Waaba nooyenda kumanya gye omuntu, ni kirungi kumanya ebi akozire n’oburemeezi abu asingwire. Omu muringo nigwo gumwe, waaba nooyenda kumanya gye Ruhanga, oine kwetegyereza gye ebi yaakozire. Noija kutangaara kumanya ngu bingi ebi yaakozire ira nibitugasira hati, kandi nibikwata n’aha biro byaitu eby’omumaisho.

Yehova Ruhanga niwe Muhangi, kandi “okuruga aha kuhangwa kw’ensi” emitwarize ye ‘etarikureebwa nereebekyera kimwe, omu bi yaahangire.’ (Abarooma 1:20) ‘Niwe yaahangire ensi n’obushoboorozi bwe, akagihamya n’obwengye bwe, n’okwetegyereza kwe nikwo yaabambiise eiguru.’ (Yeremia 10:12) Ebi Ruhanga yaahangire ebirikutangaaza nibyoreka ngu naatufaho.

Teekateeka aha ku Ruhanga yaahangire amagara gaitu omu muringo gw’omutaano obu yaatuhanga omu ‘kyeshusha kye.’ (Okutandika 1:27) Eki nikimanyisa ngu akatuhanga omu muringo ogurikutubaasisa kworeka emitwarize nk’eye. Akatuhanga twine ekyetengo ky’eby’omwoyo, ekirikumanyisa ngu nitubaasa kwetegyereza emisingye ye n’emiteekateekyere ye. Kandi ku turikuteeraho kugyendera aha misingye egi, nitugira okushemererwa n’ekigyendererwa. Okwongyera ahari ekyo, atuhaire omugisha gw’okubaasa kugira omukago murungi nawe.

Ebihangirwe bye ebiri omu nsi, nibyoreka oku arikutufaho. Entumwa Paulo akagira ngu, Ruhanga “tararekyeire aho kubura eky’okumuhamya, ahakuba akaguma naabakora gye, naabagwisiza enjura okuruga omu iguru, naabeereza emyaka omu bunaku bwayo, naabahaazya eby’okurya, naijuza emitima yaanyu okushemererwa.” (Ebyakozirwe 14:17) Ruhanga akatuha bingi kukira n’aha bi turikwetenga kubaasa kubaho. Akatuha ebintu bingi kandi eby’emiringo etarikushushana kugira ngu tutungye okushemererwa. Kwonka ebi ni bikye munonga waabigyeragyeranisa na byona ebi yaabaire atutebeekanisiize.

Yehova akahanga ensi kutuurwamu abantu ebiro byona. Baibuli neegira eti: “Ensi akagiha abantu,”  kandi “taragihangire etari mu buteeka, kureka akagihanga kutuurwamu.” (Zaaburi 115:16; Isaaya 45:18) Ekaba neija kutuurwamu baahi, kandi kumara bwire ki? ‘Abahikiriire nibaija kuhungura ensi, bagituuremu ebiro byona.’​—Zaaburi 37:29.

N’ahabw’ekyo, Yehova akahanga omushaija n’omukazi abaabandize, Adamu na Haawa, yaabata omu paradiso omu nsi ‘okugihinga n’okugirinda.’ (Okutandika 2:8, 15) Ruhanga akabaha obujunaanizibwa bw’emiringo ebiri: “Muzaare, mukanye, mwijure ensi, ebe eyaanyu.” (Okutandika 1:28) Adamu na Haawa bakaba baine amatsiko g’okugumaho ebiro byona omu nsi. Eky’obusaasi, bakacwamu kugomera Ruhanga baafeerwa omugisha gw’okuba bamwe aha ‘bahikiriire abaraahungure ensi.’ Kwonka nk’oku turikwija kureeba, eki baakozire tikiraahindwire ekigyendererwa eki Yehova yaabaire ainiire abantu nari ensi. Kwonka ka tubanze tureebe ekintu ekindi eki Yehova yaakozire.

Baibuli neeyetwa Ekigambo kya Ruhanga. Ahabw’enki Yehova yaatuhaire Baibuli? Enshonga enkuru n’okwenda ngu twegye ebirikumukwataho. (Enfumu 2:1-5) N’amazima, Baibuli terikugarukamu buri kibuuzo eki turikubaasa kuba twine ekirikukwata ahari Ruhanga, buzima tihariho ekitabo kyona ekirikubaasa kukora ekyo. (Omubuurizi 3:11) Kwonka buri kimwe ekiri omu Baibuli nikibaasa kutuhwera kumumanya. Nitumanya emitwarize ye kurugiirira aha ku arikutwariza abantu. Kandi nitumanya ni bantu ba muringo ki abu arikukunda n’abu arikwanga. (Zaaburi 15:1-5) Nitwega aha miteekateekyere ye aha bikwatiraine n’okuramya, emicwe, n’eby’obugaiga. Kandi Baibuli neetuhwera kwetegyereza gye emitwarize ya Yehova kurabira omu bi Omwana we, Yesu Kristo yaagambire n’ebi yaakozire.​—Yohaana 14:9.

