EKICWEKA EKY’OKWEGA 33
EKYESHONGORO 130 Saasira Abandi
Oku Ekibiina Kirikworeka Emiteekateekyere nk’eya Yehova aha Basiisi
“Kwonka omuntu weena ku araashiishe, twine omutonganizi.”—1 YOH. 2:1.
ENTIMA
Eki turikwegyera aha ku ekibiina kya Korinso eky’ekyasha ky’okubanza kyatwarize obu haabaho ekibi ky’amaani.
1. Niki eki Yehova arikwendeza abantu boona?
YEHOVA akahanga abantu baine obugabe bw’okwecweramu. Nookoresa obugabe obwo butoosha waaba nooza kucwamu. Ekintu ekirikukirayo obukuru eki omuntu arikubaasa kucwamu, n’okwehayo ahari Yehova, kandi akaba omwe aha b’eka ye abarikumuramya. Ekyo nikyo Yehova arikwendeza buri omwe. Ahabw’enki? Ahakuba naakunda abantu, kandi naabendeza ekirikukirayo oburungi. Naayenda ngu bagire omukago murungi nawe, kandi batuureho ebiro byona.—Bir. 30:19, 20; Gal. 6:7, 8.
2. Yehova naareeba ata abasiisi abatarikweteisa? (1 Yohaana 2:1)
2 Kwonka, Yehova tarikugyema muntu weena kumuheereza. Naaha buri muntu obugabe bw’okucwamu eki arikwenda kukora. Kandi shi Omukristaayo obatiziibwe yaakora ekibi ky’amaani? Yaaba ateeteisize naaba aine kwihwa omu kibiina. (1 Kor. 5:13) Kwonka nabwo, Yehova naaba aine amatsiko ngu omusiisi ogwo naija kumugarukira. Nangwa, egyo niyo nshonga nkuru ahabw’enki yaahaireyo ekitambo, kubaasisa abasiisi abarikweteisa kusaasirwa. (Shoma 1 Yohaana 2:1.) Ruhanga waitu owa rukundo naahiga abasiisi kweteisa.—Zek. 1:3; Rom. 2:4; Yak. 4:8.
3. Nituza kwetegyereza ki omu kicweka ki?
3 Yehova naayenda ngu tugire emiteekateekyere nk’ei aine aha kushiisha, n’aha basiisi. Ekicweka eki nikiza kworeka oku turikubaasa kukora ekyo. Waaba nooshoma ekicweka eki, teeraho kwetegyereza, (1) oku ekibiina kya Korinso omu kyasha ky’okubanza kyatwarize obu haabaho ekibi ky’amaani, (2) obuhabuzi obu entumwa Paulo yaabahaire omusiisi ku yaayeteisize, kandi (3) oku ebyabaireho birikworeka emiteekateekyere ei Yehova aine aha Bakristaayo abarikukora ekibi ky’amaani.
OKU EKIBIINA OMU KYASHA KY’OKUBANZA KYATWARIZE OBU HAABAHO EKIBI KY’AMAANI
4. Niki ekyabaireho omu kibiina kya Korinso omu kyasha ky’okubanza? (1 Abakorinso 5:1, 2)
4 Shoma 1 Abakorinso 5:1, 2. Omu rugyendo rwa Paulo orwa kashatu orw’obumiisani, akahurira amakuru mabi agaabaire nigakwata aha kibiina kisya ekya Korinso. Ow’eishe-emwe omu kibiina ekyo akaba naashambana na muka ishe. Ekikorwa ekyo kikaba nikihemurana, ‘kandi kitarikushangwa n’omu banyamahanga.’ Ekibiina kikaba nikireeba ekikorwa ekyo nk’ekitaine nshonga, kandi nibabaasa kuba baabaire nibakyesiimisa. Obundi bamwe bakaba nibateekateeka ngu nikyoreka embabazi n’okwetegyereza, ebi Ruhanga ainiire abantu abatahikiriire. Kwonka Yehova tarikushagika ebibi ebirikukorwa abaheereza be. Ahabw’ekikorwa kibi ekyo, omushaija ogwo akaba naashiisha eiziina rirungi ry’ekibiina. Naabaasa kuba yaabaire naareetera Abakristaayo abandi abaabaire nibakwatanisa nawe kutwaza nkawe. Mbwenu shi Paulo akagambira ekibiina kukora ki?
