NOOBAASA KUCWAMU OKU EBIRO BYAWE BY’OMUMAISHO BIRAABE? Abantu abamwe nibateekateeka ngu tibarikubaasa kwecweramu ahakuba Ruhanga akacwamu kare ekiraababeho. Baaremwa kuhikiiriza ebigyendererwa ebimwe, nibabyehuzya barikuteekateeka ngu tibirikubaasika. Nibagira ngu “kikatebeekanisibwa kare ngu ntahikiiriza ekigyendererwa kyangye!”

Abamwe nibeehwa amatsiko baareeba batarikubaasa kuruga omu mbeera zigumire, kandi ezitari z’oburingaaniza eziri omu nsi egi. Nibabaasa kuba nibateeraho kushemeza embeera zaabo, kwonka nibareeba entebeekanisa zaabo zirikuteganisibwa entaro, okuhenda ebiragiro, ebihikiirizi, n’endwara. Nibagira bati: ‘Tinshemereire kweteganisa.’

N’eky’amazima embeera nizibaasa kuteganisa entebeekanisa zaawe. (Omubuurizi 9:11) Kwonka aha bikwatiraine n’ebiro byawe by’omumaisho, oine kwecweramu. Nangwa na Baibuli neeyoreka ngu ebiro byawe by’omumaisho nibyegamira aha bi orikucwamu. Yetegyereze eki erikugamba.

Musa, omwebembezi wa Israeli eya ira, ebigambo bya Yehova akabigambira Abaisraeli abaabaire nibaija kutaaha omu Nsi Eyaaraganisiibwe ati: “Naata omu maisho gaanyu amagara n’okufa, omugisha n’omukyeeno; n’ahabw’ekyo mutoorane amagara, mubone kugumaho, imwe n’oruzaaro rwanyu, okukunda Mukama Ruhanga waanyu, okuhurira eiraka rye, n’okumuhamiraho.”​—Eky’Ebiragiro 30:15, 19, 20.

“Naata omu maisho gaanyu amagara n’okufa, omugisha n’omukyeeno; n’ahabw’ekyo mutoorane amagara.”​—Eky’Ebiragiro 30:19

Buzima, Ruhanga akacungura Abaisraeli kuruga omu buhuuku Misri, yaabaha amatsiko g’okutunga amagara marungi omu Nsi Eyaaraganisiibwe. Kwonka ebi byona bakaba batarikwija kubitunga bataine eki bakozire. Kubaasa kutunga emigisha egyo, bakaba baine ‘kutoorana amagara.’ Mu muringo ki? ‘Barikukunda Ruhanga waabo, barikumuhurikiza, kandi bakamuhamiraho.’

Obunaku obu, naiwe oine kucwamu, kandi eki oraacwemu nikiija kukwata aha biro byawe by’omumaisho. Waacwamu kukunda Ruhanga, okamuhurikiza, kandi okamuhamiraho, noija kuba ori nk’oriyo nootoorana amagara g’ebiro byona omu paradiso omu nsi. Kwonka shi okukora ebi nikitwariramu ki?

Rukundo nigwo mutwarize gwa Ruhanga omukuru. Entumwa Yohaana akahandiika ngu ‘Ruhanga ni rukundo.’ (1 Yohaana 4:8) Ahabw’enshonga egi, ku baabuurize Yesu ekiragiro ekirikukira ebindi, akagira ati: “Kunda Mukama Ruhanga waawe n’omutima gwawe gwona, n’amagara gaawe goona, n’obwengye bwawe bwona.” (Matayo 22:37) Okugira omukago ogwabuzima na Yehova nikyegamira ahari rukundo beitu kutari kufa kworoba. Mbwenu shi ahabw’enki twine kucwamu kumukunda?

Oku Yehova arikukunda abantu ni nk’oku abazaire barikukunda abaana baabo. N’obu abazaire baraabe batahikiriire, nibeegyesa abaana baabo, babahuumuriza, babashagika, kandi babahana ahabw’okwenda ngu bashemererwe kandi basingure. Mbwenu shi abazaire nibaba nibenda ngu abaana baabo bakore ki? Nibenda ngu babakunde kandi bagume nibaijuka ebi abazaire baabo baabeegyeise kubaasa kugasirwa. Mbwenu shi t’eky’oburyo kugira ngu Tataitwe ow’omu iguru naayenda tusiime byona ebi atukoreire?

