isa. 48:17) Mu muringo ki? Eky’okubanza,  twaba nitwenda kugarukamu, nitwija kwetebeekanisiza gye enteerane. Okwetebeekanisiza gye enteerane nikituhwera kwongyera kwetegyereza Ekigambo kya Ruhanga. Oku turikweyongyera kwetegyereza ebi turikwega nikwo turikworoberwa kubita omu nkora. Ekya kabiri, nitwija kwongyera kugasirwa omu nteerane ahabw’okuzejumbamu. Ekya kashatu, okutebeekanisa n’okugarukamu omu nteerane nikikuhwera kuguma noijuka n’obu haakuhinguraho obwire.

8-9. (a) Yehova naayehurira ata ku orikugarukamu omu nteerane kurugiirira aha biri omu Malaki 3:16? (b) Abamwe nibabaasa kuba bakiine buremeezi ki?

⁸ Nikishemeza Yehova twaba nitugamba aha bi turikwikiriza. Nitubaasa kuhamya ngu Yehova naaba naahurikiza kandi naasiima okuteeraho kwaitu kugarukamu omu nteerane. (Shoma Malaki 3:16.) Naayoreka ngu naasiima arikutuha emigisha ahabw’okuteeraho kwaitu kumushemeza.​—Mal. 3:10.

⁹ Buzima, twine enshonga nungi ezirikutuhiga kugarukamu omu nteerane. Kwonka nabwo, abamwe nibabaasa kutiina kwereeza omukono. Kyaba nikwo kiri, otahwa amaani. Ka tureebe emwe aha misingye ya Baibuli, eby’okureeberaho ebimwe, n’obuhabuzi oburikubaasa kutuhwera twena okwongyera kugarukamu gye omu nteerane.

10. (a) Baingi ahariitwe nitutiina ki? (b) Waaba nootiina kugarukamu nikyoreka kintu ki ekirungi?

¹⁰ Ku orikwereeza omukono kugarukamu noohurira waatetema omunda? Kyaba nikwo kiri, tori wenka. Amazima gari ngu baingi ahariitwe nituba twinemu obwoba twaba nitugarukamu. Okubaasa kusingura okutiina oku, oine kumanya ekirikukureetaho. Nootiina ngu noija kwebwa eki orikuza kugamba nari ngu noija kugarukamu ekitahikire? Nootiina ngu eky’okugarukamu kyawe ti kirungi nk’eky’abandi? Okutiina nk’oku, ni kurungi. Nikyoreka ngu ori omucureezi, kandi nootwara abandi nk’abarikukukira. Yehova naakunda omutwarize ogu. (Zab. 138:6; Fil. 2:3) Kwonka  nabwo Yehova naayenda ngu omuhimbise kandi ogumye ab’eishe-emwe omu nteerane. (1 Tes. 5:11) Yehova naakukunda kandi naija kukuha obumanzi oburikwetengyesa.

11. Ni Byahandiikirwe ki ebirikubaasa kutuhwera kugarukamu tutatiinire?

¹¹ Teekateeka aha ki Ebyahandiikirwe birikugamba. Baibuli neeyoreka ngu twena nitushobya omu bi turikugamba nari omu muringo ogu turikugambamu. (Yak. 3:2) Yehova tarikuteekateeka ngu tuhikiriire, kandi nikyo kimwe n’ab’eishe-emwe bagyenzi baitu. (Zab. 103:12-14) Twena turi eka emwe kandi nitukundana. (Mak. 10:29, 30; Yoh. 13:35) Nibamanya ngu obumwe eby’okugarukamu byaitu tibirikurugayo gye nk’oku turikuba nitwenda.

12-13. Nehemia na Yona nitubeegyeraho ki?