5. Paulo akagambira ekibiina kukora ki, kandi akaba naamanyisa ki? (1 Abakorinso 5:13) (Reeba n’ekishushani.)
5 Shoma 1 Abakorinso 5:13. Paulo arikuhwerwa omwoyo gurikwera, akahandiikira ekibiina ebaruha eyaabaire neeyoreka ngu omusiisi otarikweteisa aine kwihwa omu kibiina. Abakristaayo abeesigwa bakaba baine kumutwariza bata? Paulo akabagambira “kutakwatanisa” nawe. Akaba naamanyisa ki? Akashoboorora ngu kikaba nikitwariramu ‘n’okutarya nawe.’ (1 Kor. 5:11) Okushutama n’omuntu okarya nawe, nikibaasa kukureetera kwongyera kukwatanisa nawe. N’ahabw’ekyo, Paulo akaba naamanyisa ngu ekibiina kikaba kitaine kukwatanisa n’omushaija ogwo. Ekyo kikaba nikiija kurinda ekibiina kutasiisikara. (1 Kor. 5:5-7) Kandi, okutakwatanisa n’omushaija ogwo kikaba nikibaasa kumureetera kwetegyereza ngu ateishukire aha mitindo ya Yehova, agire enshoni, kimuhige kweteisa.
Paulo arikuhwerwa omwoyo gurikwera akahandiika ebaruha eyaabaire neeyoreka ngu omusiisi otarikweteisa aihwe omu kibiina (Reeba akacweka 5)
6. Ebaruha ya Paulo ekakwata eta aha kibiina n’aha musiisi?
6 Bwanyima ya Paulo kwoherereza Abakristaayo omuri Korinso ebaruha, akatandika kuteekateeka aha ku baabaire nibaija kutwaza. Kwonka Tito akamugambira amakuru agaamushemeize. Ekibiina kikasiima munonga ebaruha ya Paulo. (2 Kor. 7:6, 7) Kandi bakakuratira obuhabuzi obu yaabahaire. Ameezi agaakuratsireho bwanyima ya Paulo kwohereza ebaruha ye, omusiisi akeeteisa ekibi kye. Akaba ahindwire emitwarize ye n’emiteekateekyere ye, kandi atandikire kukuratira emitindo ya Yehova ehikiriire. (2 Kor. 7:8-11) Mbwenu shi Paulo akagambira ekibiina kukora ki?
OKU EKIBIINA KYABAIRE KIINE KUTWARIZA OMUSIISI OWAAYETEISIZE
7. Okwiha omusiisi omu kibiina kikarugamu birungi ki? (2 Abakorinso 2:5-8)
7 Shoma 2 Abakorinso 2:5-8. Paulo akagira ngu, “Ekiheneso omushaija ogwo eki yaahairwe abarikukira obwingi [kikaba] nikimara.” Ekirikumanyisa ngu, okuhanwa oku yaatungire kukahikiiriza ekigyendererwa kyakwo. Kigyendererwa ki? Eky’okumuhwera kuhika aha kweteisa.—Heb. 12:11.
8. Niki ekindi eki Paulo yaagambiire ekibiina kukora?
8 N’ahabw’ekyo Paulo akagambira ekibiina ati: ‘Kibashemereire kusaasira n’okumuhuumuriza’ omushaija ogwo, kandi ‘mukamuhamiza ngu nimumukunda.’ Yetegyereze ngu Paulo akaba naayenda ngu bakore ekirikukira aha kugarura omushaija ogwo omu kibiina. Akaba naayenda ngu bamuhamize omu bigambo byabo, omu mitwarize, n’omu bikorwa ngu buzima bamusaasiire, kandi ngu nibamukunda. Ekyo kikaba nikiija kworeka butunu ngu nibamwakiira omu kibiina.
