EBY’ABATO
9: Eki Ori
EKI KIRIKUMANYISA
Eki ori nikikira aha iziina ryawe n’endeebeka yaawe. Nikitwariramu emicwe yaawe n’emitwarize yaawe. Buzima, eki ori nikitwariramu buri kimwe ekirikukukwataho, omunda n’aheeru.
ENSHONGA AHABW’ENKI NI KIKURU
Waaba ori omuntu ohami, noija kuhamira aha nyikiriza zaawe omu mwanya gw’okwikiriza ab’orwingano rwawe kukugyemesereza kutwaza nkabo.
“Abantu baingi bari nk’ebibumbe by’okuhanikaho emyenda y’okuguza omu maduuka. Tibirikwetooranira emyenda, kureka abandi nibo barikutoorana emyenda y’okubihanikayo.”—Adrian.
“Nkeega oku ndikubaasa kuhamira aha kihikire n’obu kirikuba kigumire. Nimbaasa kumanya banywani bangye abaabuzima kurugiirira aha ku barikutwaza naaba ndi nabo.”—Courtney.
OMUSINGYE GWA BAIBULI: ‘Mutashushanisibwa n’ab’obusingye obu, kureka muhindurwe basya ahabw’okugarurwa busya omu biteekateeko byanyu.’—Abarooma 12:2.
EKI ORIKUBAASA KUKORA
Teeraho kumanya eki ori hati n’eki orikwenda kuba nyentsya orikushwijuma okubaasa kwawe, obweremwa bwawe, n’ebi orikwikiriza. Omuringo murungi gw’okutandika n’okugarukamu ebibuuzo ebi.
Okubaasa: Ni talanta ki ezi nyine n’emyoga? Ni bintu ebi ndikukora gye? (Nk’eky’okureeberaho: Ninkwata obwire? ndi omwerinzi? ndi omukozi? ndi efura?) Ni bintu ki ebirungi ebi ndikukora?
OBUHABUZI: Noogumirwa kumanya ebintu birungi ebirikukukwataho? Buuza omuzaire nari omunywani ou orikwesiga kukugambira ebi orikukora gye n’enshonga ahabw’enki.
OMUSINGYE GWA BAIBULI: ‘Omuntu weena agyeze omurimo gwe, abe nigwo yaayehimbisizamu, kutari kwehimbisiza omu gwa mutaahi we.’—Abagalatia 6:4.
Obweremwa: Ni mitwarize ki ei nyine kwongyeramu amaani? Ni ryari okukira munonga obu ndikubaasa kwohibwa kukora ekigwire? Ni nkahi ahu nyine kwongyera kworeka omutwarize gw’okwerinda?
OMUSINGYE GWA BAIBULI: ‘Twagira ngu titwine kibi, nituba nitwebeiha, kandi nituba tutaine mazima.’—1 Yohaana 1:8.
Ebi ndikwikiriza: Ni mitindo ki, ei ndikukuratira, kandi n’ahabw’enki? Niinyikiririza omuri Ruhanga? Niki ekirikumpamiza ngu ahariho? Ni bikorwa ki ebi ndikureeba nk’obutari buringaaniza, kandi ahabw’enki? Ni bintu ki ebi ndikwikiriza ebirikuza kubaho omu biro by’omumaisho?
OMUSINGYE GWA BAIBULI: ‘Okwerinda nikwija kukureeberera, n’okwetegyereza kukurinde.’—Enfumu 2:11.
Noobaasa Kukunda n'Ebi
EBY’OKUGARUKAMU 10 EBY’EBIBUUZO EBI EMINYEETO BARIKUBUUZA
Ndi Muntu wa Muringo Ki?
Okuba omwegyendesereza aha micwe yaawe, ebi orikumanya, ebi otarikubaasa, n’ebigyendererwa nikiija kukuhwera kucwamu gye waaba noogyemeserezibwa.