¹² Teekateeka aha by’okureeberaho by’omu Baibuli ebirikubaasa kukuhwera kutatiina. Ijuka Nehemia. Akaba naaheereza omu kikaari ky’omugabe. Nehemia akaba agwirwe kubi ahakuba ebisiika bya Yerusaalemu n’amarembo gaayo bikaba bishenyukire. (Neh. 1:1-4) Aine kuba yaabaire atiinire munonga obu yaaza omu maisho g’omugabe kumushoboororera ahabw’enki yaabaire agwirwe kubi. Nehemia ahonaaho akashaba reero yaamugarukamu. Ekyarugiremu, omugabe akakora kihango kuhwera abantu ba Ruhanga. (Neh. 2:1-8) Teekateeka n’ahari Yona. Yehova ku yaamutumire Nineeve, Yona akatiina munonga yaahungira omu rurembo orundi. (Yon. 1:1-3) Kwonka Yehova akahwera Yona, yaahikiiriza obujunaanizibwa bwe. Kandi ebi yaagambiire ab’omuri Nineeve bikabagasira munonga. (Yon. 3:5-10) Nehemia nitumwegyeraho obukuru bw’okubanza twashaba tutakagarukiremu. Kandi eky’okureeberaho kya Yona nikitwegyesa ngu Yehova naabaasa kutuhwera n’obu twakuba tutiinire munonga. Mbwenu shi buzima, hariho ekibiina ekirikutiinisa nk’abantu ba Nineeve?

¹³ Ni buhabuzi ki oburikubaasa kukuhwera kugarukamu ebirikwombeka omu nteerane? Ka tureebe bumwe aharibwo.

14. Ahabw’enki tushemereire kutebeekanisiza gye enteerane zoona, kandi ekyo nitubaasa kukikora ryari?

¹⁴ Tebeekanisiza buri ruteerane. Waatebeekanisa gye bukiri kare noija kugarukamu oikaikaine. (Enf. 21:5) Twena twine obwire obu turikutebeekanisizamu enteerane. Eloise, efaakazi orengize emyaka 80, naatandika kutebeekanisa Omunaara gw’Omurinzi ogw’Okwega saabiiti yaaba neetandika. Naagira ati: “Ninyejumba munonga omu nteerane naaba ntebeekaniise bukiri kare.” Joy, oine omurimo ogurikumwetengyesa kukora saabiiti yoona naatunga obwire bw’okutebeekanisa Omunaara gw’Omurinzi aha Rwamukaaga. Naagira ati: “Ninkunda kuza omu nteerane nkirikwijuka ebi ntebeekaniise.” Ike, omureeberezi oine bingi by’okukora kandi ori payoniya, naagira  ati: “Ndeebire ngu ni kirungi kweyegyesa kumara obwire bukye omu saabiiti yoona omu mwanya gw’okwega ebintu bingi omurundi gumwe kumara obwire bwingi.”

15. Noobaasa kutebeekanisiza ota gye enteerane?

¹⁵ Okutebeekanisiza gye enteerane nikitwariramu ki? Tandika orikushaba Yehova kukuha omwoyo gwe ogurikwera. (Luk. 11:13; 1 Yoh. 5:14) Twara obwire oshwijume omutwe gw’ekicweka, emitwe emikye, eby’okureeberaho, n’eby’okwega ebiri omu bubokusi. Waaba nootebeekanisa buri kacweka, teeraho kushoma ebyahandiikirwe byona ebirimu. Teekateeka aha biri omu kicweka kandi ote omutima aha bi orikwenda kugarukamu. Waatebeekanisa gye noija kugasirwa munonga kandi kikworobere kugarukamu gye.​—2 Kor. 9:6.

16. Ni by’okukoresa ki omu kutebeekanisa ebi twine, kandi iwe noobikoresa ota?

¹⁶ Kyaba nikibaasika, koresa ekyoma kutebeekanisa ebiriho omu rurimi rwawe. Ekibiina kya Yehova, kituhaire bingi eby’okukoresa kutebeekanisa enteerane. Enkora ya JW Library^® neetuhwera kwiha ebitabo aha mukura kubita aha simu. Bwanyima nitubaasa kubitebeekanisa, kubishoma nari kubihurikiza ahu turikuba turi hoona. Abamwe nibakoresa JW Library^® baaba bari omu kahuumuro aha murimo, ah’eishomero nari baaba bari omu rugyendo. Watchtower Library na RAIBURARE Y’AHA MUKURA^™ nibituhwera kusherura bingi ebirikukwata aha bi turikwenda kucondoozaho.

