EISHOMO 35
Oku Turikubaasa Kucwamu Gye
Twena twine eby’okucwamu. Bingi ebi turikucwamu nibibaasa kutukwataho n’omukago gwaitu na Yehova. Nk’eky’okureeberaho, nitubaasa kucwamu ahu turaatuure, eki turaakore kwebaisaho, nari yaaba turaataahe omu bushwere. Twacwamu gye, nitubaasa kushemererwa kandi tushemeze na Yehova.
1. Noobaasa kukoresa ota Baibuli kukuhwera kucwamu gye?
Otakacwiremu, shaba Yehova kukuhwera kandi condooza omu Baibuli kumanya oku arikureeba enshonga. (Shoma Enfumu 2:3-6.) Obumwe, Yehova naatuha ekiragiro ekirikugamba aha nshonga butunu. Waacwamu kworobera ekiragiro ekyo, nooba waacwamu gye buzima.
Kwonka shi, ku haakuba hatariho kiragiro ekirikworeka kyenyini eki oine kukora? Nabwo Yehova naija kukwebembera “omu muhanda ogu oshemereire kutoora.” (Isaaya 48:17) Ata shi? Ataireho emisingye erikubaasa kukwebembera omu kucwamu. Emisingye ya Baibuli n’amazima makuru agarikworeka emiteekateekyere ya Ruhanga n’oku arikwehurira. Nitukira kumanya oku Ruhanga arikwehurira aha nshonga twashoma ebiri omu Baibuli. Twamanya oku Yehova arikwehurira, nitubaasa kucwamu omu muringo ogurikumushemeza.
2. Oine kuteekateeka aha nshonga ki otakacwiremu?
Baibuli neegira eti: ‘Omwerinzi naayetegyereza ahu arikuraba’ nari buri rutambwe oru arikuteera. (Enfumu 14:15) Eki nikimanyisa ngu tutakacwiremu, twine kutwara obwire kuteekateeka aha bi turikuza kucwamu. Waaba nooza kucwamu, yebuuze oti: ‘Ni musingye ki gwa Baibuli ogurikubaasa kumpwera? Eki ndacwemu nikiija kundeetera obugwagye? Nikiija kukwata kita aha bandi? Ekikuru munonga, nikiija kushemeza Yehova?’—Eky’Ebiragiro 32:29.
Yehova niwe ahikire kutugambira ekihikire n’ekigwire. Twateeraho kumanya gye ebiragiro bye n’emisingye ye, kandi tukamariirira kugigyenderaho, nituba nitwetendeka kugira omuntu w’omunda omurungi. Omuntu w’omunda n’enyehurira erikutuhwera kumanya ekihikire n’ekigwire. (Abarooma 2:14, 15) Omuntu w’omunda otendekirwe naija kutuhwera kucwamu gye.
SHWIJUMA GYE
Yetegyereze gye oku emisingye ya Baibuli n’omuntu w’omunda biri bikuru munonga omu kucwamu.
3. Ikiriza Baibuli ekwebembere
Emisingye ya Baibuli neebaasa kutwebembera eta omu kucwamu? Zaana VIDIYO, kubaasa kugarukamu ebibuuzo ebirikukurataho.
-
Obugabe bw’okwecweramu niki?
-
Ahabw’enki Yehova yaatuhaire obugabe bw’okwecweramu?
-
Yehova atuhaire ki kutuhwera kukoresa gye obugabe bw’okwecweramu?
Kubaasa kureeba eky’okureeberaho ky’omusingye gwa Baibuli, shoma Abaefeso 5:15, 16. Bwanyima reeba oku orikubaasa kukoresa gye obwire bwawe . . .
-
kushoma Baibuli buri izooba.
-
kuboneza obushwere bwawe, kuba omuzaire murungi, kuba omwana murungi w’omwojo nari ow’omwishiki.
-
kuza omu nteerane z’ekibiina.
4. Tendeka omuntu waawe w’omunda kukuhwera kucwamu gye
Haaba hariho Ekyahandiikirwe ekirikugamba butunu aha nshonga, nikibaasa kukworobera kucwamu gye. Kwonka shi ku haakuba hatariho ekiragiro? Zaana VIDIYO, kubaasa kugarukamu ekibuuzo ekirikukurataho.
-
Omu vidiyo, munyaanyazi-itwe akakora bintu ki kutendeka omuntu we ow’omunda, n’okucwamu ebirikushemeza Yehova?
