TEEKATEEKA AHARI EKI: Oriyo noorambura enju y’ebya ira erimu ebiijutsyo bingi. Bingi aharibyo birimu ebihengyere, bisiibuukire, kandi bikuzire. Ebimwe ebicweka byabyo bikabura. Kwonka kimwe aharibyo, kikiri gye kikiri omu buteeka bwakyo. Reero obuuza orikukurambuza oti: “Eki ni kisya kukira ebindi?” Agarukamu ati: “Ngaaha, ni kikuru munonga kukira ebindi, kandi tibakakihuunduzaga.” Reero ogaruka omubuuza oti: “Mutwire mukirinzire shi kugira ngu kitasiisikara?” Nawe akugarukamu ati: “Ngaaha, eki nikyo kikizireyo kuteerwa enjura n’omuyaga. Kandi abantu baingi bateireho munonga kukishiisha.” Obundi noobaasa kutangaara oyebuuze oti: ‘Kikozirwe omuri ki?’

Baibuli eri nk’ekiijutsyo ekyo eky’omutaano. N’ekitabo kya ira munonga. Beitu hariho n’ebindi bitabo bya ira. Kwonka ahabw’obwire obuhingwireho bingi aha bihandiiko bya ira bisiisikaire munonga nk’ebiijutsyo ebikuzire. Nk’eky’okureeberaho, ebi birikugamba ahari saayansi tibirikwikirizana n’obwengye obwa hati obwine obuhame. Obuhabuzi bwabyo aha by’obujanjabi nibuba buri obw’akabi omu mwanya gw’okuhwera. Kandi bingi aha bihandiiko bya ira bicwanyagurikire, kandi n’obucweka bwabyo obumwe bukabura nari busiisikaire munonga.

Kwonka yo Baibuli, n’ey’omutaano. Ekatandika kuhandiikwa ebyasha ebirengire 35 enyima, kwonka obutumwa bwayo bwona bukirimu. N’obu eraabe etwire neehiiganisibwa kumara emyaka mingi, erikwokibwa, erikuzibirwa, kandi erikujumwa, obutumwa bwayo tibuhindukire. N’obu haraabe hariho okumanya kusya, Baibuli yo terikuhanguura, neegamba aha nshonga nyingi ezirikworeka obwengye  bw’ahaiguru.​—Reeba akabokisi “Ehaangwire Nari Ekagamba Ebitakamanyirwe?”

Kwonka noobaasa kwebuuza oti: ‘Enyegyesa za Baibuli buzima nizikora omu bwire obu?’ Kubaasa kugarukamu ekibuuzo eki, yebuuze oti: ‘Ni buremeezi ki obu abantu baine obunaku obu? Ni buremeezi ki oburikukirayo kutiinisa munonga?’ Obundi noogira ngu n’entaro, emyika mibi, okuhenda ebiragiro, n’okurya enguzi. Hati ka tureebe emisingye emwe ei Baibuli erikwegyesa. Twaba nitugireeba, yebuuze oti: ‘Abantu baagyendera aha misingye egi, mbwenu shi ensi terikuba omwanya murungi?’

OKUKUNDA OBUSINGYE

“Baine omugisha abagarukanisa abantu, ahabw’okuba abo baryayetwa abaana ba Ruhanga.” (Matayo 5:9) “Ku kiraabe nikibaasika aha rubaju rwanyu, mutuurane n’abantu boona n’obusingye.”​—Abarooma 12:18.

EMBABAZI N’OKUSAASIRA

“Baine omugisha abanyambabazi, ahabw’okuba abo baryagirirwa embabazi.” (Matayo 5:7) Mugumizemu “nimugumisiririzana; kandi ku haraabe hariho oine eki arikufa na mugyenzi we, musaasirane; nk’oku Mukama yaabasaasiire, mube nikwo mwatwaza.”​—Abakolosai 3:13.

OBUMWE BW’ABATARIKUSHUSHANISA RANGI

Ruhanga “akahanga amahanga goona ag’abantu, naabakomoora aha muntu omwe, ngu batuure omu nsi yoona.” (Ebyakozirwe 17:26) ‘Ruhanga tashoroora mu bantu, kureka omu mahanga goona orikumutiina, akakora eby’okuhikiirira, ogwo niwe arikusiimwa.’​—Ebyakozirwe 10:34, 35.

OKURINDA GYE ENSI

Yehova “Ruhanga yaatwara ogwo muntu, yaamuta omu kibanja ky’omuri Edeni okukihinga n’okukirinda.” (Okutandika 2:15) Ruhanga naija ‘kuhwerekyereza abarikuhwerekyereza ensi.’​—Okushuuruurwa 11:18.

