EBY’ABATO
12: Ebigyendererwa
EKI KIRIKUMANYISA
Ekigyendererwa nikikira aha kuroota ngu nangwa ekintu kuri nikibaho. Ebigyendererwa ebyabuzima nibitwariramu okutebeekanisa, okuhinduramu, n’okukora n’amaani.
Ebigyendererwa nibibaasa kuba bigufu (birikutwara ebiro bikye nari esaabiiti nkye kubiheza), buraingwaho (ameezi), n’ebiraingwa munonga (omwaka n’okukiraho). Ebigyendererwa ebiraingwa nibibaasa kuhikiirizibwa orikutaho ebigyendererwa ebigufu.
ENSHONGA AHABW’ENKI NI KIKURU
Okuhikiiriza ebigyendererwa nikibaasa kukuhwera kwongyera kwegiramu obwesigye, kuhamya emikago yaawe, n’okwongyera aha kushemererwa.
Okwegiramu obwesigye: Waataho ebigyendererwa bikye-bikye kandi okabihikiiriza, noogira obwesigye bw’okwongyeraho ebihango. Kandi nooyongyera kugira obwesigye bw’okusingura emirabanamu eya butoosha, nk’okugyemeserezibwa.
Abanywani: Abantu nibakunda kunywana abarikutaho ebigyendererwa ebiringaniire, ekirikumanyisa abo abarikumanya eki barikwenda kandi abeeteekateekire kukikoreerera. Kandi, gumwe aha miringo mirungi y’okuhamya obunywani, n’okukora n’omuntu ogwo kuhikiiriza ekigyendererwa nikyo kimwe.
Okushemererwa: Ku orikutaho ebigyendererwa kandi okabihikiiriza, nootunga okumarwa.
“Ninkunda okugira ebigyendererwa. Nibimbwera kuguma nyine eby’okukora eby’okukununkirira. Kandi ku orikuhikiiriza ekigyendererwa, nikishemeza kureeba enyima reero okagira oti: ‘Buzima, nkikozire! Nkozire eki mbaire ntaireho omutima kukora.’”—Christopher.
OMUSINGYE GWA BAIBULI: ‘Orikuhanga amaisho omuyaga, tarikubiba, kandi orikugahanga ebicu, tagyesa.’—Omubuurizi 11:4.
EKI ORIKUBAASA KUKORA
Kuratira amadaara aga kubaasa kuhika aha bigyendererwa byawe.
Oki Ori. Handiika ebigyendererwa ebi orikwenda kuhikaho, bikuratanise gye, orikutandika n’ebi orikwenda kubanza, ebya kabiri, ebya kashatu, ogumizemu otyo.
Entebeekanisa. Buri kigyendererwa, kora eki:
Taho obwire buringaniire obu oraakiheze.
Tebeekanisa ebirikutwarirwamu.
Teekateeka aha bureemezi, oburikubaasa kubaho, oreebe oku orikubaasa kubusingura.
Ekikorwa. Otategyereza kuhitsya waatunga buri kashonshorekye kubaasa kutandika. Yebuuze oti: ‘Nshemereire kubanza kukora ki kuhika aha kigyendererwa kyangye?’ Kandi kikore. Kuratiriza oku orikugyenda omu maisho kukihikiiriza.
OMUSINGYE GWA BAIBULI: ‘Ebi omweziriki arikuteekateeka kukora tibirikubura [kusingura].’—Enfumu 21:5.
