1. Niki ekyareeteire Paulo kukunda Abakristaayo ba Korinso?

GUKABA guri omwaka gwa 55 Y.A.K. Entumwa Paulo akaba ari aha kirwa Troa, kwonka akaba atarikubaasa kurekyera aho kuteekateeka aha kibiina kya Korinso. Enyimaho, akagira obusaasi ku yaamanyire ngu ab’eishe-emwe bakaba baine entongane omuribo. N’ahabw’ekyo nk’omuzaire orikufayo, akabahandiikira ebaruha arikubahabura. (1 Kor. 1:11; 4:15) Kandi akoohereza Tito omukozi mugyenzi we kugira enshonga ezi yaashoboorora reero agarukye Troa kumugambira oku bintu bigyenzire. Hati Paulo akaba ategyereize Tito omuri Troa, aine ekihika ky’okumanya oku Abakorinso baabaire bari. Kwonka eky’obusaasi, Tito taragarukire. Paulo akakora ki? Akatemba obwato yaaza Makedonia, kandi ekirikushemeza bakabaasa kubugana. Tito akatekyerereza Paulo ngu ab’eishe-emwe omuri Korinso bakaikiriza ebaruha ye, kandi bakaba baine ekihika ky’okumureeba. Paulo ku yaahuriire enkuru nungi egyo, “akoongyera kushemererwa.”—2 Kor. 2:12, 13; 7:5-9.

2. (a) Paulo akahandiikira Abakorinso aha bikwatiraine n’okwikiriza kwabo n’okushemererwa? (b) Nituza kugarukamu bibuuzo ki?

² Bwanyima, entumwa Paulo akahandiikira Abakorinso ebaruha ya kabiri. Akabagira ati: “Ti habw’okubategyeka omu kwikiriza kwanyu, kureka nitukorera hamwe naimwe ahabw’okubareetera okushemererwa; ahabw’okuba mwemereziibwe okwikiriza.” (2 Kor. 1:24) Paulo akaba naamanyisa ki? Kandi ebigambo ebyo nibikwata bita aha bareeberezi obunaku obu?

3. (a) Paulo akaba naamanyisa ki obu yaahandiika ati: ‘Mwemereire ahabw’okwikiriza kwanyu’? (b) Abareeberezi obunaku obu nibatooreza Paulo?

³ Paulo akagamba aha nshonga ibiri nkuru eziine akakwate n’okuramya kwaitu, nizo okwikiriza n’okushemererwa. Ijuka ngu, akahandiika aha kwikiriza ati: “Ti habw’okubategyeka omu kwikiriza kwanyu, . . . Ahabw’okuba mwemereziibwe okwikiriza.” Paulo okukoresa ebigambo ebyo, akeetegyereza ngu ab’eishe-emwe omuri Korinso bakaba beemereire ahabw’okwikiriza kwabo, ti ahabwa Paulo nari omuntu ondiijo weena, kureka ahabw’okwikiririza omuri. N’ahabw’ekyo Paulo kikaba kitarikumwetengyesa kutegyeka okwikiriza kw’ab’eishe-emwe abo, kandi akaba ataine kigyendererwa ky’okukikora. Akaba naahamiza kimwe ngu n’Abakristaayo abeesigwa abaabaire baine ekihika ky’okukora ekihikire. (2 Kor. 2:3) Obunaku obu, abareeberezi nibatooreza Paulo batarikubangaanisa okwikiriza nari ebigyendererwa by’ab’eishe-emwe by’okuheereza Ruhanga. (2 Tes. 3:4) Abareeberezi omu mwanya gw’okutaho ebiragiro by’amaremesa, ebi barikucwamu nibabwegamiza aha misingye ya Baibuli n’obuhabuzi kuruga aha kibiina kya Yehova. Kandi abareeberezi obunaku obu tibarikutegyeka okwikiriza kw’ab’eishe-mwe abagyenzi baabo.—1 Pet. 5:2, 3.

