Okushoberwa kw’Omwegi
Peter ari omu ntebe ye ashobeirwe, naahurira naatetema omunda. Omwegyesa we omukazi ou arikuha ekitiinisa yaaheza kushoboorora oku Charles Darwin yaahweraire abantu kucungurwa kuruga aha nyikiriza n’emigyenzo arikwegyesa ngu ebintu bikaruga omu bindi. Hati yaashaba abeegi omu kibiina kugamba eki barikuteekateeka aha nshonga egi.
Peter ari omu mbeera egumire. Abazaire be bakamwegyesa ngu Ruhanga niwe yaahangire ensi n’ebintu byona ebigirimu. Nibagira ngu ebiri omu Baibuli ebirikukwata aha kuhanga nibyesigwa kandi ngu enyegyesa erikugira ngu ebintu bikabaho birikuruga omu bindi n’ekigunjano ekitaine buhame. Omwegyesa wa Peter n’abazaire be boona baine ebigyendererwa birungi. Kwonka shi Peter aine kwikiriza oha?
Buri mwaka omu mashomero omu nsi yoona, nihabayo ebintu nk’ekyagambwaho aha ruguru. Peter n’abeegi abandi abari nkawe baine kukora ki? Mbwenu shi torikwikiriza ngu buzima baine kutebeekanisa ebiteekateeko byabo aha nshonga egi? Baine kushwijuma enyegyesa erikugira ngu ebintu bikaruga omu bindi, n’enyegyesa y’okuhanga reero bakeecweramu eki baraikirize.
Nangwa Baibuli neerabura aha kufa kukuratira eki baingi barikwikiriza. ‘Otaine bwengye naikiririza eryo,’ omuhandiiki wa Baibuli omwe nikwo yaagizire, ‘kwonka omwerinzi naayetegyereza ahu arikuraba.’ (Enfumu 14:15) Baibuli neehiga Abakristaayo kukoresa okubaasa kwabo kw’okuteekateeka n’okwehamiza ebintu ebi barikwegyesibwa.—Abarooma 12:1, 2.
Akatabo aka katebeekanisiibwe kushagika abantu b’ediini abarikwegyesa aha kuhanga omu mashomero. Ekigyendererwa ky’akatabo aka n’okushwijuma emiteekateekyere y’abo abarikugira ngu ebiine amagara bikabaho bubaho kandi ngu ebiri omu Baibuli n’ebitebyo.
Nituza kuta omutima aha katafaari k’omubiri ahakuba niko ntima y’amagara. Noija kwetegyereza amazima garikutangaaza agarikukwata aha ku obutafaari bw’omubiri bukozirwe. Noija n’okushabwa kuha obuhame oburikworeka yaaba kihikire kugira ngu ebintu bikaruga omu bindi.
Hati nari nyentsya, twena nikiija kutwetengyesa kugarukamu ekibuuzo eki: Ebiine amagara bikahangwa, nari bikaruga omu bindi? Obundi orateekateekireho munonga aha nshonga egi. Akatabo aka nikaija kworeka obuhame obumwe obureeteire baingi kwikiriza ngu ebiine amagara bikahangwa.
