1, 2. Ahabw’enki Paulo yaahandiikiire Abakristaayo Abaheburaayo ebaruha?

OMU gwa 61, ebibiina Ebikristaayo omuri Israeli yoona bikaba biine obusingye buringaniire. N’obu entumwa Paulo yaabaire ari omu kihome omuri Rooma, akaba aine amatsiko ngu naija kurekurwa. Timoseo ou yaabaire naagyenda nawe omu murimo gw’obumisani akaba aherize kurekurwa, kandi bakaba nibatebeekanisa kutaayaayira ab’eishe-emwe bagyenzi baabo omuri Buyudaaya. (Heb. 13:23) Kwonka, omu myaka etaano, Yerusaalemu ekaba neija ‘kwehinguririzibwa engabo,’ nk’oku Yesu yaabaire agambire. Abakristaayo omuri Buyudaaya, na munonga abaabaire nibatuura Yerusaalemu, bakaba baine kucwamu. Yesu akaba yaabarabwire ngu bahunge ahonaaho baareeba ebintu ebi byatandika kubaho.​—Luk. 21:20-24.

² Hakaba hahingwireho emyaka 28 kuruga obu Yesu yaagamba obunabi obwo, kandi Abakristaayo Abayudaaya abaabaire nibatuura omuri Israeli bakaba baherize kusingura okuhakanisibwa n’okuhiiganisibwa. (Heb. 10:32-34) Kwonka, Paulo akaba naamanya ngu bari haihi kugyezibwa munonga aha bikwatiraine n’okwikiriza kwabo. (Mat. 24:20, 21; Heb. 12:4) Akaba  naayenda ngu bagume betebeekanisiize kyona ekirikubaasa kubahikaho. Kikaba nikibeetengyesa kugira okugumisiriza n’okwikiriza kw’amaani kubaasa kuhonokaho. (Shoma Abaheburaayo 10:36-39.) N’ahabw’ekyo, Paulo akahigwa omwoyo gurikwera kuhandiikira ab’eishe-emwe abo ebaruha eyaabaire neehikaana n’ebyetengo byabo by’omutaano. Ebaruha egyo neemanywa nk’ekitabo ky’Abaheburaayo.

3. Ahabw’enki twine kufayo kumanya ebiri omu kitabo ky’Abaheburaayo?

³ Twena obunaku obu tushemereire kufayo aha bi Paulo yaahandiikiire Abakristaayo Abaheburaayo omu kyasha ky’okubanza. Ahabw’enki? Ahabw’okuba turi omu mbeera nk’ezaabo. Obunaku obu ‘hariho ebiro by’akabi kaingi,’ abaheereza ba Yehova nibahikwaho okuhakanisibwa n’okuhiiganisibwa okw’emiringo yoona. (2 Tim. 3:1, 12) Tworekyeire kimwe tutarikubanganisa ngu twine okwikiriza kuhami. Baingi ahariitwe, baine obusingye buringaniire ahakuba tibarikuhiiganisibwa. Kwonka, nk’Abakristaayo b’omu bunaku bwa Paulo, titushemereire kwebwa amazima aga, ngu juba okwikiriza kwaitu nikwija kugyezibwa munonga!​—Shoma Luka 21:34-36.

4. Ekyahandiikirwe ky’omwaka 2016 ni kiiha, kandi ahabw’enki kihikire?

⁴ Niki ekiraatuhwere kwetebeekanisiza ebiri haihi kubaho omu biro by’omumaisho? Omu kitabo ky’Abaheburaayo, Paulo naagamba aha bintu bingi ebirikubaasa kutuhwera kuhamya okwikiriza kwaitu. Kimwe ekikuru nikigambwaho omu mushororongo gw’okubanza ogw’eshuura y’ahamuheru ey’ebaruha egyo. Omushororongo ogwo gutooroinwe kuba ekyahandiikirwe ky’omwaka 2016. Nigutuhiga guti: ‘Mugumizemu nimukundana.’​—Heb. 13:1.