4. (a) Paulo akaba naamanyisa ki obu yaahandiika ati: “Nitukora hamwe naimwe kubareetera okushemererwa”? (b) Abareeberezi nibatooreza bata Paulo obunaku obu?

⁴ Paulo akagira ati: Nibakora naiwe ‘kutureetera okushemererwa.’ Akakoresa ebigambo ebyo, arikumanyisa we n’abagyenzi. Ahabw’enki nitugira tutyo? Omu baruha niyo emwe, akaijutsya Abakorinso babiri aha bakozi bagyenzi be obu yaahandiika ati: “Yesu . . . ou twabarangiire, nyowe na Siluwaano na Timoseo.” (2 Kor. 1:19) Paulo burikukoresa ebigambo “abakozi abarikukora hamwe” omu baruha ze, akaba naagamba aha bu yaabaire naaheereza nabo, nka Apollo, Akula, Priska, Timoseo, Tito, n’abandi. (Rom. 16:3, 21; 1 Kor. 3:6-9; 2 Kor. 8:23) N’ahabw’ekyo okugira ati: ‘Nitukorera hamwe kubareetera okushemererwa,’ Paulo akahamiza Abakorinso ngu we n’abagyenzi be bakaba nibenda kukora kyona ekirikubaasika kureetera boona omu kibiina okushemererwa. Hati, abareeberezi nibaba baine ekigyendererwa nikyo kimwe. Nibaba nibenda kukora kyona ekirikubaasika kuhwera ab’eishe-emwe bagyenzi baabo ‘kuheereza Yehova bashemereirwe.’—Zab. 100:2; Fil. 1:25.

5. Nituza kushwijuma ebirikukwata aha kibuuzo ki, kandi twine kuteekateeka ahari ki?

⁵ Enyimaho, guruupu y’ab’eishe-emwe na banyaanyazi-itwe kuruga omu bicweka bw’ensi bitari bimwe bakeetwa kugarukamu ekibuuzo eki: “Ni bigambo ki na bikorwa ki eby’omureeberezi ebirongyeire aha kushemererwa kwawe?” Twine omu biteekateeko ebi ab’eishe-emwe bagyenzi baitu baagambire, hati ka tubigyeragyeranise n’ebi waakugarukiremu. Ekindi, twena ka tuteekateekye oku turikubaasa kwongyera kureeta okushemererwa omu kibiina kyaitu. *

6, 7. (a) Abareeberezi nibabaasa kutooreza bata Yesu, Paulo n’abaheereza ba Ruhanga abandi? (b) Ahabw’enki okwijuka amaziina g’ab’eishe-emwe kirikwongyera aha kushemererwa kwabo?

⁶ Ab’eishe-emwe na banyaanyazi-itwe baingi nibongyera kushemererwa omureeberezi yaaba naabafaho. Abareeberezi nibabaasa kukikora bakarikutooreza Daudi, Elihu, na Yesu. (Shoma 2 Samueli 9:6; Yobu 33:1; Luka 19:5.) Buri omwe aha baheereza ba Yehova aba akooreka ngu naafayo ahari mugyenzi we arikukoresa eiziina rye. Paulo nawe akaba naamanya obukuru bw’okwijuka n’okukoresa amaziina g’ab’eishe-emwe bagyenzi be. Paulo akahendera ebaruha ye arikuramutsya ab’eishe-emwe na banyaanyazi-itwe 25 arikukoresa amaziina gaabo, otwariremu na Peresi, munyaanyazi-itwe Omukristaayo ou yaagambireho ati: “Muramutsye Peresi orikukundwa.”—Rom. 16:3-15.

⁷ Abareeberezi abamwe nibateeraho kwijuka kukoresa amaziina g’ab’eishe-emwe. Ku barikukora ekyo, nibaba bari nk’abarikugambira Abakristaayo bagyenzi baabo ngu, ‘muri ab’omuhendo ahari ahariinye.’ (Kur. 33:17) Abareeberezi nibaija kwongyera aha kushemererwa kw’ab’eishe-emwe baijuka amaziina gaabo baaba nibabeeta kugarukamu omu kwega Omunaara gw’Omurinzi nari omu nteerane ezindi.—Gyeragyeranisa na Yohaana 10:3.