9. Ahabw’enki abamwe nibabaasa kuba baayeziringire kwakiira omusiisi owaayeteisize?
9 Mbwenu shi abamwe omu kibiina ekyo bakaba nibeeziringa kwakiira omusiisi owaayeteisize? Baibuli terikukigambaho butunu, kwonka nikibaasa kuba nikwo kyabaire. Ahakuba ebi yaakozire bikareetera ekibiina oburemeezi, kandi kyareetera abamwe kuhemuka. Abamwe nibabaasa kuba baateekateekire ngu tiky’oburyo omushaija ogwo kwakiirwa gye nk’ow’eishe-emwe omu kibiina, kandi obwo baateireho munonga kuguma bashemeire omu micwe. (Gyeragyeranisa Luka 15:28-30.) Ahabw’enki kyabaire kiri kikuru kworeka rukundo eyaabuzima ow’eishe-emwe owaagarukire omu kibiina?
10-11. Niki ekyabaire nikibaasa kubaho ku ogire ngu abareeberezi bakanga kusaasira omusiisi owaayeteisize?
10 Teekateeka aha kyabaire nikiza kubaho ku ogire ngu abareeberezi bakanga kugarura omushaija owaayeteisize omu kibiina, nari ngu bwanyima y’okugaruka kwe, ab’ekibiina bakanga kumworeka rukundo. Akaba naabaasa ‘kurengwa obusaasi.’ Akaba naija kwehwa amatsiko, kandi arekyera aho kuteeraho kugaruraho omukago gwe na Yehova Ruhanga.
11 Ekibi munonga, ku ogire ngu ab’eishe-emwe na banyaanyazi-twe abo bakanga kusaasira omusiisi owaayeteisize, bakaba nibaija kuta omukago gwabo na Yehova omu kabi. Ahabw’enki? Ahakuba bakaba nibaija kuba batarikworeka emiteekateekyere nk’eya Yehova ey’okusaasira abasiisi abarikweteisa, kureka bakaba nibaija kuba nibatooreza Sitaane otaine esaasi. N’ahabw’ekyo bakaba nibaija kuba bari ebikoreso bya Sitaane eby’okumaramu omushaija ogwo amaani omu by’omwoyo.—2 Kor. 2:10, 11; Efe. 4:27.
12. Ekibiina omuri Korinso kikaba nikibaasa kutooreza kita Yehova?
12 Mbwenu shi ekibiina omuri Korinso kikaba nikibaasa kutooreza kita Yehova, beitu atari Sitaane? Barikukuratira omuringo ogu Yehova arikutwarizamu abasiisi abarikweteisa. Yetegyereze eki bamwe aha baahandiikire Baibuli baagambire ahari Yehova. Daudi akagira ati: “Ori murungi, orahuka kusaasira.” (Zab. 86:5) Miika akahandiika ati: “Ni ruhanga ki orikushushana naiwe, osaasira okutahikiirira, oyehuzya ebicumuro?” (Mik. 7:18) Kandi Isaaya akagira ati: “Omubi arekye omuhanda gwe, n’otahikiriire arekye ebiteekateeko bye, agarukye ahari [Yehova], abone kumusaasira, ahari Ruhanga waitu, ahakuba naija kumusaasirira kimwe.”—Isa. 55:7.
13. Ahabw’enki kyabaire kihikire kugarura omusiisi owaabaire ayeteisize omu kibiina? (Reeba akabokusi “Ni Ryari obu Omushaija Omuri Korinso Yaagarurwa omu Kibiina?”)