17. (a) Ahabw’enki kiri kirungi kutebeekanisa eby’okugarukamu bingi? (b) Omu vidiyo Ba Munywani wa Yehova​—Tebeekanisa eky’Okugarukamu Kyawe oyegiremu ki?

¹⁷ Kyaba nikibaasika, tebeekanisa eby’okugarukamu bingi omu buri kicweka. Ahabw’enki? Ahakuba noobaasa kutatooranwa buri kuhanika omukono. Kandi abandi nabo nibabaasa kuhanika emikono waaza kugarukamu, reero orikwebembera atoorane omwe aharibo. Ahabw’okwenda ngu enteerane zihendere omu bwire, naabaasa kutoorana abantu bakye kugarukamu omu kacweka akamwe. N’ahabw’ekyo kitakugwisa kubi nari kukumaramu amaani yaaba atakutooraine omurundi gw’okubanza. Waatebeekanisa eby’okugarukamu bingi noija kutunga emigisha mingi y’okugarukamu. Noobaasa kutebeekanisa kugarukamu orikushoma ekyahandiikirwe. Kwonka waaba noobaasa, tebeekanisa n’okugarukamu omu bigambo ebyawe. *

18. Ahabw’enki twine kugarukamu omu bugufu?

¹⁸ Garukamu omu bugufu. Kaingi, eby’okugarukamu ebirikwombeka nibiba biri bigufu kandi byorobi. N’ahabw’ekyo gira ekigyendererwa  ky’okugarukamu omu bugufu. Teeraho kukoresa obusekenda nka 30. (Enf. 10:19; 15:23) Waaba omazire emyaka mingi orikugarukamu omu nteerane, oine kuteeraho abandi eky’okureeberaho kirungi eky’okugarukamu omu bugufu. Waaba noogarukamu orikugamba aha nshonga nyingi orikukoresa n’obwire bwingi, abandi nibabaasa kutiina ngu tibarikubaasa kugarukamu nkaiwe. Kandi ku turikugarukamu omu bugufu, nikiha baingi omugisha gw’okwejumba omu nteerane. Okukira munonga waabanza kutooranwa, garukamu omu bugufu orikuhikira aha nshonga erikugarukamu ekibuuzo. Reka kugamba enshonga zoona eziri omu kacweka. Enshonga enkuru yaaheza kugambwaho, noobaasa kugamba aha nshonga ezindi eziri omu kacweka.​—Reeba akabokusi “ Nimbaasa Kugarukamu Ki?”

19. Orikwebembera ekicweka ky’okwega naabaasa kukuhwera ata, kwonka oine kukora ki?

¹⁹ Manyisa orikwebembera, akacweka aku oinemu eky’okugarukamu. Waacwamu kukora eki, oine kugambira oraayebembere ekicweka ky’okwega enteerane zitakatandikire. Obwire bw’okugarukamu bwahika, oyimutsye omukono ahonaaho kugira ngu abaase kukureeba.

20. Oruteerane rw’ekibiina nirushushanisibwa ruta n’eby’okurya ebi orikubagana n’abanywani baawe?

²⁰ Enteerane z’ekibiina oine kuzireeba nk’eby’okurya ebi oriyo noorya n’abanywani baawe. Ka tugire ngu bamwe ahari banywani baawe omu kibiina baakweta kurya nabo reero baakushaba kugira eby’okurya ebi waareeta. Noija kutwaza ota? Noobaasa kwerarikirira, kwonka noija kuteeraho kutebeekanisa eki orikumanya ngu buri omwe naija kukunda. Yehova omutaayaayisa waitu, atuhaire emeeza eriho ebintu bingi birungi omu nteerane. (Zab. 23:5; Mat. 24:45) Kandi nikimushemeza kureeba ngu nitwija n’ebiconco bikye ebi turikubaasa kuhayo. N’ahabw’ekyo tebeekanisa gye kandi ogarukyemu omu nteerane nk’oku orikubaasa. Waakora otyo, noija kuriira aha meeza ya Yehova kandi oreete n’ekiconco kikye ky’okubagana n’abandi omu kibiina.