Abashweraine abahamiire aha bushwere bwabo nibabureeba nk’obw’obutwire, kandi eki nikibareetera kuhurira baine oburinzi. Buri omwe naaba aine obwesigye omuri mugyenzi we ngu naija kuguma omu bushwere, nangwa n’omu mbeera zigumire.

Abashweraine abamwe nibagyemeserezibwa abanyabuzaare n’abanyamikago kuguma hamwe. Kwonka, ni kirungi kuhamiranaho ahabw’okukundana n’okuhaana ekitiinisa.

OMUSINGYE GWA BAIBULI: “Omushaija atarishenda omukazi we.”​—1 Abakorinso 7:11.

“Waaba ohamiire aha bushwere bwawe, noikiriza kukushobeza. Noorahuka kusaasira n’okushaba okusaasirwa. Nooreeba oburemeezi nk’entsibo omu muhanda, beitu butari oburikuremesa obushwere.”​—Micah.

Abashweraine abatahamiraineho, baatunga oburemeezi nibabaasa kugira bati: ‘Tihaine oshemereire mugyenzi we’ reero basherure oburyo bw’okuruga omu bushwere.

“Abantu baingi nibaza omu bushwere barikumanya ngu byashoba nibaitururwa. Abantu baataaha hamwe omu bushwere barikuteekateeka aha kugaitururwa, nibaba batahamiraineho kuruga omu kutandika.”​—Jean.

YEGYEZE

Mwaba mwine obutaikirizana . . .

• Nooyeshanga orikwefuuza ahabw’enki waataahire omu bushwere n’omukundwa waawe?

• Nooteekateeka aha kuba n’ondiijo muntu?

• Nookira kugira ngu “ninza kukutsigaho” nari ngu “ninza kusherura ondiijo orikusiima ebi ndikukora”?

Waagarukamu kimwe aha bibuuzo ebyo ngu eego, hati nibwo bwire bw’okwongyera kuhamira aha mukundwa waawe.

GAANIIRAHO N’OMUKUNDWA WAAWE

• Okuhamiranaho kwaitu omu bushwere kutuubire? Ku kiraabe nikwo kiri, ahabw’enki?

• Nitubaasa kukora ki hati kwongyera kuhamiranaho?

OBUHABUZI

• Gira obwire ohandiikire omukundwa waawe akabaruha ka rukundo

• Yoreka ngu ohamiire aha mukundwa waawe orikuta ebishushani be aha meeza yaawe aha murimo

• Buri izooba teerera omukundwa waawe esimu mwaba mutari hamwe

OMUSINGYE GWA BAIBULI: “Eki Ruhanga yaateeraine hamwe, omuntu atarikitaanisa.”​—Matayo 19:6.