8. Ni mu muringo ki gumwe ogu Paulo yaatooreize Yehova na Yesu?

⁸ Kandi Paulo akooreka ngu naafayo aha bandi arikubasiima ayihire aha mutima, nk’omuringo ogundi gw’okwongyera aha kushemererwa kw’ab’eishe-emwe bagyenzi be. Omu baruha niyo emwe akagira ngu akaba aine ekihika ky’okukora kureetera ab’eishe-emwe bagyenzi be okushemererwa: “Nimbeesiga buzima, niinyehimbisa munonga ahabwanyu.” (2 Kor. 7:4) Ebigambo ebyo bikagumya ab’eishe-emwe omuri Korinso. Paulo akakoresa ebigambo nibwo bimwe obu yaahandiikira ebibiina ebindi. (Rom. 1:8; Fil. 1:3-5; 1 Tes. 1:8) Nangwa, bwanyima y’okugamba ahari Peresi omu baruha ye ei yaahandiikire Abarooma, Paulo akoongyeraho ati: ‘Akeezirika kukorera omuri Mukama.’ (Rom. 16:12) Banyaanyazi-itwe abo abeesigwa baine kuba bashemereirwe Paulo okubasiima! Paulo obu yaabaire naasiima abandi, akatooreza Yehova na Yesu .—Shoma Mako 1:9-11; Yohaana 1:47; Kush. 2:2, 13, 19.

9. Ahabw’enki okwebaza Abakristaayo bagyenzi baitu nikyongyera aha kushemererwa omu kibiina?

⁹ Kandi abareeberezi nibamanya ngu ni kikuru kusiima ab’eishe-emwe bagyenzi baabo omu bigambo. (Enf. 3:27; 15:23) Omureeberezi yaakikora naaba ari nk’orikugambira ab’eishe-emwe abagyenzi be ati: ‘Naareeba eki waakora. Ninkufaho.’ Kandi Abakristaayo bagyenzi baabo nibaba nibenda kuhurira ngu abareeberezi barikubahamiza. Munyaanyazi-itwe ori omu myaka ya 50 akagamba ahabwa boona obu yaagira ati: “Tibarikukira kunsiima aha murimo. Hariyo okuhayahayana. N’ahabw’ekyo omureeberezi yaansiima ahabw’eki naakora omu kibiina, nikinduhuura kandi nikingaruramu amaani! Nikindeetera kuhurira ngu ninkundwa Tataitwe ow’omu iguru.” Ow’eishe-emwe orikworora abaana babiri ari wenka nawe nikwo yaabaire naayehurira. Enyimaho omureeberezi akamusiima kuruga aha mutima. Ekyo kikareetera ow’eishe-emwe kwehurira ata? Naagira ati: “Ebi omureeberezi yaagambire bikangaruramu amaani!” Hatariho kubangaanisa, omureeberezi yaayebaza Abakristaayo bagyenzi be nibongyera kushemererwa. N’ekirikurugamu, nibaija kutunga amaani g’okugumizamu nibagyendera omu muhanda ogurikuhitsya omu magara, kandi ‘tibarikwija’ kuruha.—Isa. 40:31.

10, 11. (a) Abareeberezi nibabaasa kutooreza bata Nehemia? (b) Niki ekiraahwere omureeberezi kugamba ebirikwombeka yaaba ataayaayiire ow’eishe-emwe?

