Ruhanga akahanga emibiri yaitu erikubaasa kwekiza. Omubiri ogutaine ndwara haagira ekyagushara, ekyaguhara, nari gwatunga ekironda, “nigutandika kwekoraho kwetambira ebironda ebihango n’ebikye.” (Johns Hopkins Medicine) Ahonaaho nigutandika kwezibira okujwa, guhangutsya emitsi y’eshagama, gwomya ekironda, guha n’obutafaari amaani.

TEEKATEEKA AHARI EKI: Omuhangi ku araabe yaahangire emibiri erikubaasa kukiza ebironda byayo, mbwenu shi tikirikutuha obuhame ngu naija kuhikiiriza ebi arikuraganisa atukize enkojo z’aha mutima n’obusaasi? Omuhandiiki wa Zaaburi akahandiika ati: “Akiza ab’emitima ehendekire, ashemba obuhuta bwabo.” (Zaaburi 147:3) Waaba oine amaganya ahabw’ebyabaireho enyima nari ebirikubaho hati, noobaasa kuhamya ota ngu Yehova naija kushemba ebironda byawe eby’akamanyiso, ebya hati n’eby’ebiro by’omumaisho?

Ruhanga akaraganisa ati: “Otatiina ahabw’okuba nkwine; otahahaaza omutima, ahabw’okuba ndi Ruhanga waawe. Ndyakuha amaani, ndyakuhwera.” (Isaaya 41:10) Omuntu orikumanya ngu Yehova naamufaho naaba aine obusingye bw’omu mutima n’amaani g’okwemera ebigyezo bitari bimwe na bimwe. Obugwagye obu, entumwa Paulo akabweta “obusingye bwa Ruhanga oburengire okwetegyereza kw’omuntu weena.” Akoongyeraho ati: “Nimbaasa kukora byona omuri” ogwo ompa amaani.​—Abafilipi 4:4-7, 9, 13.

Ebyahandiikirwe nibituhwera kwikiririza omu bi Yehova arikuraganisa ebirikukwata aha biro by’omuntu eby’omumaisho. Nk’eky’okureeberaho, Okushuuruurwa 21:4, 5 nikyoreka eki arikuza kukora n’enshonga ahabw’enki nitumwesiga ngu naija kukikora:

• ‘Naija kuragaza amarira goona’ omu maisho g’abantu. Yehova naija kwihaho okubonabona kwaitu kwona n’okwerarikirira, n’obu kwakuba nikureebeka nka kukye aha bandi.

• “Ashutami aha kitebe” omu kitiinisa kye omu iguru, Omugabe Rukira Boona naija kworeka amaani ge n’obushoboorozi bwe aiheho okubonabona kandi atuhwere.

• Yehova naatuhamiza ngu ebi arikuraganisa “n’eby’okwesigwa kandi eby’amazima.” Ayeteekateekire kuhikiiriza ebi arikuraganisa kworeka ngu ni Ruhanga ow’amazima.

‘Naija kuragaza amarira goona aha maisho gaabo; tiharikwija kubaho kufa obundi, n’obu kwakuba okucura nari okurira nari obusaasi, ahakuba ebya ira nibiija kuba bihweireho. Ogwo owaabaire ashutami aha kitebe ky’obukama yaagira ati: Reeba nimpindura byona bisya kandi yaangira ati: Handiika, ahakuba ebigambo ebi n’eby’okwesigwa kandi eby’amazima.’​—Okushuuruurwa 21:4, 5.

Ebyahangirwe na Baibuli nibyoreka emitwarize ya Tataitwe ow’omu iguru. N’obu ebyahangirwe biraabe nibihwera abantu kumanya Ruhanga nka munywani waabo ow’aha mara, yo Baibuli neebeeta butunu kwirira “haihi Ruhanga, nawe abone kubairira haihi.” (Yakobo 4:8) Ebyakozirwe 17:27 nihooreka ngu tari “hare n’omuntu weena omuriitwe.”

Waateeraho kumanya Ruhanga, noija kweyongyera kugira obuhame ngu naakufaho nari ngu ‘naakutaho omutima.’ (1 Petero 5:7) Noogasirwa ota waayesiga Yehova?

Yetegyereze eky’okureeberaho kya Toru, owa Japan. Akoororwa nyina Omukristaayo, kwonka akatandika kwejumba omu by’obushaarizi, obu yaaza omu kibiina kya yakuza eky’enkozi z’ebibi omuri Japan. Naashoboorora ati: “Nkaba nimmanya ngu Ruhanga naanyanga, kandi nkaba ninteekateeka ngu okufa kw’abantu na munonga abu ndikukunda, kikaba nikyoreka ngu ndiyo ninfubirwa.” Toru naagira ngu ahabw’embeera mbi egi n’emiteekateekyere ye, akaba omuntu “otaine saasi kandi otarikufayo aha bandi.” Kuhikaana n’ekigyendererwa kye, naagira ati: “Nkaba niinyenda kufa nkiri muto naaheza kwita omuntu orikumanywa kunkira, reero nkatsiga naakora eiziina.”

 Kwonka, Toru n’omukazi we Hannah ku baayegire Baibuli, Toru akakora empindahinduka ahonaaho. Hannah naagira ati: “Nkareeba ibanyi arikukora empindahinduka ezi.” Hati Toru naagambisa obumanzi ati: “Hariho Ruhanga buzima orikufayo ahari buri omwe ahariitwe. Tarikwenda muntu weena kufa, kandi naaba ayeteekateekire kusaasira boona abarikweteisa enshobe zaabo. Naahurira n’ebyo ebi tutarikubaasa kugambira omuntu weena n’ebi abandi batarikubaasa kwetegyereza. Omu biro by’omumaisho, Yehova naija kwihaho oburemeezi bwona, okubonabona, n’obusaasi. Nangwa na hati, naatuhwera omu miringo ei tutarikuteekateeka. Naatufaho kandi naatuhwera twaba tutaine maani.”​—Zaaburi 136:23.

Nk’oku eky’okureeberaho kya Toru kirikworeka, okumanya ngu Ruhanga naabaasa, kandi ngu ari haihi kwihaho ebihikiirizi byona n’amarira, nikituha amatsiko aha biro by’omumaisho, kandi kituhwera n’okugira amagara marungi hati. Nangwa n’omu nsi egi eijwiremu okubonabona, noobaasa kugasirwa ahabw’okufayo kwa Ruhanga.