Omu nsi yoona, abantu baine emiteekateekyere etarikushushana aha maarwa. Abamwe nibakira kunywa amaarwa bari na banywani baabo. Abandi nibacwamu kutaganywa na kakye. Kwonka hariho abarikunywa amaarwa bakahika n’aha kusinda. Baibuli yo neegamba ki aha maarwa?

1. Mbwenu shi kigwire kunywa amaarwa?

Baibuli terikugira ngu kigwire okunywa amaarwa. Kureka, omu biconco ebi Baibuli erikugambaho ebi Ruhanga yaatuhaire, harimu ‘na viinyo erikugwisa gye emitima y’abantu.’ (Zaaburi 104:14, 15) Bamwe aha bashaija n’abakazi abeesigwa abarikugambwaho omu Baibuli, bakaba nibanywa amaarwa.—1 Timoseo 5:23.

2. Baibuli neehabura eta abo abarikucwamu kunywa amaarwa?

Yehova naayangira kimwe okunywa amaarwa maingi n’obusinzi. (Abagalatia 5:21) Ekigambo kye nikigira kiti: “Otariza omu mutwe gw’abanywi ba viinyo.” (Enfumu 23:20) N’ahabw’ekyo omuntu yaacwamu kunywa amaarwa, nangwa n’obu yaakuba ari wenka, taine kunywa munonga akaremwa kuteekateeka gye, kutegyeka emigambire ye n’ebikorwa bye, nari gakamurwaza. Omuntu yaaba atarikubaasa kutegyeka eminywere ye, naaba aine kurekyera kimwe amaarwa.

3. Nitubaasa kuha tuta ekitiinisa okucwamu kw’abandi aha bikwatiraine n’amaarwa?

Buri omwe aine kwecweramu aha bikwatiraine n’okukoresa amaarwa. Titwine kucwera omuntu orubanja yaacwamu kunywa amaarwa garinganiire, kandi yaaba atarikwenda kuganywa titwine kumugyemesereza. (Abarooma 14:10) Kandi amaarwa gaaba nigabaasa kuteeza omuntu entsibo, nitucwamu kutaganywa. (Shoma Abarooma 14:21.) ‘Titurikwesherurira [ebyaitu twenka], kureka nitusherura eby’okuhwera mutaahi waitu.’—Shoma 1 Abakorinso 10:23, 24.

 SHWIJUMA GYE

4. Yeecweremu yaaba oine kunywa amaarwa

Yesu akaba aine miteekateekyere ki aha kunywa amaarwa? Kubaasa kutunga eky’okugarukamu, reeba eky’okutangaaza eki yaabandize kukora. Shoma Yohaana 2:1-11, kubaasa kugarukamu ebibuuzo ebi:

• Eky’okutangaaza eki nikyoreka ngu Yesu akaba aine miteekateekyere ki aha maarwa n’abarikuganywa?

• Obu Yesu ataragizire ngu okunywa amaarwa ni kibi, twine kwehurira tuta Omukristaayo yaacwamu kuganywa?

Kwonka, n’obu Omukristaayo araabe aine obugabe bw’okunywa amaarwa, tikirikumanyisa ngu butoosha n’eky’obwengye kukikora. Shoma Enfumu 22:3, kumanya yaaba oine kunywa amaarwa omu mbeera ezi:

• Waaba oriyo nooza kuvuga nari orikuza kukoresa ekyoma ky’amaani.

• Waaba oine enda.

• Omushaho yaaba akugizire ngu toine kunywa amaarwa.

• Waaba noogumirwa kutegyeka eminywere yaawe.

• Waaba otarikwikirizibwa kunywa amaarwa kurugiirira aha biragiro.

• Waaba ori n’omuntu otarikunywa amaarwa, ahabw’okugira ngu enyima akaba naagumirwa kutegyeka eminywere ye.

Mbwenu shi oine kugabura amaarwa aha bugyenyi nari aha mikoro endiijo ey’orweteeraine? Kubaasa kumanya ekiraakuhwere kucwamu gye, zaana VIDIYO.

Shoma Abarooma 13:13 na 1 Abakorinso 10:31, 32. Bwanyima y’okushoma buri kyahandiikirwe, garukamu ekibuuzo eki:

• Okugyendera aha musingye ogu nikiija kukuhwera kita kucwamu ekirikushemeza Yehova?

 5. Noija kucwamu kunywa amaarwa garikwingana ki?

Waacwamu kunywa amaarwa, ijuka eki: N’obu Yehova araabe atarikuzibira okunywa amaarwa, naayangira kimwe obusinzi. Ahabw’enki? Shoma Hosea 4:11, 18, kubaasa kugarukamu ekibuuzo eki:

• Niki ekirikubaasa kubaho omuntu yaanywa amaarwa maingi?

Nitubaasa kwetantara tuta okunywa amaarwa ekirenga? Twine kwebariirira, nari kumanya obugarukiro bwaitu. Shoma Enfumu 11:2, kubaasa kugarukamu ekibuuzo eki:

• Ahabw’enki ni kirungi kwebariirira amaarwa agu oraanywe?

6. Okusingura omuze gw’okunywa ekirenga

 OMU BUGUFU

Yehova niwe yaatuhaire eky’okunywa ky’amaarwa, kwonka naayangira kimwe okunywa amaarwa maingi n’obusinzi.

Okweijutsya

• Baibuli neegamba ki aha maarwa?

• Ni kabi ki akari omu kunywa amaarwa ekirenga?

• Nitubaasa kuha tuta ekitiinisa okucwamu kw’abandi aha bikwatiraine n’okunywa amaarwa?