5. Rukundo y’eishe-emwe niki?

⁵ Nikimanyisa ki okugirirana rukundo y’eishe-emwe? Ekigambo ky’Orugriika eki Paulo yaakoreise, phi·la·del·phiʹa, nikimanyisa “okufayo aha w’eishe-emwe.” Rukundo y’eishe-emwe n’omuringo gw’okufayo aha bandi, erikutwariramu omukago guhami nk’ogu ab’eka emwe nari abanywani barikuba baine. (Yoh. 11:36) Titurikweshushaniriza nk’ab’eishe-emwe kureka turi ab’eishe-emwe abaabuzima. (Mat. 23:8) Omukago gwaitu oguhami nigugambwaho omu bigambo ebi: “Omu kukunda ab’eishe-emwe, mukundane buzima; omu kuhaana ekitiinisa, buri muntu ateekateekye ahari mugyenzi we okumweshumba.” (Rom. 12:10) Abaheereza ba Ruhanga baaba baine rukundo egyo, na a·gaʹpe, nibagira omukago murungi.

6. Abakristaayo ab’amazima nibeetegyereza bata amakuru g’ebigambo rukundo y’eishe-emwe?

⁶ Rukundo y’eishe-emwe, kurugiirira aha mucondooza omwe, “n’ebigambo ebitarikukira kukoresibwa omu bitabo by’ediini.” Omu Bayudaaya aba ira, ekigambo “ow’eishe-emwe” bakaba bakikoresa aha munyabuzaare nari otari munyabuzaare, kwonka bakaba batarikubaasa kukikoresa aha muntu otari Muyudaaya. Kwonka, Abakristaayo nibaruga omu mahanga goona omu nsi. (Rom. 10:12) Twena ab’eishe-emwe, Yehova atwegyeise kugirirana rukundo. (1 Tes. 4:9) Kwonka shi, ahabw’enki ni kikuru kugumizamu nitukundana?

7. (a) Ni nshonga ki enkuru erikutureetera kukundana? (b) Ha enshonga endiijo ahabw’enki ni kikuru kwongyera kukundana.

⁷ Yehova naayenda ngu tukundane. Titurikubaasa kukunda Ruhanga twaba tutarikukunda  ab’eishe-emwe. (1 Yoh. 4:7, 20, 21) Kandi buri omwe naayetenga mugyenzi we, okukira munonga omu bwire bw’oburemeezi. Paulo akaba naamanya ngu Abakristaayo Abaheburaayo abu yaabaire naahandiikira, juba kikaba nikiija kubetengyesa kutsigaho amaka gaabo n’ebintu byabo. Yesu akaba agambire oku obwire obwo bwabaire nibwija kuguma. (Mak. 13:14-18; Luk. 21:21-23) Abakristaayo abo bakaba baine kwongyera kukundana okukira omu kubanza.​—Rom. 12:9.

8. Niki eki twine kukora hati okubonabona kwingi kutakatandikire?

⁸ Okubonabona kwingi kuri haihi kubaho. (Mak. 13:19; Kush. 7:1-3) Buzima ni kirungi kukuratira obuhabuzi obu: “Imwe bantu bangye ’mwe mutaahe omu bishengye byanyu, mube mwekingirainemu akaanya kakye, okuhitsya ahu ekiniga kiraahwere.” (Isa. 26:20) ‘Ebishengye’ ebi nibibaasa kuba nibimanyisa ebibiina byaitu. Niho twena turikuteeranira kuramya Yehova. Kwonka okuza omu nteerane obutoosha tikirikumara. Paulo akaijutsya Abakristaayo Abaheburaayo ngu enteerane zikaba ziine kubahiga ‘kukundana n’okukora ebirungi.’ (Heb. 10:24, 25) Twine kuteeraho kugira rukundo y’eishe-emwe hati, ahabw’okuba neija kutuhwera omu kugyezibwa kwona okuraabeho omu biro by’omumaisho.

9. (a) Twine migisha ki ey’okukundana obunaku obu? (b) Ha eby’okureeberaho ebirikworeka ngu abaheereza ba Yehova nibakundana.

⁹ Na hati, okubonabona kwingi kutakahikire, twine kuhamya ngu nitukundanira kimwe. Ab’eishe-emwe baingi bateganisiibwe emitsitsa, omwegyemure, eihunga, nari ebihikiirizi ebindi. Ab’eishe-emwe abamwe nibabonabona ahabw’okuhiiganisibwa. (Mat. 24:6-9) Kandi, hariho oburemeezi bw’eby’entaasya ahabw’okutuura omu nsi erimu obushomankuzi. (Kush. 6:5, 6) Oburemeezi obu bwona bwaguma nibweyongyera, naitwe tushemereire kwongyera kukundana. N’obu “okukunda kw’abaingi” kuraabe nikwija kuhora, twine kukyoreka ngu nitweyongyera kukundana.​—Mat. 24:12. ^[1]

10. Nituza kureeba kushwijuma ki?

¹⁰ N’obu turaabe nituhikwaho oburemeezi bwingi, nitubaasa kuhamya tuta ngu twaguma nitukundana? Nitubaasa kworeka ngu twiniire ab’eishe-emwe bagyenzi baitu rukundo ey’omuringo ogu? Bwanyima y’entumwa Paulo kugira ngu, “okukundana kugumeho,” akooreka emiringo mingi ei Abakristaayo baine kukikora. Ka tureebe mukaga aharibyo.