Omu rurimi oru Baibuli yaabandize kuhandiikwamu, ekigambo “okuhurikiza” kiine amakuru “g’okworoba.” Mbwenu shi eki tikyo turikuba nitumanyisa twagira ngu abaana, “muhurikize abazaire baanyu”? N’ahabw’ekyo, okuhurikiza eiraka rya Ruhanga nikimanyisa okwega ebi arikugamba n’okubyorobera. Obu tutarikubaasa kuhurira eiraka rya Ruhanga butunu, nitumuhurikiza turikushoma Ekigambo kye Baibuli, kandi tukagyendera aha birimu.​—1 Yohaana 5:3.

Yesu okworeka obukuru bw’okuhurikiza eiraka rya Ruhanga, eizooba rimwe akagira ati: “Omuntu tatungwa by’okurya byonka, kureka n’ekigambo kyona ekiruga omu kanwa ka Ruhanga.” (Matayo 4:4) Nk’oku eby’okurya biri bikuru ahariitwe, okumanya ebirikukwata ahari Ruhanga kyo ni kikuru munonga. Ahabw’enki? Omugabe Sulemaani omunyabwengye akagira ati: “Obwengye n’obweshereko, nk’oku empiiha ziba obweshereko; kandi omugasho gw’okumanya n’obwengye bw’okurinda amagara g’obwine.” (Omubuurizi 7:12) Okumanya n’obwengye ebirikuruga ahari Ruhanga nibibaasa kuturinda obunaku obu, kandi bituhwere kucwamu gye ekiraatureetere kutunga amagara agatahwaho omu biro by’omumaisho.

Teekateeka aha bigambo bya Yesu ebiri omu kicweka eky’enyima, ebirikugira biti: “Eirembo eririkutaasya omu magara rifunzire, n’akahanda kaaryo kagumire, n’abakazoora baba bakye.” (Matayo 7:13, 14) Okubaasa kugyendera omu kahanda nk’ako, buzima hashemereire kugira owaatwebembera, kandi tukakuratira obuhabuzi kubaasa kuhika ei turikuza, nikwo okutunga amagara agatahwaho. N’ahabw’ekyo, hariho enshonga nungi ezishemereire kutureetera kuguma haihi na Ruhanga. (Zaaburi 16:8) Kwonka shi ekyo nitukikora tuta?

Buri izooba, hariho ebintu bingi ebi twine kukora n’ebi turikuba nitwenda kukora. Ebintu nk’ebi nibitureetera kugira bingi by’okukora nari nibituhuzya bituremesa kutunga obwire bw’okuteekateeka aha bi Ruhanga arikwenda ngu tukore. Niyo nshonga ahabw’enki Baibuli neetwijutsya eti: “Mwerinde, mumanye oku murikugyenda, mutagyenda nk’abataine bwengye, kureka nk’abanyabwengye, mutafiisa busha omwanya, ahakuba ebiro ebi ni bibi.” (Abaefeso 5:15, 16) Nituguma haihi na Ruhanga turikutwara omukago gwaitu nawe nka mukuru kukira ekindi kintu kyona.​—Matayo 6:33.

N’obu oraabe otarikubaasa kuhindura ebyakuhikireho enyima, hariho ebirungi ebi orikubaasa kukora kugira ebiro birungi by’omumaisho n’ab’omu ka yaawe. Baibuli neeyoreka ngu Tataitwe ow’omu iguru Yehova Ruhanga, naatukunda munonga kandi naatumanyisa eki arikwenda ngu tukore. Yetegyereze ebigambo bya nabi Miika ebiri ahaifo:

“Iwe muntu ‘we, akworekire ekirungi; mbwenu eki Mukama arikukwenza niki, kureka okukora eby’oburyo, okukunda embabazi, n’okugyenda na Ruhanga waawe n’obucureezi?”​—Miika 6:8.

Mbwenu shi noija kwikiriza kugyenda na Yehova, reero otungye emigisha ey’ebiro byona ei abiikiire abarikugyenda nawe? Niiwe oine kwecweramu!