13 Kubaasa kutooreza Yehova, ab’ekibiina kya Korinso bakaba baine kwakiira omushaija oyeteisize, kandi bakamuhamiza ngu nibamukunda. Ku baakuratiire obuhabuzi bwa Paulo obw’okwakiira omusiisi owaabaire ayeteisize, bakooreka ngu “nibooroba omuri byona.” (2 Kor. 2:9) N’amazima, hakaba hahingwireho ameezi makye kuruga obu omusiisi ogwo yaihwa omu kibiina, kwonka okuhana okwo kukamureetera kweteisa. N’ahabw’ekyo kikaba kitarikwetengyesa kweziringa kumugarura omu kibiina.
OKWOREKA OBURINGAANIZA N’EMBABAZI NK’EZA YEHOVA
14-15. Twayegyera ki aha ku ekibiina omuri Korinso kyatwarize obu haabaho ekibi ky’amaani? (2 Petero 3:9) (Reeba n’ekishushani.)
14 Ebirikukwata aha kibi ekyabaireho omuri Korinso eya ira bikahandiikwa “kutwegyesa.” (Rom. 15:4) Ebyo ebyabaireho, nitubyegyeraho ngu Yehova tarikwikiriza abarikukora ebibi by’amaani kuguma omu baheereza be. Tarikushagika emiteekateekyere erikugira ngu abatarikweteisa baine kugirirwa “embabazi” bakagumizamu nibakwatanisa n’abaheereza be abeesigwa. Yehova n’omunyambabazi, kwonka tibyafandimu, kandi tarikugarura ahansi emitindo ye. (Yud. 4) Buzima, okukora ekyo tikyakworekire embabazi, ahakuba kikaabaire nikita ekibiina kyona omu kabi.—Enf. 13:20; 1 Kor. 15:33.
15 Kwonka, nitwega ngu Yehova tarikwenda muntu weena kucwekyerera. Naayenda kujuna abantu kyaba nikibaasika. Naayoreka embabazi abarikweteera omu kifuba, kandi abarikwenda kugaruraho omukago gwabo nawe. (Ezk. 33:11; shoma 2 Petero 3:9.) N’ahabw’ekyo, omushaija w’omu kibiina kya Korinso ku yaayeteisize ekibi kye, kandi akahindura emitwarize ye, Yehova akakoresa Paulo kushoboororera ekibiina ngu omushaija ogwo akaba aine kusaasirwa, kandi akagaruka.
Bwanyima y’okuteekateeka ahari rukundo n’embabazi za Yehova, ab’ekibiina nibaakiira abagariirwe omu kibiina bashemereirwe (Reeba akacweka 14-15)
16. Oku ekibiina omuri Korinso kyatwarize obu haabaho ekibi ky’amaani nikikureetera kwehurira ota?
16 Okweijutsya oku ekibiina omuri Korinso kyatwarize obu haabaho ekibi ky’amaani nikituhwera kureeba butunu rukundo ya Yehova, okuhikiirira kwe, n’oburingaaniza bwe. (Zab. 33:5) Ekyo buzima tikirikukureetera kuhimbisa Ruhanga waitu? Ahabw’okugira ngu twena turi abasiisi, nituba tushemereire kusaasirwa. Buri omwe ahariitwe aine kusiima Yehova ahabw’ekitambo ekirikutubaasisa kusaasirwa. Ka nikituhuumuriza kumanya ngu Yehova buzima naakunda abantu, kandi naabendeza ebirungi!
17. Nituza kugamba ahari ki omu bicweka ebirikukurataho?
17 Kandi shi haagira owaakora ekibi ky’amaani obunaku obu? Abareeberezi nibabaasa kworeka bata nka Yehova, ngu nibenda kuhwera omusiisi kuhika aha kweteisa? Ekibiina kiine kutwaza kita abareeberezi baacwamu kwiha omuntu omu kibiina nari kumugarura? Ebibuuzo ebyo nibiza kugarukwamu omu bicweka ebirikukurataho.
EKYESHONGORO 109 Tukundane Munonga Twihire aha Mutima