¹⁰ Ni muringo ki mukuru ogu abareeberezi barikubaasa kworeka ngu nibafayo aha b’eishe-emwe kikongyera aha kushemererwa omu kibiina? Barikwehabura kutunga obwire bw’okugumya abandi. (Shoma Ebyakozirwe 20:28.) Abareeberezi bakikora, nibaba nibatooreza abariisa aba ira. Yetegyereze eki Nehemia omureeberezi omwesigwa yaakozire ku yaareebire bamwe aha Bayudaaya bagyenzi be abaabaire bahweiremu amaani omu by’omwoyo. Ebyahandiikirwe nibyoreka ngu akaimuka yaabagumya. (Neh. 4:14) Abareeberezi baine kukora nikyo kimwe obunaku obu. Nibaimuka kugira eki baakora kuhwera ab’eishe-emwe bagyenzi baabo kuguma bahami omu kwikiriza. Nibafayo kukugumya buri omwe okwe, nibataayaayira ab’eishe-emwe na banyaanyazi-itwe omu maka gaabo kyaba nikibaasisa. Baba bagire kubagumya, nibaba nibenda “kubaha omugisha gw’omwoyo, gubagumye.” (Rom. 1:11) Niki ekiraahwere abareeberezi kukikora?

¹¹ Abareeberezi batakabayaayire kubagumya, nibaba baine kuteekateeka aha mbeera z’ou barikuza kutaayaayira. Omuntu ogwo aine buremeezi ki? Nibabaasa kugamba ahari ki kumugumya? Ni kyahandiikirwe ki nari eky’okureeberaho ki kuruga omu Baibuli eki barikubaasa kukoresa ekirikuhikaana n’embeera ezi arikurabamu? Okwetebeekanisa omu muringo ogwo nikiija kuhwera omureeberezi kugaaniira n’ow’eishe-emwe ogwo ebirikwombeka kandi eby’omugasho. Abareeberezi nibaikiriza ow’eishe-emwe nari munyaanyazi-itwe kugamba oku arikwehurira kandi bamuhurikiza gye. (Yak. 1:19) Munyaanyazi-itwe omwe akagira ati: “Omureeberezi yaataho omutima kumpurikiza nikimpuumuriza.”—Luk. 8:18.

12. Ni baahi omu kibiina abaine kugumibwa, kandi ahabw’enki?

¹² N’oha orikwija kugasirwa omu kutaayaaya kw’abareeberezi? Paulo akahiga abareeberezi bagyenzi be ati: ‘Murinde obusyo bwona.’ Amazima gari ngu, boona omu kibiina nibeetenga kugumibwa, otwariremu ababuurizi, na baapayoniya abatwire nibaheereza omu bwesigwa kumara obwire buraingwa. Ahabw’enki abareeberezi baine kubagumya? N’ahabw’okugira ngu abahami omu by’omwoyo nabo nibahikwaho okugyemeserezibwa okuri omu nsi egi embi. Kubaasa kumanya ahabw’enki obumwe omuheereza wa Ruhanga ohami omu by’omwoyo arikwetenga obuhwezi, ka tureebe ebyahikire aha Mugabe Daudi.

13. (a) Ishubi-benobu akateeraho kwika Daudi ari mu mbeera ki? (b) Abishai akajuna ata Daudi?

¹³ Bwanyima ya Daudi kutooranwa kuba omugabe, akaza kurwana na Goliasi ekikaaka kuruga omu Bareefa. Daudi omushaija emanzi akaita ekikaaka. (1 Sam. 17:4, 48-51; 1 Bus. 20:5, 8) Ku haahingwireho emyaka Daudi arikurwana n’Abafilistia akagaruka yaabugana ekikaaka ekindi. Eiziina rye akaba ari Ishubi-benobu, nawe akaba ari omwe aha Bareefa. (2 Sam. 21:16) Aha murundi ogu, ekikaaka kikaba kiri hakye kumwita. Ahabw’enki? Eki tikiraabaireho ahabw’okugira ngu Daudi akaremwa kuba emanzi kureka akaba ahwairemu amaani. Ebyahandiikirwe nibigira biti: ‘Daudi akatandika kuruha.’ Ahonaaho Ishubi-benobu, aketegyereza ngu Daudi yaahwamu amaani, “yaayenda kwita Daudi.” Kwonka ku yaihireyo rurara ye arikuza kwita Daudi, ‘Abishai mwene Zeruiya yaija kuha [Daudi] emikono, yaarwana n’Omufilistia ogwo, yaamwita.’ (2 Sam. 21:15-17) Daudi ka yaakiriire hakye kwitwa! Daudi ka aine kuba yaashemereirwe kumanya ngu Abishai akaguma amutaireho eriisho, kandi ahonaaho yaabaasa kukiza amagara ge! Ekyo nitukyegyeraho ki?