Ahabw’enki tutaine kushaba abandi kutucweramu aha nshonga ezi twine kwecweramu? Shoma Abaheburaayo 5:14, kubaasa kugarukamu ebibuuzo ebi:
-
N’obu kiraabe nikireebeka nk’ekyorobi kubuuza abandi kutuhwera kucwamu, niki eki twine kwemanyira?
-
Yehova atuhaire ki ekirikukuhwera kutendeka omuntu waawe w’omunda, reero okacwamu gye?
Omuntu ow’omunda ni nka maapu erikutuhwera kucwamu omuhanda ogu turaatoore
5. Ha omuntu w’omunda ow’abandi ekitiinisa
Abantu nibacwamu ebirikutaana. Nitubaasa kuha tuta omuntu w’omunda ow’abandi ekitiinisa? Teekateeka aha mbeera ibiri ezi:
Embeera 1: Munyaanyazi-itwe omwe orikukunda kwekoraho omu muringo gw’omutaano, yaaza omu kibiina ahu banyaanyazi-itwe baingi barikuteganisibwa okwekoraho nk’okwo.
Shoma Abarooma 15:1 na 1 Abakorinso 10:23, 24, kubaasa kugarukamu ebibuuzo ebi:
-
Kurugiirira aha byahandiikirwe ebi, munyaanyazi-itwe ogwo naabaasa kucwamu ata? Noija kukora ki waaba ori n’ogwo ou omuntu we w’omunda atarikumwikiriza kukora ekintu eki iwe orikubaasa kukora?
Embeera 2: Ow’eishe-emwe naamanya ngu Baibuli terikuzibira okunywa amaarwa garinganiire, kwonka we tarikwenda kuganywa. Ayetsirwe aha mukoro, kandi naareeba ab’eishe-emwe nibanywa amaarwa.
Shoma Omubuurizi 7:16 na Abarooma 14:1, 10, kubaasa kugarukamu ebibuuzo ebi:
-
Kurugiirira aha byahandiikirwe ebi, ow’eishe-emwe ogwo naabaasa kucwamu ata? Noija kukora ki waareeba omuntu ondiijo naakora ekintu eki omuntu waawe w’omunda atarikukwikiriza kukora?
Ni bintu ki ebirikubaasa kukuhwera kucwamu gye?
1. Shaba Yehova kukuhwera kumanya eky’okukora.—Yakobo 1:5.
2. Condooza omu Baibuli n’ebitabo ebirikwegamira ahari Baibuli kutunga emisingye y’okugyenderaho. Noobaasa n’okwebuuza aha Bakristaayo abakuzire omu by’omwoyo.
3. Teekateeka aha ku okucwamu kwawe kuraakwate aha muntu waawe ow’omunda n’ow’abandi.
ABAMWE NIBAGIRA NGU: “Oine obugabe bw’okukora kyona eki orikwenda. Eki abandi barikuteekateeka ti kikuru.”
-
Ahabw’enki twine kufayo aha ku Ruhanga n’abantu abandi barikwehurira?
OMU BUGUFU
Nitucwamu gye twafayo kumanya oku Yehova arikwehurira aha nshonga, kandi tukafayo kumanya yaaba ebikorwa byaitu nibiija kuhwera abandi nari kubakora kubi.
Okweijutsya
-
Noobaasa kucwamu ota ebirikushemeza Yehova?
-
Noobaasa kutendeka ota omuntu waawe w’omunda?
-
Noobaasa kworeka ota ngu nooha ekitiinisa omuntu w’omunda ow’abandi?
JUMBURA EBINDI
Noobaasa kucwamu ota ebiraakuhwere kuhamya omukago gwawe na Ruhanga?
“Cwamu Ebirikuhaisa Ruhanga Ekitiinisa” (Omunaara gw’Omurinzi, Apuri 15, 2011)
Manya gye oku Yehova arikuha obuhabuzi.
Reeba ekyahweraire omushaija omwe kucwamu aha nshonga egumire.
Manya oku orikubaasa kucwamu ebirikushemeza Yehova haaba hatariho ekiragiro ekirikugamba aha nshonga butunu.
“Butoosha Nooyenda Ekiragiro kya Baibuli?” (Omunaara gw’Omurinzi, Desemba 1, 2003)
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