OKWANGA OMURURU N’EBY’OBUSHAMBANI

“Mwerinde okwetenga kwona, ahabw’okuba amagara g’omuntu tigari mu bwingi bw’ebintu ebi aine.” (Luka 12:15) “Kwonka obushambani n’ekihagaro kyona n’okwetenga kwona bitarigambwaho omuriimwe, mube nk’oku abarikwera bashemereire kuba.”​—Abaefeso 5:3.

OBWESIGWA, N’OKUKORA N’AMAANI

“Nitwetenga kutwaza gye omuri byona.” (Abaheburaayo 13:18) “Omushuma arekye kugaruka kwiba, kureka akore n’amaani.”​—Abaefeso 4:28.

OBUKURU BW’OKUHWERA ABAINE EKI BAKYENIRE

“Mugumye abahahaire emitima, muramire abataine maani, mugumisiririze boona.” (1 Abatesalonika 5:14) Mureeberere “efuuzi n’abafaakazi omu busaasi bwabo.”​—Yakobo 1:27.

Baibuli terikutugambira emisingye egyo kyonka, kureka neetugambira n’oku twine kukikora. Noogira ngu abantu baingi baagyendera aha misingye egi ensi terikubamu oburemeezi bukye? Buzima, emisingye ya Baibuli neekikora na hati kukira ira! Mbwenu shi emisingye ya Baibuli neebaasa kukuhwera eta hati?

Omushaija omunyabwengye orikukirayo, rimwe akagira ati: “Obwengye busiimirwa aha mirimo yabwo.” (Matayo 11:19) Torikwikirizana nawe? Obwengye noomanya ngu buzima nibukora waaheza kubugyenderaho. N’ahabw’ekyo noobaasa kwebuuza oti: ‘Baibuli buzima ku eraabe neekora, teshemereire kuhindura emitwarize yangye? Neempwera eta omu buremeezi obu nyine hati?’ Teekateeka aha ky’okureeberaho eki.

Delphine, * akaba aine bingi by’okukora kandi birikumugasira. Kwonka ahonaaho, akatunga oburemeezi bwingi. Akafeerwa omuhara owaabaire akiri omushogoyo, kandi n’obushwere bwe bukashenyuka. Akatunga oburemeezi omu by’esente. Naagira ati: “Nkaba ntakyeyetegyereza, nkaba ntaine muhara wangye, ntaine ibanyi, n’eka. Nkereeba ngu tinyine mugasho, tinkimanywa, ntaine maani, n’ekigyendererwa kyona.”

Delphine akeetegyereza gye amakuru g’ebigambo ebi: “Emyaka y’amagara gaitu eba makumi mushanju, nari ku tuba twagizire amaani, ehika makumi munaana; kwonka okugyogamu n’okufa kubi n’okureeba enaku; ahakuba erahuka kuhwaho, naitwe twegyendera.”​—Zaaburi 90:10.

 Delphine akahwerwa Baibuli omu bwire bugumire obu. Eki Baibuli yaamukoreire nikitangaaza. Nk’oku ebicweka bishatu ebirikukurataho birikuza kworeka, Baibuli ehwereire n’abandi baingi kusingura oburemeezi bwabo bwanyima y’okugyendera aha buhabuzi bwayo. Babaasize kureeba ngu Baibuli ni nk’ekiijutsyo eki twareeba aha kutandika kw’ekicweka eki. Neetaaniira kimwe aha bitabo bingi ebirikukura bikahanguura. Mbwenu shi n’ahabw’okugira ngu ekozirwe omu kintu ky’omutaano? Nari shi n’ahabw’okugira ngu erimu ebiteekateeko bya Ruhanga bitari by’abantu?​—1 Abatesalonika 2:13.

Naiwe noobaasa kuba oreebire ngu amagara ni magufu, kandi gaijwire oburemeezi. Ku orikutunga oburemeezi bwingi, noiha nkahi okuhuumurizibwa, obuhwezi, n’obuhabuzi oburikwesigwa?

Ka tureebe emiringo eshatu ei Baibuli erikutuha obuhabuzi oburikukora. Neetuhwera

1. kwetantara oburemeezi kyabaasika.

2. kusingura oburemeezi bwabaho.

3. kwemera oburemeezi omu mbeera ezitarikuhindukae.

Ebicweka ebirikukurataho nibigamba aha nshonga ishatu ezi.