11, 12. Okukunira abandi nikimanyisa ki? (Reeba ekishushani aha kutandika.)

¹¹ “Mutarireka kukunira abagyenyi.” (Shoma Abaheburaayo 13:2.) Omu rurimi oru ekigambo ‘okukuna’ kirikukomookamu, nikimanyisa “okugirira embabazi abu otarikumanya.” Ebigambo ebyo nibitwijutsya eky’okureeberaho kya Abrahamu na Looti. Abashaija abo bombi bakagirira embabazi abagyenyi abu baabaire batarikumanya. Abagyenyi abo bakaba bari baamaraika. (Kut. 18:2-5; 19:13) Paulo akagamba aha by’okureeberaho ebyo kubaasa kuhiga Abakristaayo Abaheburaayo kugira rukundo barikukunira abagyenyi.

¹² Mbwenu shi nitukunira abandi turikubeeta omu maka gaitu kurya nabo nari kumara nabo obwire kubaasa kugaruranamu amaani? Tikirikwetengyesa kutebeekanisa ebintu bingi nari eby’esente nyingi kubaasa kumanywa nk’efura, kandi titurikwenda kweta abo abu turikuteekateeka ngu nabo nibaija kutweta. (Luk. 10:42; 14: 12-14) Ekigyendererwa kyaitu kishemereire kuba kiri okugaruranamu amaani beitu kutari kweyoreka! N’obu twakuba tutarikumanya gye omureeberezi orikutaayaayira ebibiina n’omukazi we, nitworeka ngu twine ekihika ky’okubakunira? (3 Yoh. 5-8) N’obu turaabe twine bingi by’okukora kandi turikwerarikirira oku turaabeho, ka ni kikuru ngu tugume ‘nitukunira abagyenyi’!

13, 14. Nitubaasa kuguma ‘nitwijuka tuta abari omu bihome’?

¹³ “Mwijukye abari omu bihome.” (Shoma Abaheburaayo 13:3.) Paulo akaba atarikumanyisa buri muntu weena ori omu kihome. Akaba naagamba aha b’eishe-emwe abakomirwe ahabw’okwikiriza kwabo. Paulo akaba amazire emyaka ena omu kihome obu yaagambira Abakristaayo Abaheburaayo ebigambo ebyo. (Fil. 1:12-14) Akasiima ab’eishe-emwe ahabw’okugira ngu ‘bakagirira embohe esaasi.’ (Heb. 10:34) Okutashushana n’abaahwereire Paulo obu yaabaire ari omu kihome, Abakristaayo Abaheburaayo abo bakaba bari hare na Paulo. Mbwenu shi bakaba baine kukuguma nibamwijuka bata? Bakaba baine kumwijuka barikumushabira.​—Heb. 13:18, 19.

¹⁴ Obunaku obu, naitwe nitubaasa kuba turi hare n’ab’eishe-emwe abari omu bihome. Nikibaasa kutugumira kubahwera nk’oku ab’eishe-emwe abari haihi n’ebihome ebi barimu barikubaasa kubahwera. Kwonka nitubaasa kubagirira esaasi na rukundo butoosha turikweshengyereza Yehova omu kushaba kubahwera. Nk’eky’okureeberaho, nitwijuka ab’eishe-emwe, nangwa n’abaana abari omu kihome omuri Eritrea, otwariiremu ab’eishe-emwe bashatu, Paulos Eyassu, Isaac Mogo, na Negede Teklemariam, abamaziremu emyaka erikurenga 20?

15. Nitubaasa kworeka tuta ngu nituha obushwere ekitiinisa?

¹⁵ “Obushwere mwena mubuhe ekitiinisa.” (Shoma Abaheburaayo 13:4.) Nitubaasa n’okworeka rukundo turikuguma turi abashemeire omu micwe. (1 Tim. 5:1, 2) Omuntu ‘yaashaagiza’ ow’eishe-emwe nari munyaanyazi-itwe akashambana nawe nari akashambana n’omwe aha b’omu ka ye, naaba yaashiisha entima ya rukundo y’eishe-emwe nibwo obwesigwa. (1 Tes. 4:3-8) Teekateeka oku omukazi arikubaasa kwehurira yaamanya ngu iba amureebize yaareeba ebirikwitsa enshoni. Mbwenu shi omuze ogwo nigworeka ngu nookunda omukazi waawe kandi ngu nooha obushwere ekitiinisa?​—Mat. 5:28.