Enshonga endiijo ahabw’enki Yehova yaatuhaire Ekigambo kye Baibuli, n’ahabw’okwenda ngu tumanye oku turikubaasa kushemererwa twine ekigyendererwa. Omu Baibuli, Yehova naatugambira oku turikubaasa kutunga okushemererwa omu ka, okumarwa, n’okwemera okwerarikirira. Nk’oku kirikwija kushoboororwaho omu magaziini egi, Baibuli neebaasa kutuhwera kumanya eby’okugarukamu by’ebibuuzo ebikuru nk’ebi: Ahabw’enki hariho okubonabona kwingi? Niki ekirikwija kubaho omu biro by’omumaisho? Kandi neeshoboorora n’eki Ruhanga akozire okuhikiiriza ekigyendererwa kye eky’okubanza.

Buzima Baibuli n’ekitabo ky’omutaano kandi hariho n’enshonga ezindi nyingi ezirikworeka ngu neeruga ahari Ruhanga. Baibuli ekahandiikwa abashaija 40, omu bwire oburikurenga emyaka 1,600, kwonka neegamba aha mutwe gumwe omukuru ahakuba Owaagihandiikiise ni Ruhanga. (2 Timoseo 3:16) Okutashushana n’ebitabo ebindi ebya ira, Baibuli ebaasize kurindwa gye okuhitsya na hati nk’oku kirikworekwa omu bihandiiko bya Baibuli ebya ira. Kandi Baibuli ebaasize kugumaho n’obu abamwe bateireho kuremesa omurimo gw’okugivuunura, kugijanjaaza, n’okugishoma. Obunaku obu nikyo kitabo ekirikukirayo kujanjaazibwa n’okuvunuurwa. Kandi ahabw’okuba hati Baibuli eriho, n’obuhame ngu ‘Ekigambo kya Ruhanga nikigumaho ebiro byona.’​—Isaaya 40:8.

Ekindi eki Ruhanga akozire n’okutaho entebeekanisa y’okuhikiiriza ekigyendererwa eki atwiniire. Nk’oku kiri omu kicweka eky’enyima, Ruhanga akagyenderera ngu abantu batuure omu nsi ebiro byona. Kwonka Adamu ku yaagomiire Ruhanga kandi akashiisha, akeefeerereza omugisha gw’okugumaho ebiro byona, n’abaana be. “Nk’oku ekibi kyaizire omu nsi ahabw’okushiisha kw’omuntu omwe, kandi kikarugamu okufa, nikwo n’okufa kwabugire omu bantu boona, ahakuba boona bakashiisha.” (Abarooma 5:12) Okushiisha kwa Adamu, kukataahataaha omu kigyendererwa kya Ruhanga, okaba nooshusha oti tikirikuza kuhikiirira. Yehova akatwaza ata?

Eki Yehova yaakozire kikaba nikihikaana n’emitwarize ye. Akacwera Adamu na Haawa orubanja kuhikaana n’eki baakozire, kwonka yaataho entebeekanisa y’okuhwera oruzaaro rwabo. Omu muringo gw’obwengye, Yehova akacwamu oku  araashoboorore embeera egi, kandi ahonaaho akagamba eki arikuza kukora. (Okutandika 3:15) Ruhanga akaba naija kwihaho ekibi n’okufa kurabira omu Omwana we, Yesu Kristo. Eki kikaba nikiija kutwariramu ki?

Yehova kubaasa kucungura abantu kuruga omu buremeezi bw’obugomi bwa Adamu, akooherereza Yesu kwija omu nsi kwegyesa abantu amazima “n’okuhayo amagara ge okucungura baingi.” a (Matayo 20:28; Yohaana 14:6) Yesu akaba naabaasa kuhayo ekitambo ahakuba akaba ahikiriire nka Adamu. Kwonka okutashushana na Adamu, Yesu akoorobera Yehova okuhitsya aha kufa. Ahakuba Yesu akaba atashemereire kufa, Yehova akamuzoora yaamugarura omu iguru. Hati Yesu akaba naabaasa kukora ekyaremire Adamu, okuha abantu abacureezi amatsiko g’okutunga amagara agatahwaho. “Ahakuba nk’oku baingi baahindukire abasiisi ahabw’okutahurira kw’omuntu omwe, nikwo baingi barihinduka abahikiriire ahabw’okuhurira kw’omwe.” (Abarooma 5:19) Kurabira omu kitambo kya Yesu, Ruhanga naija kuhikiiriza eki yaaraganiise abantu eky’okubaha amagara agatahwaho omu nsi.

Oku Yehova yaatwarize bwanyima y’obugomi bwa Adamu nitukyegyeraho bingi. Nitwega ngu tihariho ekirikubaasa kuzibira Yehova kuhikiiriza eki arikuba atandikire. Ekigambo kye kiine ‘kuhikiirizibwa.’ (Isaaya 55:11) Nikituhwera n’okumanya ngu Yehova naatukunda munonga. “Omuri eki nimwo okukunda kwa Ruhanga kwayorekyeirwe omuriitwe, obu yaatuma omwana we omwe nyamunegyere, ngu tube abahuriire ahabwe. Omuri eki nimwo okukunda kuri; tiitwe twakunzire Ruhanga, kureka niwe yaatukunzire, akatuma omwana we kuba ekarabo ahabw’ebibi byaitu.”​—1 Yohaana 4:9, 10.

Ruhanga “taratwimire Mwana we ahabwe, kureka akamuhayo ahabwaitu twena, ekyo nikituhamiza ngu naija “kutuha byona” ebi yaaraganiise. (Abarooma 8:32) Ruhanga aturaganiise kutukorera ki? Shoma ekicweka ekirikukurataho.