14. (a) Nitubaasa kusingura tuta emirabanamu eri nka Goliasi? (b) Abareeberezi nibabaasa kuhwera bata abandi kugaruka kugira omujinya n’okushemererwa omu buheereza? Ha eky’okureeberaho.

¹⁴ Itwe Abajurizi ba Yehova omu nsi yoona, nitugumizamu kuhikiiriza obuheereza bwaitu, n’obu Sitaane n’abarikumushagika barikuteeraho kuturemesa. Abamwe ahariitwe tuhikirweho oburemeezi bw’amaani, kwonka ahabw’okugira ngu nitwesigira kimwe Yehova tubaasise kurwanisa “Baagoliasi” aba twabasingura. Kwonka obumwe, nituruha nari twetamwa ahabw’okuguma niturwana n’emirabanamu y’ensi egi. Ahabw’embeera ezi, kyorobi kusingurwa n’okuba omu kabi k’okwikarirwa oburemeezi obu twakubaire nitubaasa kusingura. Omu bwire obwo, obushagiki bw’abareeberezi nibubaasa kutuhwera kugaruka kugira okushemererwa n’amaani nk’oku baingi barikugira. Payoniya ori omu myaka ya 60 naagira ati: “Enyimaho, nkaba ntarikwehurira gye kandi okubuurira kukaba nikundutsya. Omureeberezi omwe akeetegyereza ngu tinkiine mujinya yaija kugaaniira naanye. Tukagaaniira aha byahandiikirwe bimwe kuruga omu Baibuli. Nkata omu nkora obuhabuzi obu yaampaire, kandi naagasirwa.” Naayongyeraho ati: “Buzima omureeberezi akakora gye kwetegyereza embeera yangye kandi akampwera!” Eego, buzima ka nikishemeza kumanya ngu abareeberezi abarikuguma nibafayo aha mbeera zaitu bari nk’Abishai owa ira, owaabaire ayeteekateekire kuhwera.’

15, 16. (a) Ahabw’enki ab’eishe-emwe baabaire nibakunda munonga entumwa Paulo? (b) Ahabw’enki nitukunda abareeberezi abarikufayo aha b’eishe-emwe?

¹⁵ Okuba omuriisa nikitwariramu okukora n’amaani. Obumwe, abareeberezi nibaraara batabyami barikushabira obusyo bwa Ruhanga nari barikuhwera Abakristaayo bagyenzi baabo omu by’omwoyo. (2 Kor. 11:27, 28) Kwonka nabwo, abareeberezi nibahikiiriza gye obujunaanizibwa bawabo bashemereirwe, nka Paulo. Akahandiikira Abakorinso ati: ‘Ninshemererwa munonga kuhayo ebyangye, kandi n’okwehayo niinyehayo ahabw’amagara gaanyu.’ (2 Kor. 12:15) Buzima, Paulo ahabw’okunda ab’eishe-emwe, akaba amaririire kwehayo kubagumya. (Shoma 2 Abakorinso 2:4; Fil. 2:17; 1 Tes. 2:8) Hatariho kubangaanisa ab’eishe-emwe bakaba nibamukunda munonga!—Byak. 20:31-38.

¹⁶ Kandi naitwe abaheereza ba Ruhanga obunaku obu nitukunda abareeberezi kandi nitwebaza Yehova omu kushaba ahabw’okubatuha. Nibongyera aha kushemererwa kwaitu barikutufaho. Nitugasirwa batutaayaayira kutugumya. Kandi, nitubasiima ahabw’okuba beeteekateekire kuhwera na munonga twarengwa amaganya g’ensi egi. Eego, abareeberezi nk’abo abarikutufaho, ‘nibakora hamwe naitwe kutureetera okushemererwa.’