16. Okumarwa nikutuhwera kuta kugirira ab’eishe-emwe rukundo?

¹⁶ “Ebi mwine bibe nibyo byabamara.” (Shoma Abaheburaayo 13:5.) Twayesiga Yehova nitugira okumarwa okwabuzima. Okumarwa nikutuhwera okugira emiteekateekyere mirungi aha eby’obutungi. (1 Tim. 6:6-8) Nikutuhwera kumanya ngu omukago gwaitu na Yehova n’ab’eishe-emwe ni mukuru munonga okukira ekintu kyona eki esente zirikubaasa kugura. Omuntu omazirwe tarikwetomboita, kugira rwekwatso, nari kurondereza enshobe omu bandi, nari kugira eihari n’omururu, ebirikubaasa kuturemesa kugirira ab’eishe-emwe rukundo. Omu mwanya gw’ekyo, okumarwa nikutuhwera kuba efura.​—1 Tim. 6:17-19.

17. Ahabw’enki ‘okutabanganisa’ nikituhwera kugirira ab’eishe-emwe rukundo?

¹⁷ ‘Mube abatarikubanganisa.’ (Shoma Abaheburaayo 13:6.) Twayesiga Yehova nikituhwera kutabanganisa, n’obu twakuhikwaho oburemeezi burikwingana ki. Okutabanganisa oku, nikutuhwera kugira emiteekateekyere mirungi. Rukundo  y’eishe-emwe, n’emiteekateekyere mirungi, nibitubaasisa kwombeka ab’eishe-emwe bagyenzi baitu n’okubagumya. (1 Tes. 5:14, 15) Kandi n’obu turaahikye omu kubonabona kwingi, nitwija kubaasa kureeba ‘ahaiguru, twimutsye emitwe yaanyu,’ turikumanya ngu okucungurwa kwaitu kuri haihi.​—Luk. 21:25-28.

18. Nitubaasa kwongyera tuta ahari rukundo ei twiniire abareeberezi baitu?

¹⁸ Mwijukye abareeberezi abarikureeberera ekibiina. (Shoma Abaheburaayo 13:7, 17.) Twateekateeka oku abareeberezi barikukora munonga kutuhwera obwo batarikushashurwa, nitwongyera kubasiima n’okubakunda. Titurikwenda ngu baburwe okushemererwa nari ngu bagire obusaasi ahabw’ebi turikukora. Omu mwanya gw’ekyo, twayoroba kandi tukakora ebi barikutugambira, ‘nitubaha ekitiinisa munonga omuri rukundo ahabw’omurimo gwabo.’​—1 Tes. 5:13.

19, 20. Nitubaasa kwongyera tuta kworeka rukundo y’eishe-emwe?

¹⁹ Hatariho kubanganisa abaheereza ba Yehova nibamanywa ahabw’okugirirana rukundo. Eki Paulo akaba naakimanya. Kwonka akagumizamu yaahiga boona ati: “Mugume mweyongyere kukundana.” (1 Tes. 4:9, 10) Butoosha twena nituba twine ahu tushemereire kwongyeramu amaani!

²⁰ Omwaka gwona twaba nitureeba aha kyahandiikirwe kyaitu eky’omwaka, ka tugume nituteekateeka aha bibuuzo ebi: Nimbaasa kwongyera kuba efura? Nimbaasa kwijuka nta ab’eishe-emwe abari omu kihome? Nimpa ekitiinisa entebeekanisa ya Ruhanga ey’obushwere? Niki ekiraampwere kutunga okumarwa okwabuzima? Nimbaasa kwongyera nta kwesiga Yehova? Nimbaasa kukwatanisa nta n’abo abarikwebembera ekibiina? Twahikiiriza ebintu mukaaga ebi, ekyahandiikirwe kyaitu ky’omwaka tikirikwija kuba ekyapa omu Kyombeko ky’Obukama kwonka. Kureka nikiija kutuhiga okworobera obuhabuzi obu: ‘Mugumizemu nimukundana.’​—Heb. 13:1.