Munywani waitu yaaba aine endwara y’omutwe, nitubaasa kwehurira nk’abataine kihwera. Kwonka nitworeka ngu nitufayo turikuhwera munywani waitu kugumisiriza embeera ye. Tuta shi?

‘Turikurahuka kuhurikiza.’ —YAKOBO 1:19.

Omuringo gumwe mukuru oku orikubaasa kuhwera munywani waawe n’okumuhurikiza yaaba naagamba naiwe. Otateekateeka ngu nooba oine kugira eki waakora ahari byona ebi araagambe. Teeraho kwetegyereza ebi arikugamba, kandi oyorekye ngu noomufaho. Hurikiza gye kandi otamucwera orubanja. Ijuka ngu naabaasa kugamba ebi atarikumanyisa kandi ebi arikwefuuza bwanyima.—Yobu 6:2, 3.

“Mugumye abahahaire emitima.” —1 ABATESALONIKA 5:14.

Munywani waawe naabaasa kuba ayerarikiriire, nari arikwereeba nk’otaine mugasho. Waamuhamiza ngu noomufaho, noobaasa kumuhuumuriza kandi omugumye, n’obu waakuba otarikwetegyereza gye eki yaagamba.

“Munywani w’omuntu amukunda ebiro byona.”—ENFUMU 17:17.

Bahe obuhabuzi oburikukora. Omu mwanya gw’okuteekateeka ngu noomanya oku orikubaasa kuhwera, buuza eki orikubaasa kukora. Munywani  waawe yaagumirwa kukugambira eki arikwenda, mugambire eki murikubaasa kukora kumwe, nk’okugyendaho hamwe. Nari noobaasa kumuhwera kugura ebintu, kuboneza, nari kukora omurimo ogundi.—Abagalatia 6:2.

‘Gumisiriza.’—1 ABATESALONIKA 5:14.

Obumwe munywani waawe naabaasa kuba atarikwenda kugamba. Muhamize ngu noija kumuhurikiza yaaba naayenda kugamba. Munywani waawe ahabw’okurwara, naabaasa kugamba nari akore ebintu ebirikukureetera kwehurira kubi. Naabaasa kuba naashazamu entebeekanisa zaanyu nari arikurahuka kuguubwa kubi. Mugumisirize kandi ogire okwetegyereza waaba noomuha obuhwezi obu arikwenda.—Enfumu 18:24.

“Niinteeraho kuba omunywani ou arikubaasa kugambira buri kimwe. N’obu ndikuba ntaine eki ndikubaasa kukora aha buremeezi bwe, ninfayo kumuhurikiza yaaba aine eki arikungambira. Obumwe eki arikuba naayenda kyonka kubaasa kwehurira gye, n’okumuhurikiza.”—Farrah, a ou munywani we aine endwara y’okutarya, okwerarikirira n’amaganya g’obwire bwona.

“Omwe ahari banywani bangye aine embabazi nyingi kandi naangumya. Akantaayaayisa owe twarya hamwe eby’okurya binuzire. Akantwariza omu muringo murungi ogwayorekire ngu naanfaho, ekyo kikambaasisa kugamba oku ndikwehurira. Ekyo buzima kikangumya!”—Ha-eun, oine endwara y’amaganya g’obwire bwona.

“Ni kikuru kugumisiriza. Omukazi wangye ku arikukora ekintu kikangwisa kubi, ninyijuka ngu yaakikora ahabw’okugira ngu arwaire, kwonka tikwo ari omu mutima gwe. Eki nikimpwera kutagira ekiniga n’okwongyera kumufaho.”—Jacob, oine omukazi oine endwara y’amaganya g’obwire bwona.

“Omukazi wangye naanshagika munonga kandi naampumuriza. Ku ndikuba nyerarikiriire, tarikungyemesereza kukora eki ntarikwenda. Obumwe ekyo nikimanyisa ngu taraakore ebi arikuba naayenda kukora. Aine omutima gw’okwefeerereza kandi n’efura, buzima n’ow’omutaano.”—Enrico, oine endwara y’okwerarikirira.