Isaaka akaba aine emyaka 40 obu yaashwera Rebeka. Akaba naamukunda munonga. Ku haahingwireho obwire, bakazaara abaana babiri​—empasha z’aboojo.

Omwojo omukuru akaba naayetwa Esau, kandi omuto ari Yakobo. Esau akaba naakunda kuhiiga enyamaishwa. Kwonka Yakobo akaba naakunda kuguma omu ka.

Omu bwire obwo, omutabani omukuru niiwe yaabaire aheebwa eitaka erihango n’esente ishe ku yaabaire afa. Ekyo kikaba nikimanywa nk’obuhunguzi. Omu ka ya Isaaka, obuhunguzi bukaba nibutwariramu ebiraganiso ebi Yehova yaaraganiise Abrahamu. Esau akaba atarikuteekateeka munonga aha biraganiso ebyo, kwonka Yakobo akaba naamanya ngu ni bikuru munonga.

Eizooba rimwe Esau akaija omuka arikuruga kuhiiga aruhire munonga. Akahurira omugaju gw’eby’okurya ebi Yakobo yaabaire ateekire, yaamugira ati: ‘Nyine enjara! Mpa eby’okurya.’ Yakobo akamugira ati: ‘Naaza kubikuha, banza onguze obuhunguzi bwawe.’ Esau akagira ati: ‘Tindikufayo aha buhunguzi. Butware. Nyowe niinyenda kurya.’ Noogira ngu eki Esau yaakozire kikaba kihikire? Buzima, kikaba kitahikire. Esau akagaba ekintu ekyabaire kiri eky’omuhendo, ahabw’eby’okurya.

Obu Isaaka yaabaire akuzire munonga, bukaba buri obwire bw’okuha omutabani omukuru omugisha. Kwonka Rebeka akahwera Yakobo, omutabani omuto, kutunga omugisha  ogwo. Esau ku yaakimanyire, akagira ekiniga kingi kandi yaatebeekanisa kwita Yakobo. Isaaka na Rebeka bakaba nibenda kurinda Yakobo, n’ahabw’ekyo bakamugambira bati: ‘Gyenda ohungire Harani owa Labani, okuhitsya obu ekiniga kya mukuru waawe kirihwa.’ Yakobo akagyendera aha buhabuzi bw’abazaire be kandi akairuka kukiza amagara ge.